Te amuihia maira te mau nahoa taata rahi
1 Mai i te senekele matamua ra, te ite nei te amuiraa kerisetiano i teie mahana, i te hoê maraaraa faahiahia mau. (Ohi. 2:41; 4:4) I te matahiti i mairi aˈenei, e 366 579 mau pǐpǐ apî o tei bapetizohia, oia hoi te faito au noa 1 000 tiahapa bapetizoraa i te mahana hoê! Hau atu i te hoê mirioni taata o tei bapetizohia i roto i na matahiti e toru i mairi aˈenei. Oia mau, te amui noa maira o Iehova i te mau nahoa rahi o te feia faaroo.—Ohi. 5:14.
2 E rave rahi feia apî, o tei ore i matau maitai i te huru oraraa kerisetiano, o te hinaaro nei i te tauturu e i te haapiiraa a te feia tei puai i roto i te faaroo. (Roma 15:1) I rotopu i te mau Kerisetiano matamua, aita vetahi i manuïa i ‘te haere â i mua i te paari mau ra,’ noa ˈtu e e rave rahi matahiti i muri aˈe i to ratou bapetizoraahia. (Heb. 5:12; 6:1) No reira o Paulo i haapapu ai, i roto i ta ˈna rata i to Hebera, i te mau tuhaa i reira e tia ˈi i te mau Kerisetiano ia haere i mua i te pae varua. Eaha taua mau tuhaa ra, e eaha te tauturu e nehenehe e horoahia?
3 Te noaaraa mai i te mau peu maitatai i te pae no te haapiiraa: Ia au i te haapiiraa a Paulo, no te riro ei taata haapii maitai, e tia ia haapii ma te faaohipa, ia hiˈopoa faahou i te mea i haapiihia, e ia faaohipa i “te maa etaeta” ta te faanahonahoraa a Iehova e horoa maira. (Heb. 5:13, 14; hiˈo Te Pare Tiairaa o te 15 no Atete 1993, api 12-17.) Ia tauaparau tatou e te feia apî no nia i te mau tumu parau pae varua, e ia tufa ˈtu tatou na ratou i te mau taoˈa faufaa o te parau mau o tei itea mai ia tatou na roto i ta tatou haapiiraa tataitahi, e horoa ˈtu ïa tatou i te hinaaro e noaa mai i te mau peu maitatai i te pae no te haapiiraa. I tera e tera taime, e nehenehe paha tatou e titau manihini i te hoê taata apî, ia apiti mai i roto i ta tatou haapiiraa tataitahi aore ra i ta tatou haapiiraa utuafare.
4 Te haere-tamau-raa i te mau putuputuraa: E tauturu to tatou hiˈoraa haapao maitai e ta tatou mau parau faaitoito faahitihia ma te here, i te mau melo apî o te amuiraa ia vai ara noa i roto i te tahi atu tuhaa ta Paulo i faahiti: ta te tahi pae ra “peu” e mairi i te mau putuputuraa kerisetiano. (Heb. 10:24, 25) E tauturu anaˈe ia ratou ia ite e ua riro te mau putuputuraa ei ravea taairaa pae varua i rotopu ia ratou e te amuiraa. E imi anaˈe i te ravea ia ite ratou e e mea farii-popou-hia ratou i rotopu i te mau taeae.
5 Te paraparauraa ˈtu ia Iehova ma te tiaturi: No te faaruru i te mau paruparu o te tino e to tatou mau huru tia ore, e tia ia tatou ia imi i te tauturu a Iehova na roto i te pure, ma te faaite atu i to tatou mau manaˈo e to tatou mau tapitapiraa hohonu roa ˈˈe. E tia i te mau taata apî ia haapii e, ia taparu anaˈe ratou ia Iehova e tauturu mai ia ratou, mai ta Paulo e faaue ra ia tatou, eiaha ratou ia faarue. (Heb. 4:15, 16; 10:22) Ia faatia tatou i te mea o ta tatou iho i ite i roto i teie nei tuhaa, e haapaari ïa tatou i to ratou tiaturi e te faaroo nei o Iehova i te mau pure no roto mai i te mafatu.
6 Te faaherehereraa i te taime no te taviniraa: Ua faaite atoa o Paulo e, na roto i ‘te pûpûraa i te tusia ra i te haamaitai i te Atua, eiaha e tuutuu,’ e haapuai tatou ia tatou iho i te pae varua. (Heb. 13:15) E nehenehe anei ta tatou e ani i te hoê taata poro apî, ia apiti mai ia tatou i roto i ta tatou porotarama pororaa no te hebedoma? Peneiaˈe e nehenehe tatou e faaineine e o ˈna no te faaite i te poroi aore ra e hiˈopoa i te hoê tuhaa o te taviniraa o ta ˈna i ore â i tamata.
7 Te tupu nei te oaoa rahi ia amuihia mai te mau nahoa taata rahi. Ia tutava tatou no te haapii e no te faaitoito i te mau melo apî o te amuiraa, e tauturu ïa tatou ia ratou ia patu i te hoê faaroo puai, e mea titauhia hoi “e ora ˈtu ai te [“nephe,” MN].”—Heb. 3:12, 13; 10:39.