Eaha te mau haapiiraa ta te mau Ite no Iehova e fanaˈo nei ia maitai atu â ta ratou taviniraa?

Te fanaˈo nei te mau Ite no Iehova i te hoê faaineineraa tamau i roto i te mau tuhaa atoa o to ratou oraraa Kerisetiano, mai te pororaa. Ua faaue Iesu i ta ˈna mau pǐpǐ ia poro e ia haapii atu i te parau apî oaoa o te Faatereraa arii. (Mataio 24:14; 28:19, 20) E fanaˈo matou i teie faaineineraa i te mau putuputuraa tahebedoma e te mau tairururaa matahiti. E fanaˈo te mau taeae o te amo nei i te hopoia i roto i te mau amuiraa aore ra i roto i te faanahonahoraa i te hoê faaineineraa i te mau haapiiraa Bibilia taa ê.

I roto i teie tumu parau

• Eaha te mau faaineineraa ta te mau Ite no Iehova e fanaˈo nei?

• Te mau haapiiraa Bibilia no te mau Ite no Iehova

• Ua niuhia te faaineineraa ta te mau Ite no Iehova e fanaˈo ra i nia i te aha?

• E titauhia anei i te mau Ite no Iehova ia aufau no te fanaˈo i tera mau haapiiraa?

• E nafea te mau Ite no Iehova e faufaahia ˈi i ta ratou mau haapiiraa?

Eaha te mau faaineineraa ta te mau Ite no Iehova e fanaˈo nei?

Te mau putuputuraa a te amuiraa. I te mau hebedoma atoa, e apiti matou i na putuputuraa e piti i ta matou vahi haamoriraa, piihia Piha a te Basileia. E faanahohia hoê putuputuraa i roto i te hebedoma e te tahi atu putuputuraa, i te hopea o te hebedoma. Pauroa te taata te nehenehe e haere mai e aita e titauraa moni.

• Putuputuraa o te hebedoma. E haapiihia matou e nafea ia maitai atu â i roto i te taioraa, te aparauraa, te vauvauraa i te mau oreroraa parau, te pororaa e te haapiiraa. E fanaˈo matou i tera faaineineraa maoti te mau oreroraa parau, aparauraa, faahiˈoraa e video. E tauturu te reira ia matou ia aravihi atu â i roto i te faaiteraa i te poroi Bibilia ia vetahi ê e i roto i te faatereraa i te mau haapiiraa Bibilia e te feia e anaanatae ra. E faufaahia te feia atoa e apiti nei i te mau putuputuraa i tera faaineineraa. Hau atu, e haapuai tera mau putuputuraa i to matou faaroo i te Atua e to matou here ia ˈna e i to matou mau hoa Kerisetiano.

• Putuputuraa i te hopea o te hebedoma. E piti tuhaa to teie putuputuraa. E haamatahia ma te hoê oreroraa parau niuhia i nia i te Bibilia e vauvauhia no te taatoaraa. I te piti o te tuhaa, e faaterehia mai te hoê aparauraa i nia i te hoê tumu parau o te haapiiraa o Te Pare Tiairaa,a ma te faaohipa i te mau uiraa e te mau pahonoraa. I tera taime, e aparauhia e e faataahia te mau tumu parau e te mau faaueraa Bibilia o te tauturu ia matou i roto i te taviniraa e te oraraa.

Te mau tairururaa. I te mau matahiti atoa, e faatupuhia e toru tairururaa. E apiti mai te feia poro no e rave rahi amuiraa. E mau tupuraa oaoa tera o te haamahiti i te hoê tumu parau Bibilia taa maitai, na roto i te mau oreroraa parau, faahiˈoraa, uiuiraa manaˈo e video. Mai te mau putuputuraa a te amuiraa, e tauturu mai te mau tairururaa ia matou ia ite atu â no nia i te Bibilia e ia riro ei taata poro aravihi atu â i roto i te faaiteraa i te parau apî oaoa. I ta matou mau tairururaa, pauroa te nehenehe e apiti mai e aita e titauraa moni.

Te mau haapiiraa Bibilia no te mau Ite no Iehova

No te faaineine atu â ia ratou, e titau-manihini-hia te tahi mau Ite no Iehova ia apiti i e rave rau haapiiraa Bibilia. Eaha tera mau haapiiraa? Eaha ta ratou fa? Ehia maororaa e tupu ai te reira? O vai te apiti atu?

Haapiiraa no te mau pionie

• Eaha te fa? Faaineine i te feia poro taime taatoa, piihia pionie,b ia aravihi atu â i roto i te pororaa e te haapiiraa ˈtu. E fanaˈo ratou i te faaineineraa na roto i te mau aparauraa, faahiˈoraa, oreroraa parau e tuhaa faaohiparaa.

• Ehia maororaa? Ono mahana.

• O vai te apiti atu? O te feia tei rave i te taatoaraa o ta ratou matahiti matamua ei pionie. Oia atoa te mau taata poro mea maoro ratou i te taviniraa ei pionie e tei ore i apiti i tera haapiiraa i na pae matahiti na mua ˈtu.

Haapiiraa no te feia poro i te parau apî oaoa o te Basileia

• Eaha te fa? Horoa i te hoê faaineineraa taa ê i te mau taata poro taime taatoa aravihi aˈe. E haa ratou ia maitai atu â ta ratou huru pororaa e haapiiraa ia vetahi ê. E haapii hohonu atu â ratou i te mau tumu parau Bibilia. E rave rahi o ratou te tonohia i te mau vahi e hinaaro-rahi-hia te feia poro.

