E tuhaa fenua rahi anei ta ta outou amuiraa?
1 Na te mau oire no Iudea e tae roa ˈtu i te mau mataeinaa no Galilea, ua rave o Iesu i te pororaa rahi i roto i te tuhaa fenua aano no Iseraela i tahito ra. (Mar. 1:38, 39; Luka 23:5) E tia atoa ia tatou ia paraparau no nia i te parau apî maitai i te mau taata e rave rahi roa ˈˈe. (Mar. 13:10) Teie râ, e ere i te mea ohie. No te aha?
2 Te vai ra te tahi mau amuiraa no Porinetia Farani e tuhaa fenua rahi ta ratou. Te tahi, ua faataahia ˈtu te mau motu no te faaite i te poroi o te parau mau. E nafea e tauturu ai i te mau taata e faaea ra i roto i te hoê tuhaa fenua rahi, ia haapii i te parau mau no nia ia Iehova, ia Iesu e i te Basileia?
3 A faanaho maitai ia outou: E titauhia te tiaau no te taviniraa e te taeae haapao tuhaa fenua ia faanaho i te mau tutavaraa a te amuiraa ia noaa mai te faahopearaa maitai roa ˈˈe. Peneiaˈe e faanahohia te tahi mau putuputuraa taa ê i te mau Mahana maa i reira te rahiraa o te feia poro e nehenehe ai e rave i taua ohipa ra i te mahana taatoa. Ia poro outou i roto i te mau tuhaa fenua atea, eaha e ore ai e faanaho e faaea maoro atu â i roto i te pororaa e e rave i te tahi maa no te avatea? E nehenehe outou e putuputu no te pororaa na mua ˈˈe i te hora i matauhia, e taime ïa to outou no te haere i roto i te tuhaa fenua, aore ra e faatupu i te putuputuraa no te pororaa i pihai iho i te vahi pororaa. A faaiti i te feia poro i roto i te pereoo taitahi ia navai te ohipa na te taatoaraa. A faanaho i te poro i te mau vahi atea i te mau tau mea maitai te huru o te reva e te purumu.
4 No te faaherehere i te taime faufaa, ei tapura fenua apî ta te mau taata e poro ra i roto i te mau tuhaa fenua atea. A faanaho ia outou e ia nehenehe te feia poro i roto i te tahi tuhaa fenua e farerei i te mau taata atoa i reira.
5 A ara i te afai e ia navai te mau papai. Mai te peu e e mea varavara ia porohia te tuhaa fenua, e mea maitai ia vaiiho i te hoê api parau aore ra i te hoê vea tahito i te mau fare aita e taata. Mai te peu e te vai ra te api parau ra E hinaaro anei outou e ite hau atu â no nia i te Bibilia? na roto i to outou reo, a pûpû atu i te mau taata atoa ta outou e farerei e a vaiiho i te mau fare aita e taata.
6 A haa amui: E titauhia ia haa amui te taatoaraa o te mau melo o te amuiraa no te poro i te hoê tuhaa fenua rahi. Mai te peu e e titauhia ia tere atea, e turu atu te mau horopatete i te aufauraa i te mori pereoo. A faaite i te feruriraa maitai ia farerei outou i te mau taata i ineine i te paraparau mai. Eiaha e moehia e e tia ia outou ia poro i te mau taata atoa o te tuhaa fenua, e a haamanaˈo i te tahi atu mau melo o te pǔpǔ e tiai ra ia outou. Mai te peu e e hinaaro outou e tamau i te paraparau maoro atu e te hoê taata, a rave e ia ore te pǔpǔ ia tiai noa mai.
7 A rave i te mau faanahoraa papu no te atuatu i te anaanatae. Taa ê atu i te vahi nohoraa, a imi e ia noaa mai te numera niuniu a te taata ia nehenehe outou e paraparau faahou ia ˈna e e atuatu i to ˈna anaanatae na roto i te niuniu paraparau. A papai maitai i te hoê hohoˈa aore ra te hoê faataaraa ia nehenehe outou e rave i te farerei-faahou-raa.
8 Auê ïa fanaˈoraa taa ê te haapaoraa i teie faaueraa a Iesu: “E te oire e te oire iti ta outou e tomo ra, e ui atu i to reira taata au.” (Mat. 10:11) Papu maitai e e haamaitai mai Iehova i ta outou mau tutavaraa e horoa ia outou iho i roto i tera ohipa hoona roa ˈˈe!