Te tufa ra anei tatou i te Parau a te Atua ma te tia?
1 O Iesu Mesia te orometua rahi roa ˈˈe i ora aˈenei i nia i te fenua nei. Ua faahiti oia i te parau ia putapû te mafatu o te taata, ia araara to ratou mau manaˈo hohonu e ua faaitoito oia ia ratou ia rave i te mau ohipa maitatai. (Mat. 7:28, 29) Ua niu noa oia i ta ˈna haapiiraa i nia i te Parau a te Atua. (Luka 24:44, 45) Ua faatae oia i te hanahana i te Atua ra o Iehova no te mau mea atoa o ta ˈna i ite e o ta ˈna i nehenehe e haapii i te taata. (Ioa. 7:16) Ua vaiiho mai o Iesu i te hoê hiˈoraa maitai roa no ta ˈna mau pǐpǐ na roto i ta ˈna huru tufaraa i te Parau a te Atua ma te tia.—Tim. 2, 2:15.
2 Ua riro atoa te aposetolo Paulo ei hiˈoraa faahiahia i te pae no te tufa-maitai-raa i te Parau a te Atua. Aita oia i taio noa i te mau Papai i mua i te taata; ua tatara râ oia i ta ˈna i taio e ua haaferuri oia i nia i te reira, ma te haapapu na roto i te Parau a te Atua e o Iesu te Mesia. (Ohi. 17:2-4) Oia atoa, o Apolo, pǐpǐ orero aravihi, e taata “ite oia i te mau Papai”; ua tufa oia i te reira ma te tia, e ua vauvau oia i te parau mau ma te puai.—Ohi. 18:24, 28, MN.
3 Ia haapii tatou i te Parau a te Atua i te taata: I teie tau, te ite nei te feia poro o te Basileia i te mau faahopearaa maitatai roa ia haapii anaˈe ratou i te mau taata aau haavare ore na roto i te haaferuriraa ia au i te Bibilia e ma te faaohipa i te reira ei faahororaa. Ua faaohipa te hoê taeae i te Ezekiela 18:4 e te mau irava tapiri no te haaferuri i te hoê orometua e e toru taata no ta ˈna paroita no nia i te hopearaa o te feia iino e te feia maitatai. I muri iho, ua haamata ˈtura te tahi mau melo Ekalesia i te haapii, e ua farii hoê i te parau mau. I te tahi atu taime, ua ani te hoê vahine farii maitai i te hoê tuahine ia faataa ˈtu i ta ˈna tane patoi e no te aha te mau Ite no Iehova e ore ai e faatupu i te oroa Noela e te mau oroa mahana fanauraa. Ua taio te tuahine i roto i te buka ra Comment raisonner i te mau irava e haamaramarama ra i teie tumu parau, e ua farii teie nei taata. No to ˈna oaoa rahi i to ˈna farii-maitai-raa, ua parau atura ta ˈna vahine e: “E haere mâua i ta outou mau putuputuraa.” E ua farii te tane!
4 E faaohipa anaˈe i te tauturu e horoahia maira: Te horoa mai nei Te taviniraa o te Basileia e te porotarama o te putuputuraa no te taviniraa i te mau aˈoraa maitatai roa no te tauturu ia tatou ia tufa i te Parau a te Atua. E rave rahi feia poro o tei faaite i to ratou mauruuru no te mau faaiteraa huru rau i neneihia e i vauvauhia mai no tatou, tei riro ei mea tano roa e mea aravihi atoa. Mea rahi te mau manaˈo i roto i te buka ra Comment raisonner à partir des Écritures e faaite ra nafea ia tufa ma te tia hau atu i te mau 70 tumu parau faufaa no nia i te Parau a te Atua. Ua riro te buka ra Te ite e aratai i te ora mure ore ei haapotoraa no te mau haapiiraa Bibilia tumu atoa te tia i te feia apî ia maramarama. Te faaite ra te mau haapiiraa 24 e 25 o te Buka no te Haapiiraa o te taviniraa teotaratia nafea te feia aravihi o te haapii i te taata ia faaomua, ia taio e ia faaohipa i te mau irava Bibilia ma te au. E tia ia tatou ia faaohipa maitai i teie mau ravea atoa i horoahia mai na tatou.
5 Ia tufa tatou i te Parau a te Atua ma te tia, i reira tatou e ite ai e “mea ora [oia], e te puai rahi, . . . e te hiˈopoa hoi i te manaˈo e te opua o te aau” o te feia o ta tatou e poro nei. (Heb. 4:12) No te mau faahopearaa e noaa mai ia faaohipa anaˈe tatou i te Parau a te Atua, e turaihia tatou ia faaite hau atu â i te parau mau ma te mǎtaˈu ore!—Ohi. 4:31.