Te hoê tere farereiraa o te nehenehe e riro mai ei haamaitairaa
1 Ua farii o Zakaio ia Iesu ei manihini ma te oaoa. Ua riro râ taua farereiraa ra ei haamaitairaa mau.—Luka 19:2-9.
2 I teie mahana, ua titau Iesu Mesia, te Upoo o te amuiraa, i te mau matahiapo ia “faaamu i te nǎnǎ a te Atua.” (Pet. 1, 5:2, 3; Ioa. 21:15-17) Taa ê atu i te haapii i te mau putuputuraa e i te horoa i te hiˈoraa i roto i te ohipa pororaa, te horoa nei te mau matahiapo i te hoê tauturu tataitahi ma te here i te mau melo o te amuiraa. No reira, e nehenehe outou e fanaˈo, i te tahi taime, i ta ratou tauturu taa ê, i ǒ outou, aore ra i te Piha no te Basileia, aore ra ia poro anaˈe outou e o ratou, aore ra i te tahi atu â mau taime. E tia anei ia outou ia mǎtaˈu i taua mau tere farereiraa ra? Eita roa ˈtu. Ia haere anaˈe mai te mau matahiapo e farerei ia outou e ere ïa te auraa e te vai ra te hoê fifi. Eaha ïa te tapao o te hoê tere farereiraa a te tiai mamoe?
3 Ua parau Paulo e e hinaaro oia e farerei i te mau taeae “no te ite eaha to ratou huru.” (Ohi. 15:36, MN) E mau tiai mamoe î i te here te mau matahiapo, te tapitapi rahi nei ratou ia ite eaha to outou huru. Te hinaaro nei ratou e pûpû atu ia outou i te hoê tauturu pae varua faufaa e te anaanatae. Te hinaaro nei Iehova, te Tiai mamoe rahi î i te here, ia aupuruhia tatou tataitahi.—Ezek. 34:11.
4 E farii anaˈe i te tere farereiraa a te mau matahiapo: Ia haere anaˈe o Paulo e farerei i to ˈna mau taeae, e opua na oia i te ‘tuu atu i [“te ô pae,” MN] varua ia ratou, ia itoito ratou, e ia faaitoito te tahi e te tahi.’ (Roma 1:11, 12) E hinaaro tatou paatoa i te mau faaitoitoraa i te pae varua i teie anotau hopea fifi mau e e hinaaro tatou paatoa i te tauturu no te tapea papu i roto i te faaroo. No reira, e farii anaˈe ma te au i te mau tere farereiraa a te tiai mamoe; papu maitai ïa e faatupu mai te reira i te mau faaitoitoraa faahiahia mau no te tahi e te tahi.
5 E mauruuru anaˈe i te mau haamaitairaa e rave rahi o ta te ohipa a te tiai mamoe e horoa mai. Mai te peu e te haapeapea ra te hoê tumu parau aore ra te hoê uiraa ia tatou, e haamanaˈo anaˈe e te vai ra te mau matahiapo no te tauturu ia tatou. Eiaha tatou e haamarirau i te paraparau ia ratou i te mau mea atoa o te nehenehe e haafifi i to tatou oraora-maitai-raa i te pae varua. Ia faaite atoa tatou i to tatou mauruuru ia Iehova no taua faanahoraa î i te here ra e ia feruri tatou ma te oaoa i te mau haamaitairaa o te hoê tere farereiraa a te tiai mamoe.