A tufa maitai i te Parau a te Atua
1 I to ˈna pororaa i te hoê taata toroa, “ua parau maite atura to Philipa vaha, na [te hoê] parau i papaihia ra, i te parau no Iesu.” (Ohi. 8:35) ‘Ua tufa [maitai]’ Philipa “i te parau mau ra.” (Tim. 2, 2:15; MN) Teie râ, i teie mahana, ua tapao te mau tiaau ratere e mea varavara te mau taata poro e rave rahi i te faaohipa i te Bibilia ia poro ratou. Te faaohipa ra anei outou i te Bibilia i roto i ta outou taviniraa?
2 No roto mai te mau mea atoa ta tatou e tiaturi ra e ta tatou e haapii ra i te Parau a te Atua. (Tim. 2, 3:16, 17) Na ˈna e faatae i te taata ia Iehova ra e e haapii ia ratou no te ora. No reira ˈtura e mea faufaa ia faaohipa i te Bibilia i roto i ta tatou taviniraa eiaha râ ia aparau noa no nia i te mau tumu parau ta tatou iho e anaanatae. (Heb. 4:12) No te mea mea iti te ite o te rahiraa o te taata i te Bibilia, e tia ia tatou ia taio atu no te faaite ia ratou i te mau aˈoraa e au ia faaohipahia e vai ra i roto, oia atoa te oraraa no a muri aˈe ta ˈna e pûpû ra na te huitaata.
3 A taio roa ˈtu i roto i te Bibilia: E tamata paha outou i te tia ˈtu i mua i te opani ma te pute ore. E nehenehe outou e tuu i te papai ta outou i maiti no te pûpû atu i roto i te hoê vairaa papie mea huru rairai e e tapea i ta outou Bibilia i roto i to outou rima aore ra e tuu i roto i to outou pute ahu. I muri aˈe, ia haamata outou i te aparau atu i te hoê taata, e nehenehe outou e tatara mai i ta outou Bibilia ma te ore oia e manaˈo e te hinaaro nei outou e vauvau i te hoê oreroraa parau. A tia ˈtu i pihai i te taata ia nehenehe oia e pee i te taioraa i roto i te Bibilia. No te aha e ore ai e ani ia ˈna ia taio mai i te hoê irava ma te reo puai? E putapû atu â oia ia ite oia eaha ta te Bibilia e parau ra eiaha râ ia faaroo atu oia na roto i to outou noa vaha. Parau mau, a haafaufaa i te mau taˈo e manaˈo faufaa to roto no te tauturu ia ˈna ia taa i te manaˈo o teie irava.
4 Faaiteraa ma te hoê irava bibilia: I muri aˈe i te faaiteraa o vai outou, e nehenehe outou e parau e: “Te fariu nei te taata i nia i te mau aveia e rave rau no te aratai i to ratou oraraa. Ia manaˈo oe, ihea e itehia ˈi te mau aˈoraa maitai roa ˈˈe e au ia faaohipahia? [A faaroo i te pahonoraa.] Eaha to oe manaˈo no nia i teie faahitiraa? [A taio i te Maseli 2:6, 7, e a vaiiho i te taata ia pahono.] Te mea peapea, te ite ra tatou e ua taotia-roa-hia te paari o te taata, e no reira ˈtura, mea rahi te taata tei ere i te tiaturiraa. Area te paari o te Atua ra, ua riro noa iho â ei mea maitai, e te nehenehe e tiaturihia.” I muri aˈe, a faaite i te papai ta outou i opua e pûpû atu, e a haamahitihiti i te hoê hiˈoraa o te paari o te Atua e au ia faaohipahia.
5 Ua faaohipa Iesu i te mau Papai no te tauturu i te feia mafatu haavare ore o to ˈna tau. (Luka 24:32) Ua na reira atoa Paulo no te haapapuraa i ta ˈna mau haapiiraa. (Ohi. 17:2, 3) E rahi atu â tatou i te tiaturi e i te oaoa i roto i te taviniraa a aravihi noa ˈtu â ˈi tatou i te faaohipa i te Parau a te Atua.