E hinaaro vau i te hoê haapiiraa Bibilia!
1 E tano roa te rahiraa o tatou i te faaiteraa i te hinaaro e faatere i te hoê haapiiraa Bibilia. Inaha, e mea na reira e noaa ˈi ia tatou ta tatou tapao e faariro i te mau taata ei pǐpǐ. (Mat. 28:19, 20) Tera râ, no te rahiraa, e mau avaˈe, peneiaˈe e mau matahiti te mairi, e aitâ ratou e farerei atura i te oaoa taa ê e haapii i te parau mau i te hoê taata. Eaha ïa ta tatou e rave i te avaˈe Novema no te manuïa? I te mea hoi e te pûpû nei tatou i te buka ra Te ite, e tutava ïa tatou i te haamata i te mau haapiiraa Bibilia e teie buka.
2 E faaherehere anaˈe hoê aore ra e rave rahi hopea hebedoma: Te faaitoitohia ra te taatoaraa ia faaherehere i te taime i teie avaˈe no te maimi i te hoê haapiiraa Bibilia. E maiti te mau taeae faatere i te haapiiraa buka i te mau hopea hebedoma faanahohia no taua ohipa ra, e i muri iho, e rave ratou i te mau faanahoraa ia nehenehe te mau melo o ta ratou pǔpǔ e horoa i to ratou ara-maite-raa i nia i te mau hoˈi-faahou-raa e farerei.
3 E rave anaˈe i ta tatou mau nota no te mau hoˈi-faahou-raa e farerei ia tae i taua mau putuputuraa ra no te pororaa. I muri iho, e hoˈi anaˈe e farerei i te feia atoa o tei faaite i te anaanatae, o tei farii i te hoê papai aore ra o tei apiti i te mau putuputuraa. E rave anaˈe i te mau hoˈi-faahou-raa atoa e farerei ma te tapao e haamata i te hoê haapiiraa.
4 Faahiˈoraa o te hoê haapiiraa Bibilia: I roto i te mau faanahoraa no te pororaa faanahohia no taua ohipa ra, e ravehia te hoê faahiˈoraa faaineine-maitai-hia ei faaiteraa nafea ia haamata i te hoê haapiiraa i roto i te hoê hoˈi-faahou-raa e farerei. E nehenehe tatou e parau e: “E rave rahi mau taata e Bibilia ta ratou, aita râ ratou i ite e e pahono oia i te mau uiraa faufaa roa o ta tatou e uiui nei i roto i te oraraa. [E faaite anaˈe i te tabula tumu parau o te buka ra Te ite e e taio anaˈe i te mau upoo parau o te mau pene 3, 5, 6, 8 e 9.] Maoti i teie buka haapiiraa, e nehenehe e noaa ia oe te hoê ite tumu o te Bibilia i roto tau avaˈe noa, hoê hora i te hebedoma. Mai te peu e e hinaaro oe e maiti hoê o te mau tumu parau e vai ra, e oaoa roa ïa vau i te faaite atu ia oe i te tereraa o te reira.” Mai te peu e e haamarirau te hoê taata no te mea e rahi roa ta ˈna ohipa, e faataa ˈtu tatou ia ˈna e te pûpû atoa ra tatou i te hoê haapiiraa haapotohia. E pûpû anaˈe i te vea iti ra Titau e e titau anaˈe e tuatapapa i te hoê haapiiraa poto i te hebedoma i roto 15 e tae atu i te 30 minuti.
5 Ia tutava maite tatou i te haamata i te mau haapiiraa e ia pure tatou ia Iehova no te haamaitai ia tatou, papu maitai e e noaa ta tatou mau haapiiraa. (Ioa. 1, 5:14, 15) Mai te peu e e hinaaro tatou e faatere i te hoê haapiiraa Bibilia, teie te taime tano no te haamata hoê!