E faaineine anaˈe i ta tatou iho faaiteraa i te mau vea
1 Mea au roa na tatou Te Pare Tiairaa e te A ara mai na! no ta raua mau tumu parau tano maitai o te haapii nei ia tatou, o te tuatapapa nei i te mau huru tumu parau atoa, mai te mau tumu parau no teie nei tau e tae atu i “te mau mea hohonu atoa a te Atua ra.” (Kor. 1, 2:10) Te haamanaˈo ra tatou pauroa i te mau mea apî e te faaitoito e rave rahi, o ta tatou i taio i roto i teie nau vea, o ta Iehova e faaohipa nei no te faataa mǎrû noa mai i te parau mau. (Mas. 4:18) E te hinaaro mau nei tatou e opere rahi atu i teie mau vea.
2 Ia hiˈopoa maitai tatou i ta tatou tuhaa fenua: Eaha te huru o te mau taata e faaea ra i to tatou vahi? Mai te peu e e mea ohipa roa te taata, peneiaˈe e tano ia faaineine tatou i te hoê faaiteraa poto noa o te faataa oioi i to tatou tere. Teie râ, mai te peu e mea rahi aˈe to ratou taime, e nehenehe paha ïa tatou e faaroa ˈtu â. I te vahi e te rave nei te taata i te ohipa i te mahana taatoa, e manuïa aˈe paha tatou mai te peu e e haere tatou e hiˈo ia ratou i te hopea avatea aore ra i te omuaraa o te ahiahi. I te mahana ra, e nehenehe tatou e farerei i te tahi mau taata na roto i te pororaa na te mau aroâ aore ra na te mau fare toa. Te fanaˈo nei vetahi feia poro i te mau faahopearaa maitatai na roto i te paraparauraa i te taata i te mau vahi vaiihoraa pereoo e te mau mahora huiraatira.
3 Ia ite maitai tatou eaha to roto i ta tatou mau vea: A taio i te vea tataitahi ia tae anaˈe mai. A maiti i te mau tumu parau o ta tatou i ite e e anaanataehia te taata o ta tatou tuhaa fenua. Eaha te mau tumu parau e haapeapea ra ia ratou? I roto i te tumu parau ta tatou e opua ra e haamatara, a imi i te hoê vahi papu maitai o ta tatou e nehenehe e faahiti. A imi i te hoê uiraa o te faaara i te anaanatae o te taata. A maiti i te hoê irava e tano o ta tatou e taio atu mai te peu e e nehenehe. E oia atoa, a feruri e mea nafea tatou ia faaineine i te hoê hoˈi-faahou-raa e farerei.
4 Ia faaineine tatou i ta tatou mau parau faaomuaraa: A maiti maitai i te mau parau matamua o ta tatou e faahiti ei faaiteraa i to tatou tere e no te haamata i te aparauraa. Te fanaˈo nei vetahi i te mau faahopearaa maitatai na roto i te parauraa e: “Ua taio vau i te hoê tumu parau anaanatae roa i roto i teie nei vea, e te hinaaro nei au e faaite i te reira i te tahi atu mau taata.” E rave rahi o te haamata nei na roto i te hoê uiraa o te aratai i te aparauraa i nia i te manaˈo o ta ratou i opua e vauvau. Ei hiˈoraa:
5 Mai te peu e e faaite tatou i te hoê tumu parau no nia i te maraaraa o te ohipa ino, e nehenehe tatou e ani e:
◼ “Eaha tei titauhia ia nehenehe tatou e taoto ma te peapea ore, ma te ore e mǎtaˈu e ia eiâhia aore ra ia rave-ino-hia mai tatou?” A faaite atu e te vai ra te mau haamaramaramaraa e faataa ra i te hoê ravea no teie fifi, e fatata roa e hope atoa te mau fifi totiale atoa. A faahiti i te hoê vahi i roto i te vea o te faataa ra i te tumu no te tiaturi e e tupu teie tauiraa. Ia hoˈi atu outou, e nehenehe outou e huti i te ara-maite-raa o te taata i nia i te pene 1 o te buka ra Te ite.