• Ehia maororaa? Piti avaˈe.

• O vai te apiti atu? O te mau pionie o te faaî ra i te tahi mau titauraa taa maitai e o te nehenehe e tavini i te mau vahi atoa e tonohia ˈi ratou.

Haapiiraa no te mau matahiapo

• Eaha te fa? Tauturu i te mau matahiapoc ia amo maitai i ta ratou mau hopoia i roto i te amuiraa, mai te haapiiraa ˈtu e te aupururaa i te mau mero o te amuiraa. Tauturu atoa ia ratou ia here atu â i te Atua e i to ratou mau hoa Kerisetiano.—Petero 1, 5:2, 3.

• Ehia maororaa? Pae mahana.

• O vai te apiti atu? O te mau matahiapo faatoroa-apî-hia. Oia atoa te mau taeae mea maoro ratou i te taviniraa ei matahiapo e tei ore i apiti i tera haapiiraa i na pae matahiti na mua ˈtu.

Haapiiraa no te mau tiaau haaati e ta ratou vahine

• Eaha te fa? Faaineine i te mau tavini ratere, piihia tiaau haaatid ia amo maitai atu â i ta ratou mau hopoia. (Timoteo 1, 5:17) E tauturu atoa tera haapiiraa i taua mau matahiapo Kerisetiano ra e ta ratou mau vahine ia papu atu â to ratou ite no nia i te Bibilia.

• Ehia maororaa? Hoê avaˈe.

• O vai te apiti atu? O te mau tiaau haaati apî e ta ratou vahine, i muri aˈe hoê matahiti taviniraa ei tiaau haaati. E titau-manihini-faahou-hia ratou i te mau pae matahiti atoa i muri aˈe i to ratou apitiraa matamua i tera haapiiraa.

Haapiiraa no te mau taeae faatoroahia

• Eaha te fa? Tauturu i te mau matahiapo e te mau tavini tauturue ia amo maitai i ta ratou mau hopoia, ia au i te mau huru tupuraa, huru feruriraa e hinaaro o te mau amuiraa i taua taime ra. (Timoteo 2, 3:1) E tupu tera haapiiraa i te mau piti aore ra toru matahiti atoa.

• Ehia maororaa? Pinepine hoê mahana aore ra hau atu.

• O vai te apiti atu? O te mau tiaau haaati, te mau matahiapo e te mau tavini tauturu.

Haapiiraa no te taviniraa i te Betela

• Eaha te fa? Tauturu i te mau mero o te Betelaf ia rave maitai i ta ratou ohipa e ia here atu â i te Atua e te tahi i te tahi.

• Ehia maororaa? Pae mahana e te afa.

• O vai te apiti atu? E titauhia i te mau mero apî o te Betela ia apiti atu. E titau-manihini-atoa-hia te mau mero mea maoro ratou i te taviniraa i te Betela e tei ore i apiti i tera haapiiraa i na pae matahiti na mua ˈtu.

Haapiiraa Bibilia no Gileada a te Watchtower

• Eaha te fa? Tauturu i te feia e apiti atu ia mauruuru atu â e ia taa ˈtu â i te Bibilia, oia atoa ia faaohipa i ta ratou e haapii ra. (Tesalonia 1, 2:13) E riro tera mau tane e vahine Kerisetiano taiva ore o te apiti ra i te Haapiiraa no Gileada ei mauhaa faufaa atu â i roto i te faanahonahoraa a Iehova e te ohipa haapiiraa Bibilia na te ao nei. E tonohia ratou i te mau tuhaa fenua aore ra i te amaa o to ratou iho fenua aore ra i te tahi atu fenua.

• Ehia maororaa? Pae avaˈe.

• O vai te apiti atu? E titau manihini te mau amaa i te mau tavini taime taatoa maitihia ia apiti atu i tera haapiiraa. E tupu tera haapiiraa i Marite, i te Pu haapiiraa a te mau Ite no Iehova i Patterson, New York.

Haapiiraa no te mau mero o te Tomite amaa e ta ratou vahine

• Eaha te fa? Faaineine i te mau mero o te Tomite amaag no te tiaau i te ohipa ravehia i te Betela e i te taviniraa a te mau Ite no Iehova i to ratou fenua aore ra i te mau fenua i raro aˈe i te tiaauraa o to ratou amaa.

• Ehia maororaa? Piti avaˈe.

• O vai te apiti atu? E titau manihini te pu rahi a te mau Ite no Iehova i te mau mero maitihia o te Tomite amaa e ta ratou vahine ia apiti atu i tera haapiiraa o te tupu i te Pu haapiiraa a te mau Ite no Iehova i Patterson, New York.

Ua niuhia te faaineineraa ta te mau Ite no Iehova e fanaˈo ra i nia i te aha?

Ua niuhia te faaineineraa ta te mau Ite no Iehova e fanaˈo ra i nia i te Bibilia noa. Te manaˈo nei matou e ua papaihia te Bibilia i raro aˈe i te aratairaa a te Atua. Te horoa mai ra te Bibilia i te mau aˈoraa maitai roa ˈˈe o te tauturu i te hoê Kerisetiano i roto i te mau tuhaa atoa o to ˈna oraraa.—Timoteo 2, 3:16, 17.

E titauhia anei i te mau Ite no Iehova ia aufau no te fanaˈo i tera mau haapiiraa?

Aita. Mea tamoni ore te mau haapiiraa. E aufauhia te mau haamâuˈaraa tuatihia i te mau haapiiraa a te mau Ite no Iehova maoti te mau ô horoa noa.—Korinetia 2, 9:7.