Mea rahi roa anei ta tatou ohipa?
1 Ua faaue mai Paulo “ia rahi â te rave i te ohipa a te Fatu.” (Kor. 1, 15:58) Te faaitoito-puai-hia ra tatou ia pee maite i te hoê porotarama haapiiraa tataitahi no te mahana, ia apiti tamau i roto i te taviniraa, ia ore e faaea i te haere i te mau putuputuraa e ia tutava i te amo i te mau hopoia i horoahia mai i roto i te amuiraa. Taa ê noa ˈtu i te tauturu ta tatou e horoa na te feia e hinaaro ra. Ia hiˈohia teie porotarama, e manaˈo paha tatou i te tahi taime e ua teimaha roa tatou e ua tae i te taime no te haere mǎrû rii.
2 I roto i te tahi mau tupuraa, peneiaˈe e mea maitai e te tano atoa ia vaiiho aore ra ia faaiti mai i te tahi mau ohipa. Te manaˈo nei vetahi e e tia iho â ia ratou ia rave i te mau ohipa atoa e anihia mai ia ratou. Teie râ, mai te peu e eita tatou e vai aifaito i roto i teie tuhaa, e nehenehe te reira e faatupu i te hepohepo e te haapeapearaa, e a muri aˈe, i te faainoraa rahi.
3 Ia vai aifaito noa tatou: Te peeraa i te aˈoraa a Paulo ‘ia ara i te mau mea i hau i te maitai ra,’ tera te taviri o te aifaitoraa. (Phil. 1:10) Te auraa ra, e haamau tatou i to tatou feruriraa i nia i te mau mea faufaa mau, e i muri iho, ia au i te taime e toe e te mau huru tupuraa, e nehenehe ïa tatou e haapao i te mau ohipa faufaa iti aˈe. E parahiraa faufaa roa to ta tatou mau hopoia utuafare i roto i taua mau mea matamua ra. E tia atoa ia tatou ia amo i te tahi mau hopoia i te pae no te ohipa. Ua haapii râ Iesu e, e tia i te mau mea matamua ia faataahia ia au i teie manaˈo tumu: e imi na mua i te Basileia. E tia na mua ia tatou ia rave i te mau mea e titauhia no te haapao i ta tatou i tǎpǔ i mua ia Iehova.—Mat. 5:3; 6:33.
4 Ma te haamanaˈo i te reira, e ara tatou i te haamâmâ i ta tatou tabula taime, tei î hoi i te ohipa, i te mau ohipa na tatou iho, te mau faaanaanataeraa e te mau hopoia te riro ei ohipa hau aore ra teimaha roa. Ia tabula tatou i ta tatou porotarama hebedoma, e faaherehere tatou i te taime titauhia no te haapiiraa tataitahi navai maitai, no te apitiraa ma te au i roto i te taviniraa, te haereraa i te mau putuputuraa e te mau tuhaa atoa i taatihia i ta tatou haamoriraa. E nehenehe ïa te taime e toe mai e horoahia no te tahi atu mau ohipa, mai te peu e e turu atu iho â te reira i ta tatou tapao matamua, oia hoi te oraraa ei mau kerisetiano aifaito o te tapitapi na mua no te Basileia.
5 Noa ˈtu râ, e mea teiaha noâ paha ta tatou hopoia. I reira ra, e tia ia tatou ia farii i te aniraa a Iesu: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora.” (Mat. 11:28) E tiatonu atoa tatou i nia ia Iehova, “o tei tauturu mai ia tatou i tera mahana, i tera mahana” e o te horoa nei i te puai na te taata i rohirohi. Eita oia e vaiiho i te taata parau-tia ia aueue, na ˈna iho e tǎpǔ maira. (Sal. 55:22; 68:19; Isa. 40:29) E nehenehe tatou e tiaturi e e faaroo mai oia i ta tatou mau pure, ma te tauturu ia tatou ia tamau noa i te ora i te hoê oraraa teotaratia î maitai.
6 Mea papu e mea ohipa roa tatou i roto i te tapaparaa i te mau tapao maitatai o te Basileia, tera râ, e nehenehe tatou e oaoa, no te mea ua ite tatou e e ere ta tatou rohiraa i te mea faufaa ore i roto i te ohipa a te Fatu.—Kor. 1, 15:58.