Te porotarama no te mahana rururaa taa ê i mua nei
“E rave anaˈe i te mau mea atoa no te parau apî maitai,” teie te tumu parau o te mahana rururaa taa ê o te haamata ˈtu i te avaˈe Setepa. (Kor. 1, 9:23, MN) Te parau apî faufaa roa ˈˈe e faaroohia ra i teie nei, o te parau apî maitai ïa o te Basileia. E tauturu mai teie rururaa ia tatou ia ite e e haamaitairaa otahi ta tatou, ei feia afai i teie parau apî faahiahia. Hau atu, e horoa mai oia ia tatou nei i te itoito no te tamau i te faaite i te parau apî maitai, ma te tuutuu ore.—Ohi. 5:42.
E faaite mai te porotarama ia tatou e mea nafea ia faaohipa hua i to tatou aravihiraa teotaratia no te rave rahi atu i roto i te taviniraa. E faaroo tatou i vetahi mau Kerisetiano o tei rave i te mau tauiraa no te faarahi i ta ratou taviniraa, ei hiˈoraa te feia apî o tei turu maite i te mau haereraa i mua o te parau apî maitai.—Hiˈo Philipi 2:22.
E haapapu mai te oreroraa parau tumu, e vauvauhia mai e te taeae orero ratere, i te titauraa ia ‘tiahia i te tuu i te parau apî maitai.’ (Tes. 1, 2:4) E ite tatou e no te tapea i teie haamaitairaa no te afai i te parau apî maitai, e tia ia tatou ia faaî tamau i te mau titauraa e te mau faaauraa a te Atua no nia i te feruriraa e te haerea. E haamaramarama-atoa-hia mai te mau haamaitairaa e roaa mai ia na reira anaˈe.
Eiaha tatou ia mairi i teie porotarama taa ê mau. Te feia o tei pûpû aˈenei ia ratou no Iehova e te hinaaro ra e bapetizo i teie rururaa, a haere e faaite atu i teie nei i te tiaau-peretiteni. E titau manihini anaˈe i te feia atoa ta tatou e haapii ra i te Bibilia. E vaiiho anaˈe ia Iehova ia haapuai ia tatou no te rave i te mau mea atoa no te parau apî maitai e ia faaoti hoi i taua ohipa rahi ra hou o Aramagedo e tae mai ai.