E nehenehe outou e ape i te hoê maˈi mafatu tupu taue i te pae varua

Ua topa taue te hoê maona numera hoê, te aravihi roa e te oraora maitai roa ia hiˈohia, i roto i te hoê faaineineraa e ua pohe oia. O Sergei Grinkov teie maona, e taata faahee olympique oia i nia i te pape paari tei noaa te fetia auro e piti taime e ua mau taue to ˈna toroa a haamata ˈi oia i te aravihi mai—e 28 noa matahiti to ˈna. Auê te peapea e! Te tumu? Hoê maˈi mafatu tupu taue. Ua parauhia e aita roa ˈtu i manaˈohia e e pohe oia no te mea aita hoê noa ˈˈe tapao i faaite mai e e maˈi mafatu to ˈna. Ua itea mai râ i te feia hiˈopoa e ua oru to ˈna mafatu e ua apǐ roa te tahi mau uaua haapuroro toto.

E AU ra paha e mea rahi te mau maˈi mafatu taue e tupu nei aita e faaararaa, tera râ, te parau ra te tahi mau taote e mea varavara te reira. Te parau mau, e pinepine aita te mau tapao faaararaa e te tahi atu â mau tupuraa mai te paupauraa te aho, te poria, e te mauiui i te ouma e tâuˈahia ra. Te faahopearaa, noa ˈtu e eita ratou e pohe i te maˈi mafatu tupu taue, mea rahi o te riro ei huma ino roa e tae noa ˈtu i to ratou poheraa.

I teie mahana, te farii ra te rahiraa o te mau taote e no te arai i te hoê maˈi mafatu tupu taue, mea titauhia ia haapao maitai noa tatou i ta tatou maa e to tatou huru oraraa e ia rave i te tahi hiˈopoaraa tamau i te ea.a E tauturu rahi taua mau taahiraa avae ra, e te hinaaro-mau-raa e rave i te mau tauiraa ia titauhia ra, i te arai i te mau faahopearaa peapea o te hoê maˈi mafatu tupu taue.

Tera râ, te vai ra te tahi atu huru o to tatou mafatu e tia ia tatou ia haapao atu â. “E faaitoito i te tiai i to aau na,” ta te Bibilia ïa e faaara maira ia tatou, “o te tumu hoi te reira o te ora.” (Maseli 4:23) Parau mau, te faahiti na mua ra teie irava i te aau taipe. Mea hinaarohia ia tiai tatou i to tatou mafatu pae tino, tera râ, mea faufaa roa ˈtu â ia vai ara noa tatou ia hinaaro tatou e paruru i to tatou mafatu taipe i te mau maˈi o te aratai atu i te pohe pae varua ra.

Faahohonuraa i te hoê maˈi mafatu tupu taue taipe

Mai no te maˈi mafatu pae tino, hoê o te mau ravea papu roa ˈˈe e arai ai tatou i te hoê maˈi mafatu tupu taue i te pae varua, o te iteraa ïa eaha te mau tumu e te raveraa i te mau taahiraa avae no te faaafaro atu. No reira, e hiˈo mai tatou i te tahi o te mau tumu rahi o te maˈi mafatu—mau e te taipe.

Tamaaraa. I te rahiraa o te taime, e fariihia e e ere aore ra e ere roa ˈtu te maa paia ore, noa ˈtu e e mea au ia amu, i te mea maitai no to tatou ea. Mea ohie atoa ia fanaˈo i te maa paia ore i te pae feruriraa e o te faaaraara hoi i to tatou mau tumu ite, tera râ, mea atâta te reira no to tatou ea pae varua. Mea rahi te mau tumu parau i roto i te mau vea e hoohia nei ma te aravihi e o te faaiteite ra i te mau taatiraa e te raau taero tia ore, te haavîraa uˈana, e te peu tahutahu. Ia faatamaa tatou i to tatou feruriraa i tera huru maa, mea ino roa ïa no to tatou mafatu taipe. Te faaara ra hoi te Parau a te Atua e: “O te mau mea atoa o teie nei ao, o te hinaaro tia ore o te tino nei, e te hinaaro tia ore o te mata nei, e te ahaaha o te oraraa nei, e ere ïa i to ǒ mai i te Metua ra, no teie nei ao anaˈe ïa. E te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu.”—Ioane 1, 2:16, 17.

