E hiˈo noa anei tatou i te huru rapaeau?
1 Ia rave anaˈe tatou i ta tatou taviniraa i mua i te huiraatira, e nehenehe te manaˈo matamua ta vetahi mau taata e faatupu i nia ia tatou e faaotohe ia tatou ia faaite ia ratou i te parau apî maitai. Ei hiˈoraa, eaha to tatou huru mai te peu e e mata tuatua hoi to ˈna, e hiˈo mai te hoê taata ia tatou, ma te manaˈo ino a haere ai tatou e farerei i to ˈna taata tapiri o te anaanatae ra i te parau mau? Ua faaoti te hoê tuahine pionie i faaruru na i taua tupuraa ra e farerei i taua taata ra e e paraparau atu ia ˈna. Ua aroha maira ma te iriâ. Teie râ, ma te manaˈo-ore-hia, ua faaroo oia i te poroi a te Bibilia e, ma te ore e haamarirau, ua farii aˈera oia e haapii. Aita te tuahine i tâuˈa i te mau huru rapaeau, ua haamatara te reira i te eˈa o te parau mau no taua taata ra e ta ˈna vahine.
2 Ua riaria te tahi atu tuahine i te huru rapaeau o te hoê taurearea rouru roa, ua tamau noa râ oia i te poro rii maa taime ia haere anaˈe mai te taurearea i te fare toa i reira te tuahine e rave ai i te ohipa. Ua hotu ta ˈna mau tutavaraa, i te mea hoi i teie nei e Ite bapetizohia taua taurearea ra. Na te aha e tauturu ia tatou ia ore e faaoti oioi e eita taua mau huru taata ra e farii maitai mai?
3 E pee anaˈe i te hiˈoraa o Iesu: Ua ite o Iesu e e horoa oia i to ˈna ora no te taata atoa. No reira, aita oia i vaiiho ia ˈna ia haapeapeahia e te huru rapaeau o to ˈna taata-tupu. Ua taa ia ˈna e e nehenehe atoa te feia e roo ino to ratou e ineine i te taui mai te peu e e horoahia te hoê tauturu e te hoê faaitoitoraa e tano. (Mat. 9:9-13) Ua tutava oia i te tauturu i te feia moni e te feia veve. (Mat. 11:5; Mar. 10:17-22) Eiaha tatou e haava i te mau taata ta tatou e farerei ra i roto i te taviniraa na nia i to ratou huru rapaeau, e tapea te reira ia tatou ia ite i te hoê huru mafatu maitai. (Mat. 7:1; Ioa. 7:24) Na te aha e tauturu ia tatou ia pee i te hiˈoraa faahiahia o Iesu?
4 Maoti ta tatou haapiiraa Bibilia, ua ite tatou e e mana to te Parau a te Atua no te taui i te huru feruriraa o te hoê taata, to ˈna haerea e to ˈna huru taata. (Eph. 4:22-24; Heb. 4:12) No reira, ma te ara maite, e tia ïa ia tatou ia tapea i te hoê haerea maitai e ia vaiiho i te toea i roto i te rima o Iehova ra, Tei hiˈo i roto i te mafatu o te mau taata.—Sam. 1, 16:7; Ohi. 10:34, 35.
5 Ia apiti tatou, na roto i te faaiteraa ma te paetahi ore i te parau apî maitai i te mau huru taata atoa, na roto i te oreraa e hiˈo i to ratou huru rapaeau, i roto i te ohipa ootiraa o te mau mahana hopea!—Tim. 1, 2:3, 4.