Eaha to tatou huru i mua i te tâuˈa-ore-raa?
1 Te tâuˈa-ore-raa, o te huru ïa o te hoê taata o te ore e putapû, e horuhoru, aore ra e anaanatae e e tapitapi noa ˈˈe. O te hoê teie o te mau huru e tupu pinepine roa ˈˈe e te fifi roa ˈˈe ia faaruru i roto i ta tatou taviniraa. Eaha to tatou huru i mua i te tâuˈa-ore-raa? No te reira aˈe, e haere mǎrû anei ta tatou taviniraa? Nafea tatou ia faaruru atu i te tâuˈa-ore-raa a te taata no te faaite ia ratou i te poroi o te Basileia?
2 Na mua ˈˈe, e imi tatou i te tumu o te tâuˈa-ore-raa a te taata i roto i ta tatou nei tuhaa fenua. Ua inoino anei ratou i te feia faatere i te pae politita e i te pae faaroo? Te manaˈo ra anei ratou e aita e ravea no te tatara i to ratou mau fifi? Te feaa ra anei ratou i te mau parau e tǎpǔ ra i te tahi mea maitai aˈe? Te patoi ra anei ratou i te tuatapapa i te mau mea i te pae varua, no te mea eita te mau maitai e noaa oioi mai e e fafahia ˈtu?
3 E haafaufaa anaˈe i te tiaturiraa o te Basileia: Aita e fifi ta te Basileia e ore e faatitiaifaro. No reira, ia nehenehe anaˈe, e faahiti tatou i te mau parau tǎpǔ a te Basileia na roto i te mau faaiteraa tumu a te Bibilia, noa ˈtu e eita paha e nehenehe e faaite i te hoê irava Bibilia. (Heb. 4:12) Oia mau, nafea tatou ia aratai i te parau i reira?
4 E mea tia ia ite te taata i te tumu o to tatou mau tere. Ia ite ratou e na te here i te taata-tupu e te anaanatae i te feia tapiri, e turai ra ia tatou ia haere e farerei ia ratou. E nehenehe tatou e ui atu ia ratou mai teie te huru: “Ia manaˈo oe, eaha te ravea no te [a faahiti i te hoê fifi o te fenua nei]?” Mai te peu e eita te hoê omuaraa parau e manuïa mai, a tamata i te tahi atu.
5 I te hoê vahi e faaeahia ra e te mau taata navai rahi e tâuˈa ore ra i te poroi o te Basileia, ua tutava na te mau taata poro i te imi i te hoê omuaraa parau o tei faaara i to ratou anaanatae. No te vauvau atu i te buka ra Te ite, ua tamata te hoê taeae e ta ˈna vahine i teie nei omuaraa parau: “I to oe manaˈoraa, i teie nei mahana, e mea faufaa anei te hoê haapiiraa maitai no te manuïa i roto i teie nei ao? E farii anei oe e te vai ra i roto i te haapiiraa taatoa te ite i te Bibilia?” I te reira avatea, ua vaiiho raua e toru buka, hoê na te hoê vahine o tei faaite mai i muri iho, e ua taio oia i te taatoaraa o te buka ra Te ite e ua farii atura o ˈna i te hoê haapiiraa Bibilia.
6 Ia farerei anaˈe tatou i te tâuˈa-ore-raa, e tamata anaˈe i te mau omuaraa parau huru rau, e horoa anaˈe i te mau uiraa o te haaferuri e e tiaturi anaˈe i te puai o te Parau a te Atua. Peneiaˈe e nehenehe tatou e tauturu i vetahi mau taata ia farii i te tiaturiraa faahiahia mau o te Basileia.