Te mahana tairururaa taa ê apî
1 “Feia haapiihia e Iehova.” Teie ïa te upoo parau o te mau mahana tairururaa apî e haamata i te avaˈe Setepa. (Ioa. 6:45) Te tauturu mau ra te haapiiraa a Iehova ia tatou ia ora i te hoê oraraa oaoa. Te faatupu nei te reira i roto ia tatou i te mauruuru hohonu no ta tatou tufaa i te pae varua. Te faariro ra te mau tutavaraa ta tatou e rave ra ia faaroo vetahi ê i te parau apî maitai, ia tatou ei mau melo faufaa no te totaiete taata. E haamaramarama taua mahana tairururaa taa ê ra i te mau haamaitairaa ta te feia e haapiihia ra e Iehova e fanaˈo ra.
2 E faataa-ê-hia te mau haamaitairaa a te haapiiraa no ǒ mai i te Atua ra e te mau atâtaraa o te ite no ǒ mai i te ao nei. E ite maitai atu â tatou e te horoa maira Iehova i te hoê haapiiraa hau aˈe, haapiiraa no roto mai i ta ˈna Parau, te Bibilia. E tuuhia te tapao i nia e toru tuhaa o ta tatou haamoriraa i reira tatou e oaoa ˈi i te haapiihia e te Atua. Hau atu â, e faaitoitohia te mau taurearea ia pee i te mau hiˈoraa Bibilia faahiahia, mai ia Davida e o Timoteo, e ia haamau i to ratou oraraa i nia i te mau ohipa i te pae varua. E puaihia to tatou faaroo ia faatiahia mai te mau hiˈoraa haapao maitai o te mau Ite ruhiruhia. E nehenehe te feia tei pûpû iho nei ia ratou no te Atua e o te faaî ra i te mau titauraa, e bapetizo ia ratou. Mai te peu e tera iho â to ratou hinaaro, e tia ia ratou ia faaara ˈtu i te tiaau-peretiteni na mua roa ˈˈe i te tairururaa.
3 Teie te upoo parau o te oreroraa parau rahi o te mahana tairururaa taa ê “Haapiihia e Iehova no te rave i to ˈna hinaaro.” E faaitehia e no te aha e tia ia tatou paatoa ia tamau noa i te haapii, ia mau papu tatou paatoa i roto i te faaroo e ia tamau noa i te haere i mua. E aˈohia tatou ia pee i te hiˈoraa o Iehova na roto i te haapiiraa ˈtu ia vetahi ê i te parau mau e aratai i te ora mure ore. E faaite te mau faatiaraa o te haapuai i to tatou faaroo e mea nafea te mau papai a te Taiete i te tautururaa e rave rahi taata ia fanaˈo i te haapiiraa a Iehova. E haapapuhia te mau faahopearaa maitatai o te porotarama haapiiraa a Iehova na te ao nei.
4 E rave anaˈe i te mau faanahoraa papu no te haere i te tairururaa. E faaitoito anaˈe i te feia atoa e anaanatae ra ia tae atoa. Ia oaoa tatou i teie nei iho no te mau mea maitatai e rave rahi ta to tatou Orometua Rahi e haapii mai ia tatou.—Isa. 30:20.