E poro e e horoa hua anaˈe i te faaiteraa
1 Ei “aratai, e ei faaau ture,” ua faaineine Iesu i ta ˈna mau pǐpǐ no te ohipa pororaa rahi e tiai maira ia ratou. (Isa. 55:4; Luka 10:1-12; Ohi. 1:8) Teie ta te aposetolo Petero i parau no nia i te ohipa ta Iesu i faaue ia ratou e rave: “Ua poroi iho oia ia matou e, e parau haere matou i te taata, e faaite hua ˈtu hoi e oia tei haapaohia e te Atua ei haava i tei ora e tei pohe.” (Ohi. 10:42) Eaha te auraa “e faaite hua ˈtu”?
2 Mea rahi te haapiiraa no nia i te reira i roto i te hiˈoraa o te aposetolo Paulo. I to ˈna farereiraa i te mau matahiapo o te amuiraa no Ephesia, teie ta ˈna i haamanaˈo ia ratou: “Aore roa aˈenei e mea e maitai ai outou na i vaiihohia e au; aita aˈenei i tuutuu i te aˈo atu ia outou, e te haapii ia outou i te vahi taata, e i tera fare, i tera fare, i te parau-onoono-maite-raa ˈtu i te ati Iuda e te Heleni, i te tatarahapa i te Atua, e te faaroo i to tatou Fatu ia Iesu Mesia.” Noa ˈtu te mau tamataraa, ua haa puai Paulo no te faaite i te parau apî maitai i te taata e rave rahi atu â. Aita noa oia i faaite i te pue parau mau tumu anaˈe i te feia e faaroo ra ia ˈna, ua tutava râ oia i te faaite atu i “te hinaaro atoa o te Atua.” No reira, ua ineine oia i te rave i te mau tutavaraa e te mau haapaeraa. Ua parau hoi oia e: ‘Aore au i nounou i to ˈu ora, mai te mea e e mea taoˈa ia ˈu iho, ia faaoti râ vau i to ˈu hororaa ma te oaoa, e te toroa i noaa ia ˈu i te Fatu ra ia Iesu, i te faaite hua ˈtu i te evanelia ra i te aroha o te Atua.’—Ohi. 20:20, 21, 24, 27.
3 E nafea ia pee ia Paulo i teie mahana? (Kor. 1, 11:1) Na roto ïa i te imiraa i te feia e au ia ratou te parau apî maitai, noa ˈtu e te farerei ra tatou atoa i te mau tamataraa, te tutavaraa i te faaite i te parau apî maitai i te feia no te mau opu taata e te mau reo atoa, e te faaitoitoraa i te atuatu i to ratou anaanatae. (Mat. 10:12, 13) E titauhia te taime, te tutavaraa, e te aroha i te taata-tupu.
4 E nehenehe anei outou e riro ei pionie tauturu? Te pûpû maira o Mati e o Eperera i te ravea e horoa hua ˈi i te faaiteraa ma te riro ei pionie tauturu. Mea faaitoito mau â te iteraa i te matahiti i mahemo e e rave rahi taeae e tuahine tei tutava taa ê i te rave i tera taviniraa.
5 Ua putapû te hoê tuahine e 80 matahiti mea rahi to ˈna maˈi, i te mau faaitoitoraa a te faanahonahoraa a Iehova. Teie ta ˈna i papai: “Ua faaaraara tera mau faaitoitoraa i te hinaaro i vai maoro i roto i to ˈu mafatu, e ua ite au e mea tia ia ˈu ia riro â ei pionie tauturu.” Ua faaoti oia i te na reira i Mati. “Na mua,” ta ˈna ïa e faataa ra, “ua taio vau i te mau haamâuˈaraa. Ua faaite atu vau i ta ˈu tamahine no te mea ua ite au e e hinaaro vau i ta ˈna tauturu. Ua maere au i to ˈna parauraa mai e e rave atoa oia i te taviniraa pionie tauturu.” I te roaraa o te avaˈe, ua rave tera tuahine ruhiruhia e 52 hora i roto i te taviniraa. “E rave rahi taime to ˈu pureraa ia Iehova ia horoa mai â i te puai a paruparu ai au. I te hopea avaˈe, ua oaoa e ua mauruuru roa vau, e ua haamauruuru pinepine au ia Iehova no ta ˈna tauturu. E hinaaro rahi to ˈu e tamata faahou i mua nei.” Papu roa e e faaitoito to ˈna tupuraa i te feia e hinaaro mau ra e riro ei pionie tauturu noa ˈtu to ratou maˈi.
