E tauturu anaˈe i te feia ite ore ia maramarama
1 Na roto i te ohipa faariroraa i te taata ei pǐpǐ, te haapii nei tatou i te tahi atu mau taata i te mea ta te Atua e titau ra ia ratou. (Mat. 28:19, 20) I roto i teie nei tuhaa, hau atu i te pae mirioni Ite o te rave nei i te hoê ohipa rahi mau na te ao atoa nei. Eita te manuïaraa e taiohia na nia i te rahiraa o te mau hora, o te mau buka e te mau vea e operehia, aore ra o te mau haapiiraa Bibilia e haamatahia. E naeahia ia tatou i ta tatou fa, ia maramarama anaˈe te taata, e ia ohipa ratou ia au i te mea o ta ratou i haapii.
2 No te tauturu ia ratou i te pae varua, e tia ‘ia noaa te maramarama i te taata ite ore ra.’ (Sal. 119:130) E putapû to ratou mafatu e e turaihia ratou ia ohipa, mai te peu noa e e ‘ite ratou i te auraa.’ (Mat. 15:10, MN) A haere noa ˈi ta tatou ohipa i te rahi e i te puairaa, e taa papu aˈe ia tatou i te faufaaraa ia faaohie i ta tatou mau parau e i ta tatou haapiiraa. No reira te Taiete i nenei ai i te vea iti ra Eaha ta te Atua e titau ra ia tatou? Te vauvau nei oia i te hoê tuatapaparaa taatoa no nia i te mau haapiiraa tumu a te Bibilia. Mea potopoto te mau haapiiraa, e mea ohie te mau parau, e mea ohie atoa ia taa i te auraa o te haapiiraa e horoahia ra, no reira, e tano teie vea iti no te rahiraa o te taata.
3 I te mau avaˈe Eperera e Me, e pûpû tatou i teie nei vea iti, taa ê atu i te mau vea. Ia faanahonaho tatou ia tatou no ta tatou hebedoma pororaa, te faaitoitohia nei tatou ia faaineine no te pûpû i te mau vea i te mahana maa, e i te vea iti i te toea o te hebedoma. E pûpû anaˈe i teie vea iti na te feia i farii aˈena i te mau buka aore ra i te mau vea na mua ˈˈe. E tia ia tatou ia haamanaˈo e e tano maitai teie vea iti no te haapii i te mau tamarii, i te mau taata reo ê e i te mau taata e fifi nei i te taio.
4 E paraparau anaˈe i te taata ma te ohie: Ia pûpû anaˈe tatou i te vea iti ra Titau, e nehenehe tatou e rave i te api 2 i reira te faataahia ra e “ua faaineinehia teie vea iti ei tauturu no te haapii i te Bibilia.” E huti na mua tatou i te ara-maite-raa o te taata i nia i te paratarapha 3, i te api 3, no te faaite ia ˈna e no te aha oia e hiaai ai i te haapii i te Bibilia. E faaara tatou i to ˈna anaanatae na roto i te upoo parau o te tahi mau haapiiraa e vauvau ra i te mau parau mau ohie roa a te Bibilia. E faaite atu tatou ia ˈna e mea au roa te haapiiraa i nia i teie vea iti, e e pûpû atu tatou e tauturu ia ˈna.
5 E faatere anaˈe i te hoê haapiiraa ma te haere mǎrû noa i mua: Ta tatou fa, e ere noa ïa i te faatereraa i te mau haapiiraa, te hinaaro atoa nei râ tatou e faariro i te taata ei pǐpǐ o te riro mai ei feia paruru itoito i te haamoriraa mau. E nehenehe te vea iti e haapiihia i roto i te tahi tau hebedoma, e i muri iho, e faahaerehia ˈtu te haapiiraa i nia i te buka ra Te ite. (Hiˈo i te nota i raro i te api 31.) I te omuaraa ra iho, e tauturu anaˈe i te taata haapii ia ite i te faanahonahoraa a Iehova. (Hiˈo i te buka ra Comment raisonner, api 273-4.) E tuu anaˈe i te tapao i nia i te faufaaraa o te mau putuputuraa a te amuiraa, e e faataa anaˈe e ia haere tatou i teie mau putuputuraa, i reira ïa e matara mai ai e nafea ia rave i te haamoriraa viivii ore.—Heb. 10:24, 25.
6 Papu maitai e, mai te peu e e apiti rahi atu tatou i roto i teie ohipa taa ê i te mau avaˈe Eperera e Me, e oaoa ïa tatou i te tautururaa ˈtu i te mau taata aau haavare ore ‘ia noaa te maramarama’ e aratai i te ora.—Mas. 4:5, MN.