E tauturu anaˈe ia ratou ia tavini faahou
1 I to ˈna iteraa e te fifihia ra to ˈna mau hoa kerisetiano i te pae varua, ua papai te aposetolo Paulo e: “Ua tae roa i te hora araraa to tatou taoto: ua fatata hoi to tatou ora i teie nei, i to tatou faarooraa ra.” (Roma 13:11) Ua haapeapea Paulo no to ˈna mau taeae o tei varea i te taoto i te pae varua; ua tapitapi oia i te faaitoito ia ratou ia ohipa faahou.
2 E nehenehe mau â tatou e parau e te poto nei te rui o teie ao tahito e te fatata maira te aahiata o te ao apî. (Roma 13:12) E mau tumu maitatai ta tatou no te tapitapi no to tatou mau taeae o tei faaea i te apiti na muri iho ia tatou i roto i te pororaa o te parau apî maitai. Nafea ïa tatou e nehenehe ai e tauturu i teie mau Kerisetiano e ore e ohipa faahou ia tavini â ia Iehova?
3 Ta te mau matahiapo e nehenehe e rave: Aita te rahiraa o te mau Kerisetiano e ore e ohipa faahou i faarue i te parau mau; ua faaea noa ratou i te poro, no te toaruaruraa, no to ratou iho mau fifi, no te tapaparaa i te mau mea materia aore ra no te tahi atu mau haapeapearaa o te oraraa. (Luka 21:34-36) Mai te peu e e nehenehe, e mea maitai aˈe ia tauturu oioi i te feia poro hou ratou a faaea ˈi i te ohipa. Ia haamata anaˈe te hoê taata poro i te tuu mai i ta ˈna tabula taviniraa ma te tamau ore, e faaara ïa te taeae papai parau o te amuiraa i te taeae faatere i ta ˈna haapiiraa buka. E ravehia ïa te mau faanahoraa no te haere e farerei ia ˈna. E tia i te mau matahiapo ia tutava i te faataa i te tumu mau o te fifi e te tauturu e nehenehe e horoahia.—Hiˈo Te Pare Tiairaa 15 no Setepa 1993, mau api 20-3.
4 Nafea tatou e horoa ˈtu ai i te tauturu: Ua matau te rahiraa o tatou i te taata e ore e ohipa faahou. E taata matau-roa-hia paha e tatou i mutaa ihora. Nafea ia tauturu ia ˈna? No te aha e ore ai e haere i ǒ na ra no te farerei rii ia ˈna? A parau ia ˈna e te ere nei tatou i to ˈna auhoaraa. A faatupu i te oaoa e te feruriraa maitai. A faaite atu ia ˈna e te tapitapi nei tatou no ˈna ma te ore e aratai ia ˈna ia manaˈo e te maˈihia ra o ˈna i te pae varua. A faatia i te mau tupuraa faaitoito aore ra vetahi mau mea maitatai ta te amuiraa e rave ra. A paraparau ia ˈna ma te aau tae no nia i te tairururaa mataeinaa “Te mau vea o te hau a te Atua” e a faaitoito ia ˈna ia haere atoa mai. Peneiaˈe, e tauturu rahi atu â te amuimui-faahou-raa i te amuiraa ia ˈna i te tahi atu mea. A ani ia ˈna ia haere mai na muri iho ia outou i te mau putuputuraa. A faaite i te mau matahiapo i to ˈna huru.
5 Ia hoˈi mai te hoê Kerisetiano e ore e ohipa faahou i te mau putuputuraa, e haama paha o ˈna i te farerei faahou vetahi feia ta ˈna i matau. Eiaha ïa e parau atu ia ˈna e: “Ihea roa oe i te moeraa?” A tauturu râ ia ˈna ma te farii popou ia ˈna. A faaô atoa mai ia ˈna i roto i te aparauraa. A faafarerei ia ˈna e te feia ta ˈna i ore i matau. A parahi i pihai iho ia ˈna i te roaraa o te putuputuraa e a hiˈo ahiri e e buka himene ta ˈna e vetahi atu mau papai e tuatapapahia. A faaitoito ia ˈna ia hoˈi faahou mai e a pûpû atu i ta outou tauturu ia hinaaro oia.
6 I te mea hoi e te aroha hohonu nei raua i te feia tei atea ê, te oaoa nei Iehova e Iesu ia maitai faahou mai teie mau huru taata i te pae varua. (Mal. 3:7; Mat. 18:12-14) E ite atoa tatou i te oaoa mai te peu e e tauturu tatou i te mau Kerisetiano ia tavini faahou ia Iehova.