6 Ua rave te hoê taeae, tei tihatihia ma te manaˈo-ore-hia, i te taviniraa pionie tauturu. A mairi ai te mau mahana, ua rahi noa ˈtu â to ˈna itoito i roto i te ohipa pororaa, e hou te hopea avaˈe, ua haamata oia i te hoê haapiiraa bibilia. A feruri ai oia, ua farii oia e e avaˈe faahiahia roa tera no ˈna. Ua oaoa mau â oia i te fanaˈoraa i te turu e te aratairaa a Iehova. Mai te peu e ua ninii Iehova i te mau haamaitairaa rahi i nia i tera taeae no ta ˈna mau tutavaraa i roto i te taviniraa, ia papu ia outou e e na reira atoa oia i nia ia outou.—Mal. 3:10.
7 E ere te riroraa ei pionie tauturu i te mea ohie no te feia poro e rave rahi. Noa ˈtu râ ta ratou mau hopoia i roto i te ao e te utuafare, e to ratou iho mau fifi, mea rahi te taeae e te tuahine i manuïa i te rave i tera taviniraa. E titau pinepine te horoa-hua-raa i te faaiteraa ia haapae tatou i te taime e te ito, aita râ e faaauraa to te mau haamaitairaa.—Mas. 10:22.
8 E mau avaˈe maitai roa o Mati e o Eperera no te riro ei pionie tauturu. E pae hopea hebedoma taatoa to Mati. Ma te faaohipa i na avaˈe e ma te poro i te ahiahi, e tia paha i te tahi mau taeae e tuahine e rave ra i te ohipa i te mahana taatoa, ia riro ei pionie tauturu. Hau atu â, e nehenehe e faaohipa i te mau mahana faaearaa ohipa no Eperera, aore ra te mau faaearaa haapiiraa e te mau mahana faafaaearaa ia raea na hora e 50 i titauhia i te mau pionie tauturu. A hiˈo e nehenehe anei outou e faaohipa hoê o te mau porotarama i roto i teie api hau ia rave outou e 50 hora i roto i te taviniraa i Mati aore ra i Eperera. A paraparau no nia i ta outou porotarama ia vetahi ê; mea papu e e faaitoito te reira i te tahi pae ia apiti atu ia outou no te poro. Mai te peu e eita e tia ia outou ia riro ei pionie tauturu, a haamau i te hoê fa taa maitai na outou no tera na avaˈe e piti, no te turu i te feia e rave i tera taviniraa. A faanaho ia outou i teie nei no te poro atu â i Mati e i Eperera.
9 A faaite i to outou mauruuru no te Oroa haamanaˈoraa: I te mau matahiti atoa, i te tau o te Oroa haamanaˈoraa, e turai te mauruuru no te hoo tau tausani taeae e tuahine ia “faaherehere maite i te taime” no te riro ei pionie tauturu. (Eph. 5:15, 16) I te matahiti i mahemo, i Porinetia Farani, ua tapaohia e 292 pionie tauturu i Mati e e 85 i Eperera, o te hoê ïa faito au noa 188 no na avaˈe e piti, ua hau aˈe teie numera i te faito au noa e 30 taata poro tei riro ei pionie tauturu i te mau avaˈe na mua ˈtu o te matahiti taviniraa. I teie matahiti, te pûpû mairâ te tau o te Oroa haamanaˈoraa i te hoê taime maitai e faaite ai i to tatou mauruuru mau no te tusia taraehara o te Mesia ma te apiti atu â i roto i te taviniraa.