Eita te hoê taata tei matau i te maa paia ore e au roa i te maa maitatai, mai te maa hotu e te maa tupu. Eita atoa te hoê taata tei matau i te faatamaa i to ˈna feruriraa e to ˈna mafatu i te mau mea o teie nei ao, e au roa i te maa paia maitai i te pae varua. No te hoê taime, e inu noa paha oia i te “û” o te Parau a te Atua. (Hebera 5:13) Ia maoro, eita iho â ïa oia e riro mai ei taata paari i te pae varua, mea faufaa hoi no te amo i ta ˈna mau hopoia faufaa i te pae varua i roto i te amuiraa Kerisetiano e te taviniraa. (Mataio 24:14; 28:19; Hebera 10:24, 25) Ua vaiiho te tahi pae i roto i taua tupuraa ra, ia iti mai to ratou puai pae varua, a riro atu ai ratou ei mau Ite aita e poro faahou ra!

Te tahi atu fifi atâta, oia ïa mea haavarevare te huru rapaeau. E nehenehe te raveraa i te mau hopoia Kerisetiano ma te faatia ture noa e huna i te maˈi e rahi noa ˈtura o te hoê mafatu taipe, o tei paruparu i te tapi-omoe-raa i te mau philosophia materia aore ra i te mau faaanaanataeraa e faaitoito ra i te morare ore, te haavîraa uˈana, aore ra te peu tahutahu. Aita paha taua tamaaraa tano ore i te pae varua ra e ohipa roa ra i nia i to tatou ea pae varua ia hiˈohia, tera râ, e nehenehe te mafatu taipe e paruparu i te reira mai te mau uaua haapuroro toto o te nehenehe e paari i te tamaaraa tano ore, e ino atu ai te mafatu mau. Ua faaara Iesu eiaha e vaiiho i te mau hinaaro tano ore ia ô i roto i to tatou mafatu. Ua parau oia e: “O te hiˈo noa ˈtu i te vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.” (Mataio 5:28) Oia, ia ore tatou e tamaa maitai i te pae varua, e nehenehe te hoê maˈi mafatu tupu taue i te pae varua e tupu mai. Tera râ, te vai ra te tahi atu â mau mea e tia ia tatou ia haapao.

Faaetaetaraa tino. Mea matau-maitai-hia e e nehenehe te hoê oraraa parahi noa e riro ei tumu e tupu ai te maˈi mafatu tupu taue i te pae tino. E nehenehe atoa ïa te hoê oraraa parahi noa i te pae varua e hopoi mai i te mau faahopearaa ino roa. Ei hiˈoraa, e apiti paha te hoê taata i roto i te taviniraa Kerisetiano, tera râ, e taotia paha oia i te reira i te mea e nehenehe e parauhia te tuhaa fanaˈo, ma te faaitoito rii noa aore ra eita roa ˈtu i te riro mai “ei rave ohipa aita e haamaraa, e te tia hoi i te tufa i te parau mau ra.” (Timoteo 2, 2:15) Aore ra e haere paha tatou i te tahi mau putuputuraa Kerisetiano, tera râ, eita paha tatou e faaineine roa ia tatou e e apiti atu. Aita paha e tapao pae varua ta tatou aore ra aita tatou e hinaaro ra aore ra aita tatou e anaanatae ra i te mau mea pae varua. Aita anaˈe e faaetaetaraa tino pae varua, e paruparu ïa e e morohi atoa to tatou faaroo matamua. (Iakobo 2:26) Ua faahiti te aposetolo Paulo i teie fifi atâta i to ˈna papairaa i te mau Kerisetiano Hebera, e au ra e ua topa vetahi pae i roto i taua huru oraraa parahi noa ra i te pae varua. A tapao na i ta ˈna faaararaa no nia i te faahopearaa etaeta o te reira i nia i to ratou ea pae varua. “E ara, e au mau taeae, o te aau ino faaroo-ore-atoa-hia i roto i te hoê o outou na, i te faarueraa i te Atua ora ra. E aˈo maite râ te tahi i te tahi eiaha ei mahana e tuua, oi vai aˈe te ao, ia ore roa ia îta noa ˈtu te hoê o outou i te haavare o te ino ra.”—Hebera 3:12, 13.

Hepohepo. O te hepohepo rahi roa râ te tahi atu tumu rahi o te maˈi mafatu tupu taue i te pae tino. E nehenehe atoa ïa te hepohepo, aore ra “te mau tapitapi o te oraraa,” e riro ei mea ino roa no te mafatu taipe, e e turai atoa i te hoê ia faaea roa i te tavini i te Atua. E tano maitai te faaararaa a Iesu i roto i teie tuhaa: “E ara râ ia outou, o te teimaha outou i te rahi o te maa e te taero, e te peapea o teie nei ao, a roohia mai ai outou e taua mahana ra aore i manaˈohia. E roohia mai hoi to te ao atoa nei i te reira mai te marei ra.” (Luka 21:34, MN, 35) E nehenehe atoa te hepohepo e ohipa roa ino i nia i to tatou mafatu taipe ia mauiui tatou i te hoê hara tei huna-maoro-hia. Ua û te arii Davida i te oto i taaihia i taua hepohepo mauiui ra, i to ˈna parauraa e: “Aore e haamǎrûraa i to ˈu nei mau ivi, i ta ˈu nei hara. Ua na nia ta ˈu nei mau hara i tau upoo, mai te hopoia teiaha e ore e maraa ia ˈu ra.”—Salamo 38:3, 4.

