O vai to ˈu taata-tupu?

‘O VAI to ˈu taata-tupu?’ O te mau taata atoa ïa, oia hoi te taata e faaea ra i pihai iho i to ˈu fare. Te mau taata atoa e faaea ra i te purumu e haere i to ˈu fare aore ra na pihai iho i to ˈu fare. Tera to ˈu taata-tupu.”

E ere paha mai te reira te pahonoraa a te tahi mau taata no te tau o Iesu i taua uiraa ra. I roto iho ia ratou, te vai ra te mau manaˈo taa ê, mai teie e itehia nei i roto i te aparauraa a Iesu e te hoê taata haapii ture ati Iuda, tei papaihia i roto i te Luka 10:25-35:

“E te orometua, eaha vau e noaa ˈi te ora mure ore? te uiraa ïa a te haapii ture.

“Eaha tei papaihia i roto i te ture ra? te nahea ra ta oe taioraa? Ta Iesu ïa i parau atu.

“E hinaaro oe i to Atua ia Iehova ma to aau atoa e ma to varua atoa, e ma to puai atoa, e ma to manaˈo atoa ia hope, e aroha hoi oe i to taata-tupu mai to aroha ia oe iho na. Ta te haapii ture ïa i parau atu.

“Ua tia ta oe parau mai na, ta Iesu ïa i parau; e ora oe ia na reira.”

Aita râ te taata haapii ture i faaea noa i reira, inaha ua ani atu oia ia Iesu i teie uiraa e: “O vai hoi to ˈu taata-tupu?”

Aita roa i tano i te ture a Mose o ta ratou e faahua parau noa ra e te pee ra ratou i te reira, ua parau ihora te mau papai parau ati Iuda i roto i ta ratou mau peu paraparau noa e: “Faatura ˈtu i to taata-tupu e a riri atu i to enemi.” Mai te mau pharisea atoa, te haapii nei te mau papai parau e o te mau ati Iuda anaˈe e haapao nei i ta ratou mau peu matauhia tera to ratou taata-tupu. Te faariro nei ratou i te mau ati Iuda haapao ore e te mau Etene eiaha mai te taata-tupu, mai te hoê râ enemi o ta ratou e ore e nehenehe e tauturu, noa ˈtu e te fatata atura oia i te pohe. No te apiti atu i taua manaˈo ra, e no te hinaaro hoi i te faatia ia ˈna iho no te mea aita oia e aroha ra i te mau taata atoa, ua ui atu te haapii ture ia Iesu e: “O vai hoi to ˈu taata-tupu?”

No te pahono i taua uiraa ra, ua horoa Iesu i te hoê faahohoˈaraa no te taata Samaria. (Te faariro ra hoi te mau ati Iuda i te mau taata no Samaria mai te mau taata ěê e mea riri roa hoi na ratou.)

“Ua parau atura oia, Te hoê taata no Ierusalema i te haereraa i Ieriko, roohia ihora i te nǎnǎ eiâ haru, taratarahia ihora tana ahu e ratou, e paruparu ihora oia, haere atura, e faarue ihora ia ˈna, ua fatata i te pohe.” Ite atura te hoê tahuˈa ia ˈna, faahahau ê atura, na te tahi pae eˈa ˈtura i te haere. E ite atoa ˈtura te hoê ati Levi ia ˈna, ohipa ê atura na te tahi pae eˈa. “Te hoê taata râ no Samaria i haere noa i to ˈna haerea, e tae atura i taua vahi ra, e ite atura oia ia ˈna, aroha ˈtura.” Ua rapaau ihora oia i to ˈna mau pepe, e hopoi atura ia ˈna i roto i te hoê fare tipaeraa, aufau atura i te moni no te utuuturaa ia ˈna e ua parau atura i te fatu fare ia hoˈi mai au ei reira vau e aufau atu ai i te moni hau.

“O vai te te taata-tupu i to oe manaˈoraa i taua na taata tootoru ra, i te taata i roohia i te nǎnǎ eiâ haru ra?” ta Iesu ïa i ani atu i te haapii ture. Ua parau maira oia e: “O tei aroha ia ˈna ra.” Ua parau atura Iesu ia ˈna, “E haere oe, e na reira atoa.”

Te faariro nei te tahuˈa ia ˈna ei tavini no Iehova, mai te ati Levi atoa. Tera râ, ua faahahau ê raua toopiti atoa ra na te tahi pae eˈa, ma te ore roa e tapea. Aita raua toopiti atoa ra i hinaaro ia riro raua ei taata-tupu no te taata e hinaaro ra i te tauturu. Teie râ, noa ˈtu â ïa e eita oia e auhia e ua faaruehia oia na te tahuˈa e te ati Levi e na ta ˈna atoa haapaoraa, e manaˈo maitai râ to te taata no Samaria. Ua aroha roa oia i to ˈna iteraa i te huru o taua taata ra, e ua tauturu atu oia ia ˈna. Ua faariro mau oia ia ˈna ei taata-tupu no ˈna.