10 A piri mai ai te 16 no Eperera, a feruriruri i te auraa o te Oroa haamanaˈoraa no outou. A feruri i te mau ohipa i tupu a pohe atu ai te Mesia e i ta ˈna mau manaˈonaˈoraa. A feruri atoa i te oaoa i tuuhia i mua ia ˈna e mea nafea te reira i te tautururaa ia ˈna ia faaoromai i te rave-ino-raa. A feruriruri i te ohipa ta ˈna e rave nei ei Upoo o te amuiraa, a tiaau ai oia i te pororaa e te ohipa faariroraa i te taata ei pǐpǐ. (Kor. 1, 11:3; Heb. 12:2; Apo. 14:14-16) E a faaite i to outou mauruuru no te mau mea atoa ta te Mesia i rave ma te rave hua i te ohipa pororaa, ia au i to outou huru tupuraa.
11 E faaitoito anaˈe ia vetahi ê ia horoa hua i te faaiteraa: Na roto i te raveraa i te taviniraa pionie tauturu e tia ˈi i te mau matahiapo e te mau tavini tauturu ia faaitoito ia vetahi ê. I roto i te pororaa e te mau farereiraa a te tiai mamoe, e nehenehe ratou e tauturu i te feia poro ia haa puai i te roaraa o tera tau ohipa taa ê. Ia feruri ïa tatou paatoa i roto i te pure i te ravea e riro ai ei pionie tauturu; e papu ïa ia tatou e e haamaitai Iehova i ta tatou mau tutavaraa amui no te horoa hua i te faaiteraa.
12 E turu te taatoaraa o te mau matahiapo e te mau tavini tauturu i te mau faanahoraa i ravehia e te amuiraa no te hoê ohipa rahi atu â i Mati e i Eperera, na te tiaau no te taviniraa iho â râ e haapao i te ohipa pororaa evanelia. E faataa oia i te mau mahana, te mau vahi, e te mau hora o te mau putuputuraa no te pororaa e tano i te rahiraa o te feia poro, e e haapao oia e ia haamanaˈo-noa-hia te reira. E nehenehe e faanaho i te mau putuputuraa i te mau hora taa ê o te mahana, ia nehenehe te mau melo atoa o te amuiraa e apiti i roto i te mau tuhaa rau o te faaiteraa, mai te pororaa i te feia tapihoo, i nia i te purumu, i tera i tera uputa, te mau farerei-faahou-raa e te faaiteraa na roto i te niuniu paraparau. Hau atu â, e hiˈo te tiaau no te taviniraa e ia navai maitai te papai, te vea e te tuhaa fenua i te roaraa o na avaˈe e piti.
13 E pûpû tatou i te buka Ite i Mati, ma te tutava i te haamata i te mau haapiiraa bibilia. Te vai ra te mau manaˈo tauturu e au ia faaohipahia no te pûpû i te buka Ite i roto i te api hau o Ta tatou taviniraa i te Basileia no Tenuare 2002. I Eperera, e pûpû tatou i na vea Te Pare Tiairaa e Réveillez-vous! A tutava i te faaohipa i te mau manaˈo tauturu no nia i te mau faaiteraa i roto i te tuhaa ra “E nafea ia pûpû i te mau vea.” No te horoa hua i te faaiteraa, e mea tia ia faaineine maitai tatou paatoa ia tatou.
14 Te oaoa mau nei tatou i te haaraa i raro aˈe i te aratairaa a te Upoo o te amuiraa, te Mesia ra o Iesu, e te fanaˈoraa i te haamaitairaa e faaite i te parau apî maitai ia vetahi ê. A fatata mai ai o Mati e o Eperera, e tutava faahou anaˈe i te faariro i na avaˈe e piti ei avaˈe taa ê mau i te pae o te pororaa e te horoa-hua-raa i te faaiteraa, mai ta te Mesia i faaue mai.
[Tumu parau tarenihia i te api 4]
Ravea rau no te riro ei pionie tauturu i Mati e i Eperera 2003
Mahana Hora
Monire 1 2 — — 2 —
Mahana piti 1 — 3 — — —
Mahana toru 1 2 — 5 — —
Mahana maha 1 — 3 — — —
Mahana pae 1 2 — — — —
Mahana maa 5 4 3 5 6 7
Tapati 2 2 3 2 2 3
Mati 56 56 54 55 50 50
Eperera 50 50 51 53 — —
E tano anei hoê o tera mau porotarama ia outou?