E faaineine anaˈe no te mau putuputuraa e ia faufaahia tatou
1 Ua riro tatou ei fetii taeae, e no reira tatou e haaputuputu tamau ai, i te mau hebedoma atoa. (Tim. 1, 4:15, 16) Nafea tatou e faufaa-rahi-hia ˈi i ta tatou mau putuputuraa?
2 E tia ia tatou ia faaherehere tamau i te taime no te faaineine ia tatou no te mau putuputuraa. Mea rahi aˈe paha te taime ta vetahi e nehenehe e faataa no ta ratou faaineineraa i ta vetahi pae. Tera râ, noa ˈtu e mea rahi ta tatou ohipa aore ra aita, e mea maitai ia imi i te tahi taime no te faaineine ia tatou. E mea hau roa ˈtu ia faaineine e te utuafare fetii.—Eph. 5:15, 16.
3 Haapiiraa o te taviniraa teotaratia: E tutava tatou i te taio i te tuhaa irava bibilia i faataahia no te hebedoma tataitahi. (Ios. 1:8) E tuatapapa tatou i te mau tumu parau e vauvauhia mai, e e afai atoa tatou i te Piha no te Basileia te mau buka faaohipahia no te apee i te mau oreroraa. E feruri tatou e nafea tatou ia faaohipa i te mau manaˈo e vauvauhia mai i roto i te taviniraa.
4 Putuputuraa no te taviniraa: E hiˈo tatou i te porotarama e vai ra i roto i Te taviniraa o te Basileia. E taio tatou i te mau tumu parau e hiˈopoahia. E taio tatou i te mau tumu parau a Te Pare Tiairaa aore ra vetahi atu mau buka o te faaohipahia. Mai te peu e e ravehia te mau faahiˈoraa no nia i te mau faaiteraa, e hiˈopoa tatou na mua ˈˈe. E ineine ïa tatou no te faaohipa ˈtu i roto i te pororaa.
5 Haapiiraa o Te Pare Tiairaa: E taio tatou i te tumu parau e tuatapapahia e e tapao tatou i te mau pahonoraa o te mau uiraa. E taa maitai aˈe ia tatou te mau tumu parau mai te peu e e taio tatou i te mau irava i faahitihia. E faahohonu atu â tatou i to tatou ite na roto i te feruri-hohonu-raa e te faatuatiraa i te mea o ta tatou e haapii ra e te mea o ta tatou i ite ê na. E haamataro anaˈe no te horoa i te mau pahonoraa i te putuputuraa na roto i te faaineineraa i te tahi mau pahonoraa poto noa i te hoê aore ra e piti paratarapha. E ravea faufaa roa te reira no te rave i “te faaiteraa o to tatou tiaturiraa i mua i te taata.”—Heb. 10:23, MN.
6 Haapiiraa buka: A tahi, e hiˈo oioi tatou i te haapiiraa ma te faaea i nia i te upoo parau e te mau upoo parau iti. I muri iho, e taio tatou i te mau tumu parau ma te tapao mai i te mau manaˈo matamua. E taio tatou i te mau irava i faahitihia no te haapapu i te mau manaˈo. E tamata tatou i te pahono i te mau uiraa na roto i ta tatou iho mau parau. E i te pae hopea, ia faahaamanaˈo faahou tatou i te mea o ta tatou i tuatapapa. E tamata anaˈe i te haamanaˈo i te mau manaˈo tumu matamua e te mau tuhaa rarahi o te haaferuriraa.—Tim. 2, 2:15.
7 Ia faufaahia tatou i te mau putuputuraa: E mea faufaa ia tae mai tatou hou te putuputuraa e haamata ˈi ia faufaa-rahi-hia tatou i te mau putuputuraa. E nehenehe ïa tatou e faaroo i te pure haamataraa, i reira e anihia ˈi te varua o Iehova, e e himene i te mau himene haviti mau o te Basileia. Mai te peu e aita ta tatou e tamarii nainai e aita e tumu e faahepo ra ia tatou ia parahi i muri roa i te piha, e taa iho â paha ia tatou e ia parahi anaˈe tatou i mua, e mea iti aˈe to tatou feruriraa i te nevaneva haere e mea ohie aˈe no te apee i te porotarama. Area te feia e tamarii nainai ta ratou ra, o ta ratou paha e afai atu i rapae i te taime e faaterehia ˈi te putuputuraa, e nehenehe ta ratou e faaiti i te faahuehueraa no te tahi atu feia, ia parahi ratou na pihai iho i te mau vahi haereraa taata aore ra i muri i te piha.
8 E tutava tatou i te hiˈopoa i te mau irava e taiohia mai. E tauturu te reira ia tatou ia haamanaˈo i te mea o ta tatou i faaroo. E tauturu te paraparauraa no nia i te mea o ta tatou i haapii e te mau melo o to tatou utuafare e to tatou mau hoa, ia tamau roa i roto i to tatou feruriraa. Maoti te faaohiparaa i teie mau aˈoraa, e taa maitai aˈe ia tatou te haapiiraa e horoahia ra i te mau putuputuraa e e faufaa-rahi-hia tatou. I reira tatou ‘e faaaraara-mau-hia ˈi i te here e te mau ohipa maitatai ra.’—Heb. 10:24, 25.