Pahonoraa i ta outou mau uiraa

◼ Mea tano faahou anei, ia au i te aniraa a te hoê melo o te tomite no te taviniraa a te amuiraa, ia haapii i te Bibilia e te hoê taeae aore ra te hoê tuahine toaruaru?

E hopoia na te mau matahiapo te haapaoraa i te mau melo o te amuiraa, e tae noa ˈtu te feia tei toaruaru. E haere ratou e farerei i teie feia e e feruri ratou i te tauturu tataitahi o ta teie feia e hiaai ra. I te tahi taime, mea tia iho â ia pûpûhia te hoê haapiiraa Bibilia i te taata toaruaru. Te faataa ra te buka ra Organisés pour bien remplir notre ministère, i te api 103 e, na te tomite no te taviniraa a te amuiraa e faaoti o vai te tauturuhia.

Na te tiaau no te taviniraa e hiˈo o vai te nehenehe e afai atu i ta ˈna tauturu, eaha te mau tumu parau e tuatapapahia e eaha te buka tano maitai. E riro paha ïa e o te taata poro o tei haapii i teie taata poro toaruaru aore ra te tahi atu taata ta ˈna i matau e i faatura, te nehenehe e tauturu atu ia ˈna. E nehenehe e ani i te hoê tuahine aravihi e te feruriraa paari ia tauturu i te hoê tuahine tei toaruaru. I te rahiraa o te taime, aita e faufaa ia apee te tahi atu taata poro i te taata faatere i te haapiiraa. I te taime e faaarahia ˈi te taata o tei maitihia no te faatere i te haapiiraa, e nehenehe o ˈna e taio i to ˈna taime, te mau hoˈi-faahou-raa e farerei e te haapiiraa.—Hiˈo Te taviniraa o te Basileia no Novema 1987, api 1-2.

I te mea hoi e, ua bapetizohia teie taata haapii, aita ïa e faufaa ia faatere i te haapiiraa i roto i te hoê area taime roa. Te fa, o te tautururaa ïa i tei toaruaru ia apiti faahou i te mau putuputuraa e ia riro faahou ei taata poro tamau i te parau apî maitai. Na te tiaau no te taviniraa e hiˈo mai te peu e ua haere te haapiiraa i mua. E tia i teie tauturu î i te here ia turai i teie mau taeae e teie mau tuahine ia amo i ta ratou mau hopoia i mua ia Iehova e ia ‘aahia e ia tumuhia’ ratou ma te papu i roto i te parau mau.—Eph. 3:17; Gal. 6:5.