Nafea ia faarahi i ta tatou taviniraa
1 Ua hau atu i te 40 matahiti i teie nei, ua neneihia i roto i Te Pare Tiairaa o te 1 no Tiunu 1955 (Farani) i te hoê tumu parau oia hoi “Te rave ra outou i te maraa ia outou. Ua navai anei?” Ma te aroha, ua faaite taua tumu parau ra nafea te mau tavini a te Atua e nehenehe ai e rohi i roto i te taviniraa no te faarahi i ta ratou ohipa i taaihia i te Basileia. I teie â mahana, no tatou atoa teie aˈoraa maitai, tatou e tutava ra i te haamaitai atu â.
2 E tia i ta tatou taviniraa atoa ia turaihia e te faaueraa rahi roa ˈˈe: “E [here] oe i to Atua ia Iehova ma to [mafatu] atoa, e ma to [nephe] atoa, e ma to manaˈo atoa, e ma to puai atoa.” (Mar. 12:30; MN) Te faaite nei tatou i to tatou here taatoa no Iehova ma te faaohipa i te mau ravea atoa no te faahaere i te ohipa o te Basileia i mua. E hiˈopoa anaˈe i te tahi mau ravea no te faarahi i ta tatou taviniraa.
3 Ia amo tatou i tatou mau hopoia: E nehenehe te mau taeae e tutava i te faaî i te mau titauraa no te riro ei mau tavini tauturu e i muri iho ei mau matahiapo. Ua turai te mau tumu parau “Te hinaaro uˈana ra anei outou i te hoê hopoia?” e “Mea aravihi anei outou no te tavini?” tei neneihia i roto i Te Pare Tiairaa o te 1 no Setepa 1990 e rave rahi taeae ia ineine i te amo i te tahi mau hopoia i roto i te amuiraa. A ani i te mau matahiapo i te mau manaˈo papu no te haamaitai e no te faaaravihi ia outou.
4 Te titau-manihini-hia ˈtu nei te mau matahiapo e te mau tavini tauturu faaea taa noa ia feruri maite no te neheneheraa e faaî i te hoê parau aniraa no te Haapiiraa Faaineineraa no te Taviniraa. E ite hau atu â outou ia tuatapapa outou i te mau faahororaa i raro aˈe i te tumu parau “École de formation ministérielle” i roto i te mau Index des publications de la Société Watch Tower (1986-1990, 1991-1994 e 1996). Te ite ra anei outou i teie “opani rahi o te taviniraa” o te matara ra i mua ia outou? (Kor. 1, 16:9a, MN) Aita te mau taeae e rave rahi tei na reira i te haere i manaˈo aˈenei i te mau haamaitairaa i te pae no te taviniraa atoa ta te reira e nehenehe e horoa. I teie mahana, te oaoa nei ratou i te taviniraa i te Betela aore ra ei mau pionie taa ê, ei mau mitionare aore ra ei mau tiaau ratere.
5 Ia hinaaro uˈana tatou e tavini ma te taime taatoa: E tia i te feia apî ua noaa ta ratou parau tuite tuarua, te mau vahine e faaea ra i te fare e te feia faatuhaahia ia feruri maite i te taviniraa pionie. A hiˈopoa faahou i te api hau o Te taviniraa o te Basileia no Tiurai 1998, a tauaparau atu ai i te tahi mau pionie i farerei na i te hoê â tupuraa e to outou. E turai paha te reira ia outou ia faarahi i ta outou taviniraa ma te riro ei pionie, mai ia ratou. (Kor. 1, 11:1) E nehenehe anei outou e horoa e 70 hora i roto i te taviniraa i te avaˈe taitahi e e riro atu ai ei pionie tamau?
6 I te ao atoa nei, ua hau atu i te 17 000 taeae e mau tuahine e tavini ra i te hoê Betela. Te faahiti ra Te taviniraa o te Basileia no Mati 1995, i te api 3, i te mau titauraa te tia ia faaî no te rave i taua taviniraa ra. No te aha outou e ore ai e taio e e uiui ia outou e te faaî ra anei outou i te mau titauraa no taua haamaitairaa otahi ra?
7 Ia tavini tatou i te vahi e hinaaro-rahi-hia: Te faaea ra anei outou i roto i te hoê tuhaa fenua e poro-pinepine-hia ra, i reira e rave rahi taeae e amo ai i te hopoia? Ua feruri anei outou e faarahi i ta outou taviniraa ma te haere atu i te hoê vahi e hinaaro-rahi-hia? Peneiaˈe e nehenehe outou e haere atu i te hoê motu tapiri e mea iti te feia rave ohipa. (Mat. 9:37, 38) Eiaha te reira e rave-ru-hia. E tia ia ferurihia i roto i te pure. (Luka 14:28-30) A faaite atu i to outou tupuraa i te mau matahiapo e te tiaau haaati. E tauturu ratou ia outou ia ite maite e mea paari anei ia haere atu aore ra ia faaineine ia outou no a muri aˈe. Mai te peu e e hinaaro outou e papai i te Taiete no te ani e haere outou ihea, e tia ïa ia apitihia ta outou rata e te hoê rata i tarimahia e te Tomite no te taviniraa o ta outou amuiraa.
8 Ia haamaitai tatou i ta tatou taviniraa: E nehenehe paha tatou pauroa e apiti rahi atu â i roto i te pororaa ma te haamaitai i ta tatou taviniraa. Te apiti ra anei tatou i roto i te mau tuhaa atoa o te ohipa, oia hoi te pororaa na te mau fare, te pororaa faanaho-ore-hia, te mau hoˈi-faahou-raa e farerei e te mau haapiiraa Bibilia? Mai te peu e te faatere nei tatou i te hoê haapiiraa, e nehenehe anei tatou e haamaitai ia tatou i roto i te haapiiraa? E mea maitai ia hiˈo faahou i te api hau o Te taviniraa o te Basileia no Tiunu 1996 o te horoa ra i te tahi mau manaˈo tauturu no te aratai i te mau taata e haapii ra e o tatou ia pûpû ia ratou no Iehova e ia bapetizohia ratou.
9 Te tuatapapa maite ra te pene 9 o te buka ra Organisés pour bien remplir notre ministère nafea ia faarahi e ia haamaitai i ta tatou taviniraa. Papu maitai e te hinaaro nei tatou e rave i te maraa ia tatou i roto i te taviniraa a te Atua. No te aha e ore ai e feruri maite i ta tatou mau tapao i te pae varua? E pee anaˈe i te faaueraa a te Timoteo 1, 4:15: “[“E feruri i taua mau mea ra,” MN]; o ta oe ïa e rave eiaha e faaea, ia ite te taata atoa i te tupuraa o to oe ite.”