Te mau haapiiraa Bibilia o te faariro i te taata ei pǐpǐ
1 “Eaha te mea e ore e tia ˈi ia bapetizo ia ˈu?” o ta te eunuka no Etiopia ïa i ani atu ia Philipa tei faaite ia ˈna i “te parau [“apî maitai,” MN] no Iesu.” (Ohi. 8:27-39) Ua here aˈena te eunuka i te mau papai faauruahia mai e te Atua e, i muri iho i to ˈna fariiraa i te tauturu i te pae varua a Philipa, ua ineine oia i te riro mai ei pǐpǐ. Tera râ, aita te mau taata atoa e papu ra e e tia ia ratou iho ia tuatapapa i te mau Papai.
2 Auaa râ hoi, ua horoa mai te faanahonahoraa a Iehova i te hoê vea iti apî, oia E buka no te mau taata atoa (Farani), o te titau manihini ra i te mau taata ia hiˈopoa i te poroi a te Bibilia no to tatou nei tau. E huti mai teie vea iti i te mau taata aau rotahi, peneiaˈe e mea ite ratou, no nia râ i te Bibilia, aita ïa ratou i ite aˈe. Na teie mauhaa maitai roa e horoa ia ratou i te hinaaro ia tuatapapa i teie nei buka.
3 Ia faatere tatou i te hoê haapiiraa Bibilia, e mea faufaa ia hiˈopoa faahou tatou i te mau manaˈo maitatai roa i neneihia i roto i te api hau o Te taviniraa o te Basileia o te avaˈe Tiunu 1996, o tei faaite hoi e mea nafea ia faatere i te mau haapiiraa faahotu na roto i te buka ra Te ite. I te taime e haapiihia ˈi te hoê taata, e hiˈo maitai mai tatou i ta ˈna mau haereraa i mua, ia ite tatou e eaha te mau tuhaa te tia ia haapao maitai atu. A faaitoito ia ˈna ia faaineine na mua ˈˈe, e ia taio i te mau irava Bibilia. E nehenehe ta ˈna mau pahonoraa na roto i ta ˈna mau parau iho, e faaite mai i te hohonuraa o to ˈna mauruuru no te parau mau. I te tanoraa mau, te mau taata o te taio i vetahi atu mau buka a te Taiete e o te haere tamau mai i te mau putuputuraa, e haere oioi noa ïa ratou i mua. E faaitoito anaˈe i taua taata ra ia parau ia vetahi ê i ta ˈna e haapii ra. Ma te maitai, a faaite atu i te tia ia ˈna ia rave no te haere i mua i te pae varua. Eiaha tatou e haapii maoro i te mau taata papu ore te manaˈo. E tia i te mau taata e haapiihia ra ia hinaaro mau i te haapii, ia rave i te hoê tiaraa papu no te parau mau, e ia haere i mua no te pûpû atu ia ratou i te Atua na roto i te bapetizo.
4 I roto i vetahi mau utuafare fetii, ua hau atu i te hoê haapiiraa Bibilia, no te mea e rave rahi mau melo e faataa ê ra i ta ratou mau haapiiraa. Tera râ, i te rahiraa o te taime, e mea tano aˈe ia faatere i te hoê haapiiraa Bibilia fetii, e tahoê hoi te reira i te utuafare i te pae varua.
5 Ua faaue mai o Iesu ia tatou ia faariro i te taata ei pǐpǐ. (Mat. 28:19) No te na reiraraa, e tia ia tatou ia faatere i te mau haapiiraa Bibilia o te turai i te taata ia haere i mua ia tae roa ˈtu i te parau e: “Eaha te mea e ore e tia ˈi ia bapetizo ia ˈu?”