No te aha ratou e na reira ˈi?
1 No nia i te Mesia, ua tohuhia mai e ‘e riro roa oia i te itoito i te fare o te Atua.’ (Sal. 69:9) Ua turai te itoito o Iesu no te haamoriraa mau a Iehova, ia ˈna ia tuu i ta ˈna taviniraa i nia i te parahiraa matamua. (Luka 4:43; Ioa. 18:37) I to tatou nei tau, te faaite nei te mau Ite no Iehova i roto i ta ratou taviniraa i te hoê â manaˈo itoito ia poro i te parau mau. I te matahiti i mairi aˈenei, i roto i te faito au noa, e 645 509 feia poro o tei ohipa i te mau avaˈe atoa i roto i tera aore ra tera tuhaa o te taviniraa pionie. I te mea e ua pûpû tatou ia tatou iho no te Atua, e tia ia tatou paatoa ia hiˈopoa i roto i te pure mai te peu e e nehenehe anei ta tatou e faanahonaho ia tatou no te riro ei pionie tauturu aore ra tamau.—Sal. 110:3; Koh. 12:1; Roma 12:1.
2 Te ora nei tatou i roto i te faanahoraa o te mau mea miimii e te nounou taoˈa; e mea fifi roa no te mau taata e rave rahi ia taa e no te aha vetahi e tutava ˈi i roto i te taviniraa inaha, aita hoê aˈe moni apî aore ra e hanahana e noaa mai. No te aha ïa te mau pionie e na reira ˈi? Ua ite ratou e te tutava nei ratou i roto i te hoê ohipa faaora. Turaihia e te hoê here hohonu no Iehova e no to ratou taata-tupu, te ite nei ratou i te hopoia e horoa i ta ratou tauturu no te faaora i te taata. (Roma 1:14-16; Tim. 1, 2:4; 4:16) Ua faataa poto maitai mai te hoê tane e ta ˈna vahine e pionie raua, i te huru tupuraa: “No te aha mâua i riro ai ei pionie? Te vai ra anei te hoê tumu faufaa aˈe ta mâua ia horoa ˈtu i te Atua ra ahiri e ere mâua i te pionie?”
3 Ua faahiti te tahi atu tuahine i ta ˈna faaotiraa e rave i te taviniraa pionie: “Ua faanaho . . . mâua ta ˈu tane i te ora i nia i te hoê anaˈe moni ohipa, oia hoi te auraa, e haapae i te mau taoˈa faufaa ore. Teie râ, ua haamaitai rahi mai Iehova ia matou, ma te ore e vaiiho ia matou i roto i te veve aore ra i te ereraa. . . . Ua itea mai ia ˈu te tumu mau no te oraraa—te tautururaa i te feia e erehia ra ia ite e aita Iehova, te Atua mau, i atea roa i te feia o te imi ia ˈna.” No te mea e ua ite ratou e te poto nei te taime, te mauruuru nei te mau pionie i te mau mea faufaa roa ˈˈe no te ora, ma te haapue i te mau taoˈa faufaa mau i te pae varua e vai e a muri noa ˈtu.—Tim. 1, 6:8, 18, 19.
4 Mai te peu e e nehenehe ta outou, no te aha ïa e ore ai e apiti atu i roto i te mau hanere tausani taeae e tuahine e tavini nei ei pionie na te ao nei? E fanaˈo atoa ïa outou i to ratou oaoa.