Te buka Bibilia haapii—ta tatou buka haapiiraa bibilia matamua
1 Auê tatou i te oaoa i to tatou fanaˈoraa i te buka ra Eaha ta te Bibilia e haapii mau ra? i te tairururaa mataeinaa “Te auraroraa i te Atua”! Ua oaoa te mau tia i te noaaraa ta ratou iho buka i te hopea o te porotarama o te Mahana maa. E nafea teie mauhaa haapiiraa apî e faaohipahia ˈi? Ua opuahia te reira mai ta tatou buka haapiiraa bibilia matamua. Noa ˈtu e e pûpûhia na mua te buka apî i Mati, te faaitoitohia ra te feia poro ia faaohipa oioi i te reira no te haamata e no te faatere i te mau haapiiraa bibilia.
2 Te mau haapiiraa bibilia e faaterehia ra: E mea titauhia ia haroaroa maitai te feia poro e faatere ra i te mau haapiiraa bibilia i nia i te buka Ite aore ra te buka rairai Titau e nafea e afea e haamata ˈi i te faaohipa i te buka apî i roto i te haapiiraa. Mai te peu e no haamata-noa-hia ˈtura te hoê haapiiraa, e nehenehe noa ïa outou e haamata mai te omuaraa o te buka apî. Mai te peu e tei mua rii outou i roto i te buka Ite, e nehenehe ïa outou e tamau i te haapiiraa i te pene e tuea o te buka Bibilia haapii. Mai te peu e tei te pae hopea outou o te buka Ite, e faaoti paha ïa outou e faahope roa i tera buka.
3 Papu maitai e ua matau paatoa tatou e rave rahi taata e faufaahia i te haapiiraa i te buka Bibilia haapii. No te aha e ore ai e pûpû i te taata atoa i te hoê haapiiraa bibilia i roto i teie buka haapiiraa o te faaite riirii ra i te pue parau mau bibilia? Ei hiˈoraa, e hinaaro paha te feia i haapii na i te buka rairai Titau aore ra i te buka Ite tei ore râ i tae roa i te pûpûraa e i te bapetizoraa e rave faahou i ta ratou haapiiraa ma te faaohipa i te buka apî. E faaoti paha te mau metua i te faaohipa i te buka a tufa ˈi ratou i te ite mau no nia i to te Atua hinaaro na ta ratou mau tamarii.—Kol. 1:9, 10.
4 Te haapiiraa i te piti o te buka: Ua faanahohia anei e ia haapii te hoê piahi Bibilia i te piti o te buka ia oti Eaha ta te Bibilia e haapii mau ra? E. Mai te peu e te itehia ra e te haere ra te hoê piahi i mua, noa ˈtu e mea haere mǎrû noa, e te faaite ra oia i te mauruuru no te mea ta ˈna e haapii ra, e nehenehe te haapiiraa bibilia e tamauhia i te faatere i roto i te buka Adorez le seul vrai Dieu. Te tiaturi nei tatou e e riro te buka ra Bibilia haapii ei mauhaa puai i roto i to tatou rima a haapao ai tatou i te faaueraa e faariro i te taata ei pǐpǐ.—Mat. 28:19, 20.