Pahonoraa i ta outou mau uiraa

◼ I te mea e te vai ra ta tatou buka Te ite e aratai i te ora mure ore i teie nei, eaha te maororaa e faaterehia ˈi te hoê haapiiraa bibilia i te fare o te taata?

Ua faaitoito Te taviniraa o te Basileia no setepa 1993 ia tamau noa i te haapiiraa bibilia i te fare e te hoê taata apî e ia hope roa e piti buka. I teie nei, te vai ra ta tatou buka Te ite, e au ra e mea tano ia taui i teie huru raveraa, ia au i ta Te Pare Tiairaa o te 15 no tenuare 1996 e faataa ra i te mau api 13 e 14.

Ua faaineinehia te buka ra Te ite no te tauturu i te feia “e haerea fariihia to ratou no te ora mure ore” ia haapii i te mau mea hinaarohia ia pûpû atu ratou ia ratou no Iehova e ia bapetizo atu ai. (Ohi. 13:48, MN) No reira, ia oti teie buka apî, aita e faufaa ia haapii i te piti o te buka. A farii ai te feia ta tatou e haapii ra i te parau mau, e nehenehe tatou e faaitoito mǎrû noa ia ratou ia faarahi atu â i to ratou ite na roto i te haereraa i te mau putuputuraa a te mau Ite no Iehova e na roto i te taioraa i te Bibilia e te mau buka kerisetiano huru rau.

Mea faufaa roa atoa ia ite maitai tatou i te mau Uiraa na te feia e hinaaro ra e bapetizo (om mau api 174-218). Noa ˈtu e eita tatou e faahiti i teie mau uiraa aore ra e hiˈopoa e te taata ta tatou e haapii ra, mea maitai ia haamatara tatou i roto i te buka ra Te ite i te mau manaˈo e faaite mai ai oia e ua papu maitai ia ˈna te mau parau mau bibilia tumu ia tuatapapa oia e te mau matahiapo i te mau uiraa no te bapetizoraa.

Aita e faufaa ia faarahi atu i te mau tumu parau o te buka ra Te ite na roto i te anoiraa mai i te mau manaˈo rapaeau aore ra te mau tatararaa hau atu no te turu i te mau haapiiraa a te Bibilia aore ra no te patoi i te mau haapiiraa hape. E faaroa noa ˈtu hoi te reira i te haapiiraa. Mea hau aˈe râ ia haapii-oioi-hia te buka, peneiaˈe i roto e ono avaˈe. No reira ˈtura, e tia ia tatou ia tuatapapa i te mau tumu parau na mua ˈˈe e ma te faahohonu, ia nehenehe tatou e faataa ˈtu ma te maramarama e te haapoto noa. A faaitoito atoa i te taata haapii ia faaineine ia ˈna, ia taio i te mau irava i faahitihia e ia tutava ia matara maitai ia ˈna te mau parau e haapiihia ra i roto i te pene tataitahi.

Ua tuu Te Pare Tiairaa i te tapao i nia i te faufaaraa no te mau Ite no Iehova ia faatere rahi atu â i te mau haapiiraa bibilia manuïa i roto i te hoê area taime poto aˈe. (Hiˈo Isaia 60:22.) Ia faaohipa maitai tatou i te buka ra Te ite, e nehenehe tatou e tauturu i te mau taata apî ia noaa i te ite e aratai i te ora mure ore e ia haapao i te reira.—Ioa. 17:3.