Te rave ra te mau tavini tauturu i te hoê taviniraa faufaa
1 “Ua faaite aˈena ratou e ua pûpû mau ratou ia ratou iho no te Atua. Ua faaite atoa ratou i to ratou faaroo na roto i te apitiraa ma te itoito i roto i te taviniraa o te Basileia e ma te tauturu i te tahi atu mau taata ia mau papu i roto i te faaroo.” O te parau ïa e faaitehia ra no te mau tavini tauturu i roto i te buka ra Organisés pour bien remplir notre ministère, i te api 56. Oia mau, mea tia iho â ia peehia te hiˈoraa ta te mau tavini tauturu e horoa ra i te pae varua. Ma te ohipa e o ratou e te mau matahiapo, te turu ra tatou e ‘ia tupu te tino i te rahiraa o to ˈna iho maitai ma te aroha.’—Eph. 4:16.
2 E tuhaa faufaa ta te mau tavini tauturu i roto i te amuiraa. A feruri na i te mau ohipa faufaa atoa ta ratou e rave ra: te haapao nei ratou i te mau faufaa, te mau buka, te mau vea, te mau tamatahitiraa e te mau tabula fenua; na ratou e haapao nei i te fariiraa, te haapurororaa e te tamâraa i te Piha no te Basileia. Te apiti ra ratou i roto i te Haapiiraa o te Taviniraa Teotaratia e te putuputuraa o te taviniraa. Te horoa nei vetahi o ratou i te tahi mau oreroraa parau huiraatira aore ra te faatere nei i te tahi mau putuputuraa a te amuiraa. Mai te mau melo o te tino, te rave ra te mau tavini tauturu i te tahi mau ohipa o ta tatou e hinaaro ra.—Kor. 1, 12:12-26.
3 Ma te ite i te mau tavini tauturu e ohipa ra ma te au e te mau matahiapo, mai te hoê tino, ma te faatura e te taaraa i te tahi e te tahi, te faaitoitohia nei te toea ia na reira atoa. (Kol. 2:19) Te turu ra ratou i te maitai pae varua o te amuiraa na roto i te amoraa i ta ratou hopoia i tera e tera hebedoma e te haapaoraa ia vetahi ê.
4 Nafea tatou e nehenehe ai e faaite i to tatou mauruuru i teie mau tavini tauturu o te ohipa ra ma te itoito? E tia ia tatou ia ite e eaha ta ratou mau hopoia taa ê e ia faaite e ua ineine tatou i te turu ia ratou ia ani anaˈe mai ratou. Na roto i ta tatou mau parau aore ra ta tatou mau ohipa, e nehenehe tatou e faaite e te au ra tatou i ta ratou ohipa. (Mas. 15:23) Mea tano iho â ia haamauruuru mau tatou i te feia e haa ra no tatou.—Tes. 1, 5:12, 13.
5 Na te Parau a te Atua e faataa i te tuhaa e te mau titauraa a te mau tavini tauturu. (Tim. 1, 3:8-10, 12, 13) Eita te amuiraa e nehenehe e haapae i ta ratou taviniraa moˈa faufaa. Mea tano iho â e ia faaitoito tamau tatou ia ratou, no te mea te ‘rave rahi’ nei ratou paatoa “i te ohipa a te Fatu.”—Kor. 1, 15:58.