Nafea ia tahoê maite e te utuafare—no te fanaˈo i te mau putuputuraa a te amuiraa
1 E tia i te mau utuafare Kerisetiano ia auraro i te faaueraa e haaputuputu i te mau putuputuraa a te amuiraa. (Heb. 10:24, 25) Maoti i te tahoê-maitai-raa, e nehenehe te taata taitahi e faaineine ia ˈna no te mau putuputuraa, e haere mai e e apiti atu. Mea taa ê te mau tupuraa o te mau utuafare, te vai nei râ te tahi mau ohipa ta te hoê tane Kerisetiano, ta te hoê vahine Kerisetiano aore ra ta te hoê taata e faaamu ra o ˈna anaˈe i ta ˈna mau tamarii e nehenehe e rave no te tahoê i te utuafare i te pae varua, noa ˈtu ehia rahiraa tamarii e to ratou faito matahiti.—Mas. 1:8.
2 Te raveraa i te taime no te faaineine: E tahoê maite te mau melo o te utuafare ia faaineine maitai te taata taitahi ia ˈna no te mau putuputuraa. Te tuatapapa amui nei e rave rahi i te Haapiiraa o Te Pare Tiairaa. Te faaineine nei vetahi i te Haapiiraa Buka aore ra te taioraa Bibilia tahebedoma e te utuafare. Te fa, o te haamanaˈoraa ïa i te mau manaˈo faufaa e vauvauhia i te putuputuraa hou a haere atu ai. I te na reiraraa, e fanaˈo hau atu â te taata taitahi i te mea ta ˈna e faaroo atu e e ineine oia i te apiti atu ia tae i te taime.—Tim. 1, 4:15.
3 Te faaotiraa no te apiti atu: E tia i te melo taitahi o te utuafare ia rave ei fa, te faˈiraa i to ˈna tiaturiraa na roto i te horoaraa i te mau pahonoraa i te mau putuputuraa. (Heb. 10:23) I roto i te utuafare, te hinaaro ra anei te hoê taata i te tauturu aore ra i te faaitoitoraa i roto i taua tuhaa ra? Teihea huru tauturu ta tatou e nehenehe e horoa ˈtu i te taata o te faaineine i te hoê tumu parau no te Haapiiraa o te Taviniraa Teotaratia? Mea au na te mau vahine ia faaite ta ratou tane i to ratou anaanatae na roto i te faahitiraa i te hoê faaauraa tano aore ra i te hoê tupuraa mau. Eiaha te mau metua e manaˈo e na ratou e faaineine i te mau tumu parau a te mau tamarii rii. Inaha, e nehenehe te reira e tapea i te mau tamarii i roto i ta ratou mau opuaraa. Area râ, e tauturu te mau metua ia ratou na roto i te faarooraa ia ratou ia faahiti faahou i ta ratou tumu parau ma te haapuai.—Eph. 6:4.
4 Te faanahoraa no te haere i te mau putuputuraa: E nehenehe tatou e haapii i te mau tamarii mai to ratou tamarii-rii-raa mai â ia faaahu e ia ineine ratou no te haere i te mau putuputuraa i te hoê hora faataahia. I roto i te utuafare, e tia i te taatoaraa ia apiti atu i roto i te mau ohipa utuafare ia ore ratou e maoro.—Hiˈo i te mau manaˈo neneihia i roto i te mau buka ra Oaoa i te utuafare, api 112, e Les jeunes s‘interrogent, mau api 316-317.
5 E nehenehe te mau metua e te mau tamarii atoa e feruri hohonu i nia i te mau parau a Iosua o tei na ô ra e: “Area vau e to ˈu atoa ra utuafare, e haamori ïa matou ia Iehova.” No reira ˈtura, e tia i te taata taitahi ia opua ma te papu i te tahoê maite e te utuafare no te fanaˈo i te mau putuputuraa a te amuiraa.—Ios. 24:15.