E ohipa tei faauehia mai ia tatou
1 Ua ani o Iesu i te feia e pee mai ia ˈna ia “faariro i te mau fenua atoa ei pǐpǐ.” (Mat. 28:19) Ua riro na hau atu i te pae mirioni feia haamori i te Atua ra o Iehova ei haapapuraa ora e te tupu ra teie faaueraa i roto e 232 mau fenua e mau motu. E o tatou iho nei? Te haafaufaa ra anei tatou i te ohipa pororaa i faauehia mai ia tatou?
2 E hopoia morare: Te hoê ohipa faauehia, o te hoê ïa “hopoia e horoahia i te hoê taata no te haere e rave i te hoê mea.” Ua faaue mai te Mesia ia tatou ia haere e poro. (Ohi. 10:42) Ua papu i te aposetolo Paulo e, na roto i teie faaueraa, ua faahepohia i nia ia ˈna te titauraa, aore ra te hopoia morare, e faaite haere i te parau apî maitai. (Kor. 1, 9:16) E rave anaˈe i te hoê hiˈoraa: A feruri na e e matero outou i nia i te hoê pahi e tomo ra. E faaue mai te raatira pahi ia outou ia faaara i te mau horopatete e ia aratai ia ratou i te mau poti faaora. E haafaufaa ore anei outou i teie faaueraa e e imi noa anei outou i te ravea no te faaora ia outou iho? Eita ïa. Tei roto te ora o te tahi atu mau taata i to outou rima. E nehenehe hoi ratou e pohe. E hopoia morare na outou te raveraa i te ohipa i faauehia mai ia outou oia hoi te tautururaa ia ratou.
3 Ua horoahia mai na tatou te hoê ohipa i faauehia e te Atua e faatae i te hoê faaararaa. Fatata roa o Iehova i te haamou i te taatoaraa o teie faanahoraa o te mau mea ino. Aita i papuhia e e pohe aore ra e ora anei te mau mirioni taata. E tano anei ia ore roa tatou e tâuˈa i te ati e vai nei i mua i to tatou mau taata-tupu, tera râ, e haapao noa tatou i to tatou iho ora? Eita ïa. E hopoia morare na tatou te tautururaa i to tatou taata-tupu ia ora atoa mai oia.—Tim. 1, 4:16.
4 Te mau hiˈoraa haapao maitai te tia ia pee: Ua taa i te peropheta ra o Ezekiela i ta ˈna hopoia e tufa i te poroi faaararaa na te mau ati Iseraela taiva. Ua faaara maitai hoi o Iehova ia ˈna i te ohipa e tupu ahiri e eita oia e amo i ta ˈna hopoia: “Ia parau hoi au i te taata parau ino ra, E pohe mau oe, e aore oe i aˈo atu ia ˈna, . . . e pohe atu taua taata parau ino ra i ta ˈna ra hara; e titau maira vau i te hoo i to ˈna toto ia oe ra.” (Ezek. 3:18) Ua haapao maitai o Ezekiela i te ohipa i faauehia mai ia ˈna, noa ˈtu te patoiraa uˈana. No reira, ua oaoa oia i te tupuraa te mau haavaraa a Iehova.
5 Tau senekele i muri iho, ua faahiti te aposetolo Paulo i ta ˈna hopoia e poro. Teie ta ˈna i parau: “Aore roa o ˈu viivii i te toto o te taata atoa nei. Aore roa aˈenei hoi au i huna, ua faaite hua ˈtu hoi au ia outou i te hinaaro atoa o te Atua.” Ua poro o Paulo i mua i te taata e na te mau fare no te mea ua papu ia ˈna e ia ore oia e haapao i roto i teie tuhaa, e utua toto ïa ta ˈna i mua i te aro o te Atua.—Ohi. 20:20, 26, 27.
6 E itoito anei to tatou mai to Ezekiela ra? Hoê â anei to tatou hinaaro e poro mai to Paulo ra? Hoê â ohipa tei faauehia mai ia tatou. E tia ia tatou ia tamau noa i te amo i ta tatou hopoia e faaara i to tatou mau taata-tupu noa ˈtu to ratou faatau, to ratou tâuˈa ore e te patoiraa. E nehenehe â te mau tausani taata e farii mai i te poroi o te Basileia ma te parau e: “E haere atoa matou i ǒ na: ite aˈenei matou e, tei ia outou te Atua.” (Zek. 8:23) Ia turai to tatou here no te Atua e no to tatou taata-tupu ia tatou e tia ˈi, ia ore tatou e faarue! E ohipa tei faauehia mai ia tatou: e poro!