Tiaturi rahi roa ia tatou iho. Mea rahi te taata i roohia i te maˈi mafatu tupu taue, tei tiaturi rahi roa e mea oraora maitai ratou na mua iti noa ˈˈe i to ratou tupuraahia i taua maˈi ra. E pinepine, aita ratou i hiˈopoahia e te taote aore ra ua manaˈo ratou ma te hoata e e ere roa ˈtu i te mea faufaa. E manaˈo atoa paha te tahi pae e i te mea e mea huru maoro to ratou taviniraa ei Kerisetiano, eita ïa ratou e fifihia. Eita paha ratou e rave i te tahi mau hiˈopoaraa ia ratou iho e tae noa ˈtu i te taime e tupu mai ai te fifi. Mea faufaa roa ia haamanaˈo tatou i te aˈoraa maitai eiaha e tiaturi rahi roa ia tatou iho, aˈoraa i horoahia e te aposetolo Paulo: “O tei manaˈo e te tia ra oia, e ara oia o te hiˈa.” E haerea paari ïa ia farii tatou i to tatou huru tia ore e ia hiˈopoa tamau ia tatou iho i te pae varua.—Korinetia 1, 10:12; Maseli 28:14.

A tâuˈa ˈtu i te mau tapao faaararaa

Te vai ra iho â te tumu e haafaufaa rahi ai te mau Papai i te huru o te mafatu taipe. Te taio nei hoi tatou i roto i te Ieremia 17:9, 10 e: “E haavare rahi to te aau i te mau mea atoa nei, e ua ino roa; o vai te ite? O vau o Iehova, o tei paheru i te aau, tei tamata i te manaˈo, ia hopoi atu vau i te taata atoa ra i tei au i ta ˈna ra parau, e tei au i te hopea o ta ˈna e rave ra.” E hiˈopoa Iehova i to tatou aau, e rave atoa râ oia i te tahi faanahoraa î i te here no te tauturu ia tatou ia hiˈopoa tatou ia tatou iho, mea hinaarohia hoi te reira.

Mea na roto i te arai o “te tavini haapao maitai e te paari” e fanaˈo ai tatou i te mau haamanaˈoraa i te taime au. (Mataio 24:45) Ei hiˈoraa, hoê o te mau ravea matamua e nehenehe ai to tatou mafatu taipe e haavare ia tatou, na roto ïa i te turairaa ia tatou ia moemoeâ i te mau mea o teie nei ao. E mau manaˈonaˈoraa, mau moemoeâ, e mau nevanevaraa tano ore teie e te faufaa ore. E nehenehe te reira e riro ei mea ino roa, mai te peu iho â râ e hotu mai te mau manaˈo viivii. No reira e tia ˈi ia tatou ia patoi roa i te reira. Ia riri tatou i te faatura-ore-raa i te ture mai ia Iesu, e paruru ïa tatou i to tatou mafatu i te moemoeâ i te mau mea o teie nei ao.—Hebera 1:8, 9.

Hau atu â, e nehenehe te mau matahiapo î i te here i roto i te amuiraa Kerisetiano e tauturu mai ia tatou. E mauruuru iho â tatou ia haapao mai vetahi ê ia tatou, i te pae hopea râ, na tatou taitahi te hopoia e haapao i to tatou mafatu taipe. Tei ia tatou taitahi noa te ‘hiˈopoa-maite-raa i te mau mea atoa’ e te ‘imi-maite-raa ia tatou iho e to roto anei tatou i te faaroo.’—Tesalonia 1, 5:21; Korinetia 2, 13:5.

A tiai i te mafatu

E tano atoa te faaueraa tumu bibilia “o ta te taata e ueue ra, o ta ˈna â ïa e ooti mai,” i te ea o to tatou mafatu taipe. (Galatia 6:7) E pinepine, ia tupu taue mai te hoê ati pae varua, o te faahopearaa ïa o to tatou tapi-maoro-raa ma te omoe i te mau mea faaino i te pae varua, mai te mataitairaa i te hohoˈa faufau, te hinaaro-rahi-roa-raa i te mau taoˈa materia, aore ra te titauraa i te tiaraa teitei aore ra te mana.

