E anaanatae anaˈe i te mau hoa faaipoipo e ere ratou i te Ite
1 E mea oaoa mau ia hiˈo i te mau taata faaipoipo tahoêhia i roto i te haamoriraa mau! Tera râ, i roto e rave rahi mau utuafare fetii, hoê anaˈe hoa faaipoipo o tei farii i te eˈa o te parau mau. E mea nafea tatou ia anaanatae i teie mau hoa faaipoipo e ere ratou i te Ite, e ia faaitoito ia ratou ia tavini ia Iehova na muri iho ia tatou?—Tim. 1, 2:1-4.
2 Ia taa ia tatou to ratou huru manaˈo: E parau mau e mea patoi iho â vetahi mau hoa faaipoipo e ere ratou i te Ite. Tera râ, o te tâuˈa-ore-raa e te mau peapea rii te tumu o te reira. E nehenehe te hoê taata e manaˈo e aita o ˈna e haapaohia ra aore ra e pohehae o ˈna i te mau faufaa apî i te pae varua a to ˈna hoa faaipoipo. “O vau anaˈe i te fare, mai te mea ra e ua faaruehia vau,” o ta te hoê ïa tane faaipoipo e haamanaˈo ra. “Mai te mea ra e ua faarue mai ta ˈu vahine e ta ˈu mau tamarii ia ˈu,” o ta te hoê atoa ïa tane e parau ra. E nehenehe te mau tane e manaˈo e e na te hoê haapaoraa e faataa ê ra ia ratou i to ratou utuafare fetii. (A hiˈo i Te Pare Tiairaa o te 15 no Atete 1990, api 20-23 [Farani].) No reira e mea tano aˈe, mai te peu iho â râ e e nehenehe, ia faaitoito i te tane ia apiti mai i te tauaparauraa ia haamata anaˈe ta ˈna vahine i te haapii i te Bibilia.
3 Ia tahoê i roto i te ohipa: Ua tauturu te hoê tane e ta ˈna vahine, e Ite hoi raua, i te mau hoa faaipoipo ia haere mai i roto i te parau mau na roto ïa i to raua tahoêraa i roto i te ohipa ma te aravihi. Ia haamau anaˈe te tuahine i te hoê haapiiraa e te vahine, e haere ïa te taeae e farerei i te tane. E mea pinepine, ua haamata atoa o ˈna i te haapii i te tane.
4 Ei huru auhoa to tatou e te au maitai: I roto i te amuiraa, e nehenehe te mau utuafare fetii e rave i ta ratou tuhaa na roto i te anaanataeraa ˈtu i te mau fetii aitâ i tahoê atura i roto i te haamoriraa mau. Na roto vetahi mau farereiraa auhoa, e ite ïa te hoa faaipoipo e ere o ˈna i te Ite, e feia mahanahana te mau Ite no Iehova, e e mau Kerisetiano aupuru ratou, e te hinaaro ra ratou ma te aau tae ia maitai atoa vetahi ê.
5 I te tahi mau taime, e nehenehe te mau matahiapo e hiˈo mai i te mau tutavaraa i ravehia aˈenei no te anaanatae atu i te mau hoa faaipoipo e ere ratou i te Ite, e eaha te tuhaa e nehenehe e haamaitaihia ia noaa mai ratou no Iehova.—Pet. 1, 3:1, nota, MN.