I teie mahana, o vai teie e faariro nei ia ˈna ei taata-tupu no vetahi?

I to tatou nei mau mahana, te faariro nei tatou i te mau taata atoa e ora ra i to tatou vahi ei taata-tupu no tatou. I te tahi aˈe pae, te auraa matamua no te parau heleni ra plêsion, tei tatarahia i te parau ra “taata-tupu”, oia hoi “fetii”. Area te Bibilia, i roto i te mau Papai hebera e i roto atoa i te mau Papai heleni, te faaohipa ra ïa oia i te parau taata-tupu i roto i te hoê auraa rahi roa ˈtu â.

I te tau o Iesu, te faariro ra te mau papai parau e te mau pharisea i te feia noa e haapao ra i te peu no ta ratou haapaoraa ei taata-tupu no ratou. E faaite ratou i to ratou aroha taata-tupu i nia noa i te feia no roto i ta ratou iho haapaoraa. Teie râ, ua faaaano Iehova e o Iesu i to raua aroha i nia i te mau taata atoa (Mataio 5:43-48). E e tia hoi i te mau kerisetiano mau ia rave i taua huru ra i teie mahana. Eiaha ratou ia riro ei kerisetiano no te iˈoa noa, e tia râ ia faaite e e taata-tupu ratou no te mau taata atoa, ia faaite i te aroha taata-tupu i nia i te taatoa.

Ua faariro te taata no Samaria ia ˈna ei taata-tupu no te taata i taparahihia e te nǎnǎ eiâ, ua haamata anei oia i te aroha i taua taata ra? Aita te faahohoˈaraa e parau ra i te reira, peneiaˈe e ua na reira oia. Inaha, i to ˈna haereraa mai i te fenua nei e i to ˈna horoaraa i to ˈna ora no te huitaata, ua faariro mau Iesu ia ˈna ei taata-tupu no te mau taata atoa. Ei faahoˈiraa, ua turaihia anei ratou e te manaˈo hohonu no te aroha e no te haafatata ˈtu i pihai iho ia ˈna? Te hinaaro mau ra anei ratou e haere atu i te Atua ra no te aroha o ta ˈna i faaite i te huitaata na roto i te tonoraa mai i ta ˈna Tamaiti i nia i te fenua nei no te horoa ia ˈna iho ei hoo? E, e rave rahi tei faaite i taua huru ra i to tatou nei mau mahana, e rave rahi atoa tei noaa ia ratou taua aroha ra i te tau tahito. “Te [aroha] nei tatou ia ˈna no te mea oia na tei [aroha] mai ia tatou nei.” — Ioane 1, 4:19; Ioane 3:16; Iakobo 4:8.

Mea nafea taua mau taata ra i te faaiteraa i to ratou aroha? E ere mea na roto i te parau-noa-raa e “E te Fatu, e te Fatu”, na roto râ i te haapaoraa i te hinaaro o te Atua, ma te faaite i to ratou taata-tupu i te parau no te Basileia o Iehova (Mataio 7:21; Ioane 1, 5:3; Isaia 43:10-12; Ohipa 1:8). O te tauturu hoê roa te reira e te faahiahia e te vai tamau o te nehenehe e hopoi atu na te mau taata atoa tei mauiui i te mau rahiraa ati o to tatou nei mau mahana. Te feia, tei pee i te hiˈoraa o te taata no Samaria, tei aroha na roto i te iteraa i te huitaata maˈi e tei haamataˈuhia e te haamouraa e te poro nei ratou i te parau apî maitai haumarû o te Basileia o Iehova, te faaite ra ïa ratou e e taata-tupu ratou no te mau taata atoa. Aita ratou e haapae nei hoê aˈe: tane aore ra vahine, taurearea aore ra ruau, feia moni aore ra feia veve, noa ˈtu e eaha to ˈna nunaa, to ˈna huru iri aore ra ta ˈna haapaoraa, e faariro ratou ia ˈna ei taata-tupu no ratou tei hinaaro i te ite i te parau apî maitai o te Basileia.

No to ratou here i to ratou taata-tupu, te pee nei te mau Ite no Iehova e rave rahi matahiti atura i te faaueraa i faaitehia i roto i te Ephesia 4:25 e na ô ra: “Ei parau mau ta te taata atoa ia parau atu i te tahi.” E rave rahi mirioni taata tei farii i te parau mau e te poro nei ratou i teie parau mau. Oia hoi te parau mau no nia i te Basileia o Iehova arataihia e te Arii no te hau, o Iesu Mesia. E nehenehe taua parau mau ra e aratai i te mau taata ia ora ma te hau. Te mea faahiahia ˈtu â, e nehenehe e noaa ia ratou “te hau a te Atua, o tei hau ê atu i te ite taata nei” — Philipi 4:7.