Vaiiho na Iehova e hiˈopoa ia tatou: no te aha e mea maitai?
1 Te hinaaro nei te mau taata e ora ma te maˈi ore; e mea maitai aˈe ïa te oraraa. Oia mau, te vai ra te tahi mau taata oraora maitai o te haere nei e hiˈo i te taote no te oraora-maitai-raa. No te aha? No te mea te hinaaro nei ratou e ite oioi i te mau maˈi atoa no te rapaau i te reira. E mea faufaa roa ˈtu râ ia vai ara tatou i nia iho i to tatou oraora-maitai-raa i te pae varua. Ia farii mai Iehova ia tatou, e tia ia tatou ia vai “tia to [tatou] faaroo i te parau nei.”—Tito 1:13.
2 Ua tae i te taime e vaiiho tatou na Iehova e hiˈopoa ia tatou. No te aha te reira? No te mea tei roto o Iehova i to ˈna hiero moˈa e te hiˈopoa nei o ˈna i te mau mafatu o te mau taata atoa (Sal. 11:4, 5; Mas. 17:3). Mai ia Davida, te ani nei tatou ia Iehova i te hoê hiˈopoaraa taatoa: “E hiˈopoa mai oe, e tamata mai, e Iehova, e perehahu mai oe i tau aau e tau manaˈo.”—Sal. 26:2.
3 No te mea e taata hara tatou, e tia ia tatou ia vai ara, i roto iho â râ ia tatou, i te maˈi i te pae varua. Te horoa nei te Maseli 4:23 i teie aˈoraa: “E faaitoito i te tiai i to aau na; o te tumu hoi te reira o te ora.”
4 Te haamǎtaˈuhia ra to tatou oraora-maitai-raa i te pae varua na te ao ino e te tia ore i te pae morare e haaati ra ia tatou. Ahiri e faatia tatou e tapiri roa i teie nei ao ino, e nehenehe ïa tatou e haamata i te manaˈo mai ia ˈna e i te apee atoa ˈtu i te mau haerea o teie nei ao. Aore ra e nehenehe tatou e rave mai i to ˈna huru oraraa e e arataihia na to ˈna huru feruriraa.—Eph. 2:2, 3.
5 E nehenehe o Satani e faaohipa i te hamani-ino-raa aore ra i te patoiraa no te haaveveraa ïa ia tatou i te pae varua. Te hauti pinepine nei râ o ˈna ma te haavarevare i nia iho i te mau ohipa faaanaanatae o teie nei ao. Te aˈo nei râ o Petero ia tatou ‘ia haapao maitai e ia vai ara,’ no te mea ua riro o Satani “mai te liona uuru ra,” “i te imiraa i te taata e pau ia ˈna ra.” Te titauhia ra tatou ia ‘patoi atu ïa ma te faaroo turori ore.’—Petero 1, 5:8, 9.
6 E mea faufaa roa ia paruru i to tatou oraora-maitai-raa i te pae varua ma te tapea maitai i te hoê faaroo puai, atuatuhia i te mau mahana atoa. Te faaite mai ra te aposetolo Paulo ia tatou ia tamata i to tatou faaroo ma te tuutuu ore. Te faahepo nei te paari ia tatou ia pee i te mau aˈoraa ohie a te hoê taote maitai; oia atoa ïa, e tia ia tatou ia faaroo ia Iehova ia tae i te taime e faaite mai ai ta ˈna hiˈopoaraa i nia ia tatou i te pae varua i te hoê maˈi ia rapaauhia. E nehenehe ïa tatou ‘e rave i te ohipa no to tatou maitai.’—Kor. 2, 13:5, 11.
7 O Iehova te Taote maitai roa ˈˈe. E mea papu noa ta ˈna tuatapaparaa. Ua ite o ˈna eaha mau na ta tatou e hinaaro. Na roto i ta ˈna ra Parau e te “tavini haapao maitai,” te horoa nei o ˈna na tatou i te maa maitai roa i te pae varua (Mat. 24:45; Tim. 1, 4:6). Ma te rave tamau noa i teie maa maitai i te pae varua, i te fare e i te mau putuputuraa, e vai maitai noa ïa tatou i te pae varua. E mea maitai atoa no tatou ia ohipa tamau noa i te pae varua i roto i te taviniraa e i roto i te tahi atu mau ohipa kerisetiano. No reira e vaiiho tatou e na Iehova e hiˈopoa tamau mai ia tatou, ma te ite e e horoa mai o ˈna i te hoê oraoraraa maitai roa ˈˈe i te pae varua.