No reira, no te paruru i te mafatu, mea faufaa roa ia haapao maitai tatou i ta tatou huru tamaaraa i te pae varua. A faatamaa i to tatou feruriraa e to tatou mafatu i te Parau a te Atua. A haapae i te maa paia ore i te pae feruriraa, mea ohie hoi ia fanaˈo atu e mea au roa no te tino, aˈunei to tatou mafatu taipe e etaeta noa ˈi. Teie te faaararaa a te papai salamo maoti te hoê faahohoˈaraa e tano e i te pae rapaauraa: “E mea ite ore to ratou aau mai te toâhua ra.”—Salamo 119:70.

Mai te peu e te vai ra te tahi mau hape i huna-maoro-hia, a tamata i te tinai i te reira, aˈunei te reira e tapiri ai i to outou mau uaua haapuroro toto taipe. Ia haamata te ao i te riro ei mea au e i te pûpû mai i te mea navenave e te mea oaoa e rave rahi, a feruriruri i te aˈoraa paari a te aposetolo Paulo. Teie ta ˈna i papai: “Teie râ ta ˈu parau, e au mau taeae, te poto nei te taime: e au i te feia . . . i rave i to teie nei ao ra, mai te mea e aore i rave; te mou nei hoi te huru o teie nei ao.” (Korinetia 1, 7:29-31) E ia haamata te mau faufaa materia i te arato ia tatou, a pee i ta Ioba mau parau: “Ua faariro vau i te auro ei tiaturiraa no ˈu, e ua parau vau i te auro mâ maitai ra, Oe to ˈu manaˈoraa; ua riro te reira ei hara e faautuahia e te haava; ua huna ïa vau i reira i te Atua i nia i te raˈi ra.”—Ioba 31:24, 28; Salamo 62:10; Timoteo 1, 6:9, 10.

Teie te faaararaa a te Bibilia no nia i te fifi atâta e tâuˈa ore tamau i te aˈoraa bibilia: ‘O te taata i aˈo-pinepine-hia, e ua faaetaeta ihora, e uˈana mai to ˈna pohe, aita e haapuraa.’ (Maseli 29:1) Area râ, ia haapao maitai tatou i to tatou mafatu taipe, e ite ïa tatou i te oaoa e te hau o te feruriraa no ǒ mai i te hoê oraraa haehaa e te nahonaho. Mai tera noa iho â te huru aˈohia o te Kerisetianoraa mau. Ua faauruahia te aposetolo Paulo no te papai e: “Area te paieti e te mauruuru ra, o te taoˈa rahi mau ïa. Aita roa hoi a tatou e taoˈa i hopoi mai i teie nei ao; e ua itea-papu-hia hoi e aita roa e taoˈa e tia ia hopoi atoa ia haere ê tatou ra. E teie nei, e maa ta tatou, e te ahu, ia mauruuru tatou i te reira.”—Timoteo 1, 6:6-8.

Oia, ia faaineine e ia faaetaeta tatou i to tatou tino ia au i te paieti o te Atua, papu maitai e e maitaihia e e puaihia to tatou mafatu taipe. Ia haapao maite tatou i ta tatou tamaaraa pae varua, eita ïa tatou e vaiiho e ia faaino te mau eˈa e te huru feruriraa pohe o teie nei ao i to tatou ea pae varua. Te mea faufaa roa, ia hiˈopoa tamau noa ïa tatou i to tatou mafatu taipe na roto i te fariiraa i te mau faanahoraa ta Iehova e rave ra na roto i ta ˈna faanahonahoraa. Ia faaitoito tatou i te na reira, e tauturu-rahi-hia ïa tatou ia ape i te mau faahopearaa peapea o te hoê maˈi mafatu tupu taue i te pae varua.

[Nota i raro i te api]

[Parau iti faaôhia i te api 10]

E NEHENEHE TE HOÊ TAMAARAA TANO ORE I TE PAE VARUA E HAAPARUPARU I TE MAFATU TAIPE, MAI TE MAA PAIA ORE I TE PAE TINO O TE NEHENEHE E HAAPAARI I TE MAU UAUA HAAPURORO TOTO E INO ATU AI TE MAFATU MAU

[Parau iti faaôhia i te api 10]

E NEHENEHE TE HOÊ ORARAA PARAHI NOA I TE PAE VARUA E HOPOI MAI I TE MAU FAAHOPEARAA INO ROA

[Parau iti faaôhia i te api 11]

MEA INO ROA “TE MAU TAPITAPI O TE ORARAA” NO TE MAFATU TAIPE

[Hohoˈa i te api 11]

E nehenehe te oreraa e haapao i to tatou ea pae varua e aratai atu i te mauiui rahi ra

[Hohoˈa i te api 13]

Ia rave tatou i te mau peu maitatai i te pae varua, e paruruhia ïa to tatou mafatu taipe

[Faaiteraa i te fatu o te hohoˈa i te api 9]

AP Photo/David Longstreath