“E here anei te mau taata atoa i te tahi e te tahi?”
1 Ua fatata roa i te faaitehia na te ao atoa nei e na roto 169 reo, i te hoê poroi nehenehe roa o te faaitoito e o te tamahanahana. Eaha taua poroi ra? E mea nafea o ˈna ia afaihia?
2 E poroi faaite teie no nia i te here i te taata-tupu. Tei roto oia i Te parau apî o te Basileia n° 35, teie hoi to ˈna upoo parau: “E here anei te mau taata atoa i te tahi e te tahi?” E faaite poto noa mai teie Parau apî o te Basileia i te mau tupuraa i roto i teie nei ao, a faataa mai ai e, o te here ore o te taata te tumu o te oto e te mauiui e rave rahi. Te faaite atoa maira e no te aha, i teie mahana iho â râ, i iti ai te here i te taata-tupu e eaha te auraa o te reira no te tau a muri aˈe.
3 Hau atu, te faaite ra Te parau apî o te Basileia n° 35 e, te vai nei te here mau i te taata-tupu i rotopu i te mau mirioni taata e ora ra i teie nei i roto i te ao. Te faaite ra oia e, o vai te mau taata e faaohipa ra i te Kerisetianoraa matamua, oia te haamoriraa i ravehia na i te senekele matamua, e faatupu na hoi i te here i te taata-tupu mai ta Iesu Mesia i haapii na.—Luka 10:25-37.
4 E faaoti Te parau apî o te Basileia n° 35 na roto i te faaiteraa e, ua fatata te taime e faatupu ai te huitaata atoa i te here i te taata-tupu i raro aˈe i te faatereraa a te Basileia o te Atua, o tei horoahia i te Mesia. Te titau-manihini-hia nei te mau taata e taio atu i taua poroi ra, ia rave i te vea iti ra Eaha ta te Atua e titau ra ia tatou? e ia ite e mea nafea ia fanaˈo i te mau faanahoraa î i te here i faaitehia i roto i te Parau a te Atua.
5 Na vai e faaite i teie poroi? I te area o na avaˈe Atopa e Novema, e faaite te mau Ite no Iehova o te ao atoa nei i teie poroi o te here i te taata-tupu, i te mau taata matauhia e ratou, i te feia tapiri e i te mau melo o to ratou mau fetii. Te titau-manihini-hia nei te feia atoa e faaî ra i te mau titauraa, ia opere atoa i Te parau apî o te Basileia n° 35.
6 Te fa o teie opereraa, o te faaararaa ïa i te anaanatae o te taata no te hoê haapiiraa Bibilia i nia i te vea iti ra Titau aore ra te buka ra Te ite. Hau atu, e horoa te mau tutavaraa ta te tavini tataitahi o Iehova e rave ma te aau tae, i te faaiteraa rahi no nia i te Atua here ra o Iehova, e ta ˈna ra Tamaiti, o Iesu Mesia.