E faaite anaˈe ia vetahi ê i Te ravea e itehia ˈi te oaoa i te utuafare
1 O te utuafare te niu o te totaiete taata nei, oia te pu e tupu mai ai te mau oire iti, te mau oire rarahi, te mau hau e te mau nunaa taatoa. I teie mahana, te faaruru nei te utuafare i te mau fifi mai tei ore i itehia aˈenei na mua ˈˈe. Te haamǎtaˈu nei te mau mana puai i te vai-mau-raa o te oraraa utuafare. Auê tatou i te mauruuru ia Iehova e, oia te Tumu o te utuafare, i to ˈna haapiiraa mai ia tatou ia fanaˈo tatou i te oaoa i roto i te utuafare! Te feia e faaohipa nei i ta ˈna mau aˈoraa, te ite nei ïa ratou e e iti mai te mau fifi e e tahoêhia te utuafare. I teie avaˈe Setepa, te oaoa nei tatou i te opereraa i te buka ra Te ravea e itehia ˈi te oaoa i te utuafare. E haere anaˈe e paraparau i te taata no nia i te oraraa utuafare. Ia faahoa ˈtu tatou, ia faaite tatou i te feruriraa oaoa e te ite maite, e tia ˈi. Eaha ta tatou e nehenehe e parau?
2 E nehenehe tatou e faahiti i teie huru uiraa:
◼ “Ua tapao anei oe e e rave rahi mau utuafare e mea fifi no ratou ia faaruru i te mau hepoheporaa o te oraraa? [A vaiiho i te taata ia pahono.] E au ra e e rave rahi mau taata o te fifi nei i roto i to ratou utuafare. I to oe manaˈoraa, eaha te nehenehe e tauturu i te mau utuafare ia vai papu aˈe e ia oaoa aˈe? [A vaiiho i te taata ia pahono.] I te mea e, o te Atua te Tumu o te utuafare, e ere anei i te mea maitai ia hiˈopoa i ta ˈna mau aˈoraa i roto i teie nei tuhaa? [A taio i te Timoteo 2, 3:16, 17.] Te vauvauhia ra teie nei haapiiraa no to tatou hoi maitai, i roto i teie nei buka, Te ravea e itehia ˈi te oaoa i te utuafare.” A ani atu i te taata e, no ˈna, eaha te tahi fifi matauhia, e a faaite atu i te hoê pene o te tuatapapa ra i te reira, e a pûpû atu i te buka.
3 I te hoˈi-faahou-raa e farerei, no te mea e ta tatou fa, o te haamataraa ïa i te hoê haapiiraa Bibilia, e nehenehe tatou e parau e:
◼ “Ua feruri au i ta oe parau no nia i te oraraa utuafare, e ua afai mai au i te tahi vea iti o ta oe e anaanatae. [A faaite i te vea iti ra Titau, a iriti i te api 16 e a taio i na uiraa e ono i nia roa i te api.] Mea papu maitai e e tia i te melo tataitahi o te utuafare ia rave i ta ˈna tuhaa ia itehia te oaoa i roto i te utuafare. Mai te peu e e tau minuti ta oe, e nehenehe vau e faaite ia oe e nafea tatou e faufaahia ˈi i te parauhia ra i ǒ nei.” A haamata i te tuatapapa i te haapiiraa 8.
4 Te tahi atu ravea no te haamata i te hoê aparauraa, o te faahitiraa ïa i te hoê fifi, peneiaˈe i te na ôraa ˈtu e:
◼ “Noa ˈtu e te hinaaro nei te taata atoa e fanaˈo i te mauruuru e te oaoaraa, e au ra e aita e rave rahi mau utuafare e manuïa ra. I to oe manaˈoraa, eaha te mea e nehenehe e tauturu ia ratou ia ite i te oaoa mau? [A vaiiho i te taata ia pahono.] I mutaa ihora, ua faaite te Bibilia e eaha te mau fifi e farereihia e te mau utuafare i teie mahana. [A taio i te Timoteo 2, 3:1-3.] Teie râ, te faataa atoa ra te Bibilia i te mau utuafare e eaha te tia ia rave no te faatitiaifaro i to ratou mau fifi e no te fanaˈo i te oaoa vai maoro. Te faaitehia ra te reira i roto i teie buka, Te ravea e itehia ˈi te oaoa i te utuafare.” I muri iho, a huti i te ara-maite-raa o te taata i nia i te mau uiraa faahaamanaˈoraa i te hopea o te hoê pene e tano, a taio, e a pûpû atu i te buka.
