Ia hinaaro uˈana tatou i te poro i te parau apî maitai
1 “E hinaaro [uˈana] hoi to ˈu ia ite atu ia outou . . . [Te vai ra ia ˈu te hoê hinaaro uˈana i te faaite atu ia outou i te parau apî maitai].” Mea na reira to te aposetolo Paulo haamataraa i ta ˈna rata no te mau taeae i Roma. No te aha hoi o Paulo i hinaaro uˈana ˈi i te ite ia ratou? Te na ô ra oia e: “Ia faufaahia ta ˈu ia outou na . . . Aore hoi au i haama i te [parau apî maitai] no te mea, o te mana ïa o te Atua [no te ora].”—Roma 1:11-16; MN.
2 Te ite-faahou-hia ra teie huru hinaaro uˈana o Paulo i roto i teie faahaamanaˈoraa ta ˈna i te mau matahiapo no Ephesia: ‘Mai te mahana matamua mai â a tipae mai ai au i Asia nei ra, aita vau [“i tapea ia ˈu no” MN] te haapii ia outou i te vahi taata e i tera fare, i tera fare [“Ua poro faahope roa râ vau,” MN] i te ati Iuda e te Heleni.’ (Ohi. 20:18-21) Ua opua papu o Paulo e haaparare i te parau apî maitai o te ora i roto i te tuhaa fenua atoa tei horoahia ia ˈna, e ia noaa mai te mau hotu o te Basileia. Eita anei e tia ia tatou ia pee i taua huru feruriraa maitai roa ra?
3 E uiui anaˈe i teie mau uiraa: ‘Te vai ra anei ia ˈu iho taua hinaaro uˈana ra no te faaiteraa i te parau apî maitai i te feia e haaati ra ia ˈu? Ua riro noa anei te pororaa ei hopoia na ˈu, aore ra te hinaaro uˈana ra anei au i te faaite i te parau apî maitai i te rahiraa taata e nehenehe? Ua hiˈopoa anei au i to ˈu tupuraa i roto i te pure? Te faaohipa ra anei au i te mau ravea atoa ta te tuhaa fenua e pûpû ra, mai te pororaa na te mau fare, i roto i te aroâ, i te mau vahi tapihoo, na roto i te niuniu paraparau e na roto i te tahi ravea faanaho-ore-hia?’
4 Ia hinaaro uˈana tatou i te poro i te avaˈe Eperera: Te avaˈe Eperera, o te hoê ïa avaˈe tano no te faarahi atu â i to tatou apitiraa ˈtu i roto i te ohipa pororaa. E tauturu te faaitiraahia mai te mau hora e titauhia no te mau pionie e rave rahi atu â feia poro ia riro ei pionie tauturu. Tei te huru ïa o to outou tupuraa, e nehenehe râ paha outou e rave i te taviniraa pionie tauturu i te mau avaˈe Eperera e Me. Aore ra e faaô outou i rotopu i te mau anairaa pionie tamau i te mea hoi e no ratou atoa, ua faatitiaifarohia te mau hora. Mai te peu e e feia poro tatou, e nehenehe anei tatou e poro hau atu â i tei matauhia i te mau avaˈe Eperera e Me no te turu i te mau pionie? E faaoaoa ïa te reira i te mafatu o Iehova!
5 Mai te hiˈoraa o Paulo, e tia i te feia poro atoa i te Basileia ia faaite noa i te hoê hinaaro uˈana i te rave hau atu â i roto i te ohipa pororaa. Mai te peu e e horoa tatou ia au i te maraa ia tatou i roto i te taviniraa, e ite ïa tatou i te hoê oaoaraa mau. Ua fanaˈo o Paulo i taua oaoaraa ra i roto i ta ˈna taviniraa moˈa. No reira, e pee anaˈe i to ˈna hiˈoraa maitai roa.—Roma. 11:13; Kor. 1, 4:16.