Te haapiihia ra tatou e Iehova

¹ I raro aˈe i te aratairaa a te Atua, te faaohipahia nei te hoê porotarama haapiiraa na te ao atoa nei i roto e 233 fenua. Aita roa ˈtu e faaauraa i ta te ao nei e nehenehe e pûpû mai. Te haapii mai nei to tatou Orometua Rahi ra o Iehova ia tatou ia faufaahia tatou i teie nei â e oia atoa no te oraraa mure ore.—Isa. 30:20; 48:17.

² Te mau haapiiraa a te Atua: E hiˈopoa anaˈe i te mau haapiiraa o te horoa nei i te tahi mau haapiiraa ia faufaahia te nunaa o Iehova. Te haapii nei te Haapiiraa o te Taviniraa Teotaratia, e faatupuhia i te mau hebedoma atoa i roto i na 87 000 amuiraa, e mau mirioni feia poro i te Basileia nafea ratou e riro ai ei mau tavini aravihi no te parau apî maitai. Ua tapao anei outou ia outou? Tei rotopu anei outou i te mau tausani taeae e tuahine i haere e piti hebedoma te maoro i te Haapiiraa no te taviniraa pionie? Peneiaˈe e nehenehe te faaitiraahia mai te hora e titauhia i te mau pionie tamau e tauturu e rave rahi feia poro ia rave i taua taviniraa ra e ia faaî i te mau titauraa no te haere i taua mau haapiiraa ra. E faatupuhia te Haapiiraa Faaineineraa no te Taviniraa, no te hoê maororaa e piti avaˈe i teie nei na roto i te mau reo faufaa e paraparauhia ra na te ao nei e e haapiihia i te tahi mau matahiapo e te tahi mau tavini tauturu faaea taa noa ia amo ratou i te mau hopoia teotaratia rahi atu â. Ma te tamau, e fanaˈo pauroa te mau matahiapo e te mau tavini tauturu i te hoê faaineineraa i roto i ta ratou tuhaa i te Haapiiraa o te Taviniraa o te Basileia.

³ E toru haapiiraa taa ê e vai ra i te Pu haapiiraa a te Taiete Watchtower i Patterson, i New York o te horoa ra i te hoê faaineineraa teotaratia hohonu. I roto i na avaˈe e pae, e faaineine te mau haapiiraa no Gileada, te Haapiiraa Bibilia a te Taiete Watchtower i te tahi mau tavini no te rave i te taviniraa mitionare i roto i te tahi mau fenua ěê. E apiti te mau melo o te mau tomite amaa o te ao atoa nei i roto i te hoê faaineineraa e piti avaˈe te maoro no nia i te faanahonahoraa o te mau amaa. I te avaˈe Me 1999, ua haamatahia te hoê haapiiraa apî e piti avaˈe te maoro no te mau tiaau ratere e te hoê piha e 48 feia haapii no te mau Hau Amui no Marite e no Kanada mai. I te pae hopea, o ta ˈna mau tavini atoa te faufaahia i te haapiiraa ta Iehova e horoa ra na roto i taua mau haapiiraa ra e rave rau.

⁴ Haapiihia, no teihea râ tumu? Ua faahiti te hoê melo no te Tino Aratai e: “Te porotarama haapiiraa i teie nei, no te aratai ïa i te taatoaraa o te nunaa a Iehova i te tiaraa paari maitai faataahia i roto i te Maseli 1:1-4.” Ia tamau noa Iehova i te horoa na tatou taitahi “te reo o te feia i haapiihia”!—Isa. 50:4, MN.