E horoa anaˈe i te hoê faaiteraa rahi a fatata mai ai te hopea
1 E taime oaoa te auhune. E taime atoa te reira no te hoê ohipa teimaha, no te mea e ootihia te mau maa huero i te hoê taime poto e eita e tia i te mau taata rave ohipa ia faataere i te raveraa ohipa.
2 Ei auraa parau, ua faaau o Iesu i “te hopea o te faanahoraa o te mau mea” i te hoê auhune. (Mat. 13:39, MN) Te ora nei tatou i te hopea o te faanahoraa o te mau mea, e te toe ra maa taime rii no te horoa i te faaiteraa “e ati noa ˈˈe teie nei ao.” (Mat. 24:14) E tia ïa ia tatou ia apiti hau atu â i roto i te taviniraa a fatata mai ai te hopea. No te aha hoi? Te pahono ra Iesu e: “Te rahi mau nei te auhune, te iti nei râ te feia [“rave ohipa,” MN].”—Mat. 9:37, 38; Roma 12:11.
3 E ere teie te taime no te haaparuparu ia tatou: I to Iesu haamataraa i ta ˈna ohipa pororaa rahi, e toru matahiti e te afa noa ta ˈna e vai ra no te amo i ta ˈna hopoia. Ua poro oia ma te tapea i roto i te feruriraa e te ru ra te tau, i te mea e ua parau oia e: “E parau haere â vau i te parau [“apî,” MN] maitai o te basileia o te Atua . . . e tia ˈi, i tonohia mai ai hoi au.”—Luka 4:43.
4 Ua haapii o Iesu i ta ˈna mau pǐpǐ i te faufaaraa ia ohipa oioi. (Mar. 13:32-37) Ei haapapuraa, “e aore e mahana tuua ia ratou i te [“haapii e i te faaite i te parau apî maitai no nia i te Mesia ra o Iesu,” MN], i roto i te hiero, e i tera fare, i tera fare.” (Ohi. 5:42) Aita ratou i tuu i te mau ohipa faufaa rii i te parahiraa matamua. No reira, noa ˈtu e mea iti ratou, ua manuïa ratou i te pororaa i te parau apî maitai “i te taata atoa i raro aˈe i teie nei raˈi.”—Kol. 1:23.
5 Te vai ra ta tatou te tahi atu tumu no te atuatu i taua huru feruriraa ra i teie nei mahana: “Ua fatata . . . te hopea o te mau mea atoa nei.” (Pet. 1, 4:7) Oia mau, ua faataa Iehova i te mahana e te hora i reira e hope ai te faanahoraa o te mau mea. (Mat. 24:36) E oti te ohipa pororaa i roto i te taime e toe ra. No reira, ia tutava hau atu â ïa tatou no te faaite i te parau apî maitai i te rahiraa taata e nehenehe.
6 Ma te apiti hau atu â i roto i te ohipa faaiteraa a fatata mai ai te hopea, e oaoa tatou i te parauraa ˈtu ia Iehova i taua mau parau ra a Iesu: ‘Ua oti ia matou te ohipa ta oe i ho mai na matou e rave.’—Ioa. 17:4.