Pahonoraa i ta outou mau uiraa

◼ Eaha te mau ravea paruru te tia i te mau metua ia rave ia apiti anaˈe ta ratou mau tamarii aita i naeahia te matahiti i roto i te pororaa?

Ia haere ratou e poro, e mea tano ia afai te mau metua Kerisetiano i ta ratou mau tamarii na muri iho ia ratou no te haapii ia ratou ia faaite i te parau apî maitai o te Basileia. Teie râ, e tia ia haapao maitai ia ratou no te mau ati e tupu i roto i te tuhaa fenua, noa ˈtu e mau tuhaa fenua “papu.” E mea pinepine o te mau tamarii te roohia ra i te haavîraa uˈana e te mau hamani-ino-raa no te nounou e te mau ohipa faufau i te pae taatiraa e parare noa ˈtura i teie mau “anotau hopea.” (Tim. 2, 3:1-5) E tia i te mau metua ia rave i te tahi mau ravea e au no te paruru i ta ratou mau tamarii i te feia e hinaaro ra e hamani ino ia ratou. Eaha ta ratou e nehenehe e rave?

Ma te paari, te aˈo ra te Bibilia e ia ara maite e ia hiˈo atea i te ati e tupu mai. (Mas. 22:3; Mat. 10:16) Aita e faufaa ia haamau i te mau ture, e mea paari râ ia apiti te metua tane, te metua vahine aore ra te tahi atu taata paari i te hoê tamarii i roto i te pororaa. Mai te peu e te poro amui ra e piti taurearea poro, mea tano ia ite-noa-hia raua e te hoê o te mau metua aore ra te tahi atu taata paari. Parau mau, a paari noa ˈi te tamarii e a faaite ai oia e te paari ra oia, e nehenehe te mau metua e faaoti e tia anei ia iti mai te haapao-maitai-roa ˈtu-raa ia ˈna—Hiˈo atoa Te taviniraa o te Basileia no Atopa 1992, Pahonoraa i ta outou mau uiraa.

Mea paari atoa ia feruri noa i te ravea paruru ia tere atu na nia i te pereoo aore ra na raro noa. Ma te rave i te mau ravea paruru tano, e ape-pinepine-hia te hoê ati, te hoê mauiui rahi, te mau haamâuˈaraa i te pae rapaauraa e te hopoia tivila i roto i teie ao e mea oioi roa hoi ia tuu i te mau ohipa i mua i te mau tiribuna.

E mea maitai “ia arue, MN” te mau taurearea “i te iˈoa o Iehova.” (Sal. 148:12, 13) E haaputapû roa ta ratou mau parau nehenehe e to ratou haerea maitai i te mau taata e e faahanahana ia Iehova. E te mau metua, a rave i te mau mea atoa ta outou e nehenehe no te tauturu i ta outou mau tamarii ia apiti tamau i roto i te pororaa i te parau apî maitai ma te vai ara noa ia paruru ia ratou i te tahi mau ati e nehenehe e tupu mai!