5 I te hoˈi-faahou-raa e farerei, a faaohipa i te vea iti ra “Titau” no te haamata i te hoê haapiiraa. E nehenehe tatou e parau atu e:
◼ “Ua oaoa roa vau i to oe hinaaroraa e hiˈopoa i te mau faaueraa tumu a te Bibilia no nia i te oraraa utuafare. Ua itehia mai e e nehenehe e fanaˈo i te mau faahopearaa faahiahia na roto i te peeraa i te mau aˈoraa maitatai roa a te Bibilia. Teie te tumu i faataahia ma te ohie roa.” A taio i te paratarapha matamua o te haapiiraa 1 i roto i te vea iti ra Titau, e te Salamo 1:1-3 atoa aore ra te Isaia 48:17, 18. Mai te peu e e nehenehe, a faaoti roa i te haapiiraa. A ani atu e e hoˈi mai outou no te tauaparau no nia i te haapiiraa i muri iho.
6 Na te mau fare aore ra na nia i te aroâ, e nehenehe tatou e tamata i te haamata i te hoê aparauraa e te api parau iti ra “A fanaˈo i te hoê oraraa utuafare oaoa.” E nehenehe tatou e ani e:
◼ “Ua î te oraraa i teie nei tau i te peapea, tera râ, ia manaˈo anaˈe oe, e nehenehe anei e fanaˈo i te hoê oraraa utuafare oaoa? [A vaiiho i te taata ia pahono.] Te na ô ra teie api parau iti e, oia. E hinaaro anei oe e taio?” Mai te peu e e farii te taata, e nehenehe tatou e parau i muri iho e: “I te mea e te anaanatae nei oe i teie tumu parau, peneiaˈe e oaoa atoa oe i te taioraa i teie buka, o te horoa nei i te mau aˈoraa papu no nia i te ravea e itehia ˈi te oaoa i roto i te utuafare fetii.” A faaite i te tabula tumu parau o te buka ra Te oaoa i te utuafare. A haamatara i te tahi mau pene te faaara nei to ratou upoo parau i te anaanatae. A iriti i te buka i te api 10 e a taio i te pereota hopea o te par. 17 e te par. 18 taatoa. A pûpû atu i te buka. A faataa ˈtu i te taata e e nehenehe tatou e faahohonu atu â i teie tumu parau e a ani atu e afea tatou e nehenehe ai e hoˈi mai e hiˈo ia ˈna.
7 E nehenehe tatou e faahohonu atu â i te aparauraa na mua ˈtu no nia i te oraraa utuafare oaoa, ma te parau atu e:
◼ “Te hinaaro nei au e huti i to oe ara-maite-raa i nia i te hoê manaˈo i roto i te buka o ta ˈu i vaiiho mai; ua papu ia ˈu e e anaanatae oe. Te tuatapapa ra te pene hopea i te ravea e itehia ˈi te oaoa i te utuafare. [A taio i te par. 2 i te api 183.] Te ite ra oe e, te taviri o te oaoa, o te rave-amui-raa ïa i te hinaaro o te Atua. Te faaitoito nei matou i te mau taata ia haapii i te Bibilia i roto i to ratou utuafare, no te ite i te hinaaro o te Atua e no te faaohipa atu i roto i te utuafare. Te pûpû nei matou i te hoê haapiiraa Bibilia tamoni ore, te tahi tau avaˈe noa te maoro. Mai te peu e e faatia oe, e nehenehe au e faaite atu ia oe e nafea teie haapiiraa e ravehia ˈi.” A hoˈi atu e te vea iti ra Eaha ta te Atua e titau ra ia tatou? aore ra e te buka ra Te ite, na tatou e maiti eaha te tano maitai aˈe.
8 E tutava anaˈe i te faaite ia vetahi ê i te ravea e noaa ˈi te oaoa i roto i te utuafare: te auraroraa i te mau faaueraa e vauvauhia ra i roto i te Parau a te Atua.—Sal. 19:7-10.