6 Ia faaite tatou i te hoê tumu parau no nia i te oraraa utuafare, e nehenehe tatou e parau e:
◼ “Te farii nei te rahiraa o te mau metua e e ere i te mea ohie ia haapao i te hoê utuafare i teie nei tau. Mea rahi te mau buka i papaihia no nia i teie tumu parau, tera râ, aita te feia aravihi iho e afaro ra. Te vai ra anei te hoê taata o te nehenehe e horoa mai i te mau aˈoraa aravihi?” A faahiti i te hoê vahi i roto i te vea e faaite ra e eaha te mau aˈoraa paari e vai ra i roto i te Bibilia. Ia hoˈi atu tatou e farerei i te taata, e tauaparau anaˈe no nia i te mau manaˈo Bibilia e faataa ra i te haapiiraa i te mau tamarii i te mau api 145-8 o te buka ra Te ite.
7 No te faaite i te hoê tumu parau no nia i te hoê fifi totiale, e nehenehe tatou e parau e:
◼ “E rave rahi taata o te hepohepo nei no te tau ahoaho o ta tatou e ora nei. Ia manaˈo anaˈe oe, ua opua anei te Atua e ia ora tatou mai teie te huru?” A faaite atu i te hoê tumu parau e faataa ra e nafea ia faatitiaifaro i te mau fifi no teie nei tau aore ra e horoa ra i te mau tumu no te tiai i te tau i mua nei aita e ahoaho faahou. I te farereiraa i muri iho, a tauaparau no nia i te hohoˈa e to ˈna tatararaa i te mau api 4-5 o te buka ra Te ite, e a haamata roa i te hoê haapiiraa Bibilia.
8 Ia ite tatou i te faatano ia tatou i te taata: Mea taa ê te huru oraraa o te mau taata o ta tatou e farerei nei e e mea taa ê atoa to ratou mau anaanataeraa. A faaineine i te hoê faaiteraa matamua o ta tatou e faatano i muri iho ia au i te taata tataitahi. A feruri atea i ta tatou e parau atu i te hoê tane, i te hoê vahine, i te hoê taata ruhiruhia aore ra i te hoê taurearea. Aita e ture e faahepohia ra. A faaohipa i te mau faaiteraa o ta tatou i matau maitai e o te manuïa nei. I roto i te mau tupuraa atoa, a faaite i te aau tae, a paraparau ma to tatou mafatu atoa e a faaroo atu i te taata. Te feia “e haerea fariihia” to ratou, e ite ïa ratou i to tatou huru haavare ore e e farii maitai mai ratou.—Ohi. 13:48, MN.
9 Ia tauturu tatou i te tahi e te tahi: Na roto i te tufaraa i te mau manaˈo e o vetahi ê, e nehenehe tatou e haamaitai atu â i ta tatou huru paraparauraa. E rahi atu to tatou ite e to tatou tiaturi ia faaineine tatou i ta tatou mau faaiteraa e to tatou mau hoa. (Mas. 27:17) E mea ohie aˈe ïa no tatou i mua i te taata. E mea faufaa roa ia rave te mau metua i te taime no te tauturu i ta raua mau tamarii ia faaineine ia ratou, ia faaroo raua ia faahiti anaˈe ratou i ta ratou faaiteraa e ia horoa ˈtu raua i te mau aˈoraa no te haamaitai atu â. Area te feia apî ra, e faufaa-rahi-hia ratou i te pororaa na muri iho i te mau taata poro aravihi aˈe.
10 E ere i te mea fifi roa ia faaineine i ta tatou iho faaiteraa i te mau vea. Ia feruri noa tatou i te tahi parau papu maitai e ia faaite atu ma te au. Ma te aau itoito e te ite-oioi-raa, e nehenehe tatou e faaineine i te hoê faaiteraa maitai roa o te farii-popou-hia mai e te taata.
11 Ua riro te opereraa i te mau vea ei hoê o te mau ravea faufaa roa no te haaparare i te poroi o te Basileia na te ao nei. Mai te peu e e nehenehe ta tatou e tuu i Te Pare Tiairaa e te A ara mai na! i roto i te rima o te feia aau haavare ore, na te mau vea iho e paraparau. Ia haamanaˈo noa tatou i to ratou faufaaraa, e e nehenehe te poroi i roto e faaora i te taata. E oaoa roa o Iehova i teie huru “hamani maitai, e te horoa” na vetahi ê.—Heb. 13:16.