Te poro nei te mau Kerisetiano ruhiruhia ma te tuutuu ore
1 Hau atu â te taata i te paariraa, hau atu â ratou i te manaˈo i te faatuhaaraa e fanaˈo atu ai i te hoê oraraa fifi ore i te mau matahiti e toe ra. Peneiaˈe te manaˈo ra ratou e, i ohipa rahi roa na ratou, e teie nei, e tia ia faafaaea rii; aore ra ia rearea maite i te toea o to ratou oraraa.—Luka 12:19.
2 O tatou nei tei pûpû ia tatou no Iehova no te tavini ia ˈna, mea taa ê ta tatou huru hiˈoraa. Ua ite tatou e aita e faatuhaaraa i roto i te taviniraa a te Atua. E hiˈoraa maitai râ to tatou no nia i te oraraa, no te mea te tapea nei tatou “te ora mure ore” i roto i te reni tapao. (Iuda 21) I te roaraa o te mau matahiti i haerehia mai no te haaputu i te ite e te aravihi, na te reira e faarahi te ite maite e te maramarama o te hoê taata, faariro mai ai ia ˈna ei taata paari aˈe e te aifaito aˈe, e nehenehe hoi ia ˈna ia haafaufaa rahi atu i te oraraa nei. E mea faufaa roa teie mau huru maitatai atoa no te hoê taata poro i te parau apî maitai.
3 E ere te rahiraa o te mau matahiti i to te pae tino anaˈe. E ô atoa mai te pae feruriraa. O tei hinaaro e ora maoro atu ma te tutava ia tapea i te feruriraa apî i roto i to ˈna hiˈoraa i te mau mea, e faarahi te reira i te manuïa. E nehenehe te mau Kerisetiano ruhiruhia e haamaitai i to ratou oraraa ma te faarahi i to ratou ite pae varua e ma te faaite atu.—Kor. 1, 9:23.
4 Tupuraa farereihia: Ua parau te hoê tuahine e 86 matahiti to ˈna e: “Ia feruri anaˈe au i na matahiti e 60 i haerehia mai e au i roto i te parau mau, te oaoa nei to ˈu mafatu i te parau tǎpǔ tamahanahana ta te Atua i horoa mai na tatou. Oia mau, e taiva ore Iehova i te taata taiva ore, ia nehenehe tatou ia ooti i te oaoa rahi mau.” (Sal. 18:25) I te poheraa ta ˈna vahine, ua oto rahi te hoê taeae ruhiruhia e fifi rahi atura to ˈna oraora-maitai-raa. Ua parau oia: “Maoti te aroha faito ore o Iehova, ua huru maitai rii mai au no te rave i te taviniraa pionie e piti matahiti i muri iho. Te haamauruuru nei au ia Iehova, no te mea ua itoitohia vau i te pae tino na roto i te faarahiraa te pororaa.”
5 E mea faahiahia mau ia hiˈo atu i teie mau taeae e tuahine ruhiruhia e tamau nei i te poro, ma te tuutuu ore, i roto i te faito o to ratou oraora-maitai-raa e to ratou puai! E nehenehe ratou ma te tano roa e rave i teie piiraa: “Na oe, e tau Atua, i haapii mai ia ˈu mai to ˈu apîraa mai â; e ua faaite au i ta oe ra mau ohipa umerehia e tae roa aˈenei i teie nei.”—Sal. 71:17.