Te Apokalupo: te taviri o te oaoa mau
1 Ua riro te mau parau a te aposetolo Ioane papaihia i roto i te Apokalupo 1:3 ei parau apî oaoa no tatou, no te mea te faaite maira teie mau parau nafea e itea mai ai te oaoa. Teie ta Ioane i papai: “E ao to ˈna to te taio, e to te feia e faaroo i teie nei parau tohu, e te haapao i tei papaihia i roto ra.” Ua tauturu te buka ra Te Apokalupo: Ua fatata roa to ˈna tatararaa rahi hopea nei! e rave rahi mau taata ia itea mai te oaoa. Tera te hoê tumu maitai roa no te pûpû i teie buka na vetahi ê.
2 Peneiaˈe e nehenehe tatou e haamata i te aparauraa ma te faahiti i teie uiraa:
◼ “I to oe manaˈoraa, ua papaihia anei te buka Apokalupo ia itehia to ˈna auraa aore ra ia vai noa oia ei miterio? [A vaiiho i te taata ia pahono.] E rave rahi te manaˈo atoa nei mai te reira. A hiˈo na eaha ta te Bibilia e parau ra i roto i te Apokalupo 1:3. [A taio i te irava.] No reira, e nehenehe tatou e taa i te auraa o te buka Apokalupo, e e nehenehe te ite e vai ra i roto e faaoaoa ia tatou. Nafea ïa?” A faaea i nia i te tahi mau manaˈo o te paratarapha 2 i te api 6, a parau atu ai: “Te tatara ra teie buka i te mau irava tataitahi o te Apokalupo. E tano roa ia rave oe i te taime no te taio atu. E oaoa roa vau i te vaiiho mai i teie buka na oe.”
3 I te mea e e rave rahi mau taata o te tapitapi nei no te pae materia, e nehenehe teie faaiteraa e faaara i to ratou anaanatae:
◼ “I to oe manaˈoraa, eaha te mea hiaai-roa ˈˈe-hia e tatou? [A vaiiho i te taata ia pahono.] E rave rahi mau taata o te tiaturi nei e te mea hiaai-roa ˈˈe-hia e ratou, ia rahi atu ïa ta ratou mau taoˈa materia.” A iriti i te buka i te api 73 e a haamatara i te mau manaˈo faufaa o te tumu parau tarenihia “Mea taa ê te imiraa i te taoˈa materia, e mea taa ê te paari.” A haere faahou atu â i mua i te na ôraa e: “Te faaite ra te reira e te tuu-rahi-roa-hia ra te faufaa i nia i te mau taoˈa materia; tera râ, mea maitai aˈe ia tapitapi rahi aˈe tatou no to tatou mau hinaaro i te pae varua. Te ite mau, tera te mea e hiaai-mau-hia ra e tatou. Te ite râ i te aha?” A taio i te Ioane 17:3 e a faataa ˈtu e e nehenehe te ite o te Atua e aratai i te ora mure ore. E nehenehe tatou e parau atu i te taata e e vaiiho mai tatou i te buka e e hoˈi mai tatou no te faaite eaha ta ˈna e haapii maira no nia i te opuaraa faahiahia a te Atua oia hoi te haamâharaa i te mau mea atoa e hiaaihia ra e te huitaata nei.
4 I te mea e e rave rahi mau taata o te tapitapi nei no te mau ati e tairi nei i teie nei ao, e nehenehe tatou e tamata i teie huru raveraa:
◼ “Te tapitapi nei te mau taata atoa o ta ˈu e paraparau nei no te tau a muri aˈe. Te manaˈo nei vetahi mau tia faatere e fatata roa tatou i te tomo i roto i te hoê anotau apî no te hau. Eaha to oe manaˈo? [A vaiiho i te taata ia pahono.] Noa ˈtu te mau tutavaraa a te taata, te haere noa ˈtura te haavîraa uˈana e te hepohepo i te rahi. Te faaite ra te Bibilia eaha te ravea hoê roa no te faatitiaifaro i teie mau fifi. [A taio i te Petero 2, 3:13. A faaite i te hohoˈa i te api 302, e a parau atu e e hopoi mai te Basileia no te raˈi a te Atua i te hau e te ino ore e vai tamau i nia i te fenua nei.] E tauturu teie buka ia oe ia ite e nafea ia ô atu i roto i teie totaiete taata apî o te ora e a muri noa ˈtu i nia i te fenua nei, i raro aˈe i te faatereraa o te Basileia a te Atua.”
5 Mai te peu e mea ohipa roa te taata ta tatou e paraparau ra e e haapoto noa ˈtu tatou, a na ô atu ïa e:
◼ “Mai te peu e aita to oe e taime, te hinaaro nei au e vaiiho mai i teie api parau iti [aore ra teie vea] e na ô ra [a maiti i te hoê api parau iti aore ra te hoê tumu parau e tano]. Te faaitoito nei au ia oe ia taio i te reira. Ia hoˈi mai au, e oaoa roa vau i te iteraa i to oe manaˈo.”
6 Ia pûpû tatou i te hoê buka aore ra te hoê vea, e horoa anaˈe i te mau taata te ravea no te faaite i to ratou mauruuru na roto i te tururaa mai i te ohipa pororaa na te ao atoa nei na roto i ta ratou mau ô. E faarahi atu teie mau ô i to ratou oaoa i te iteraa i te auraa o te mau parau tohu faahiahia a te Apokalupo.—Mas. 3:13.