No te aha e tapaopao ai i te mau taata aita i te fare?

¹ Ua poro nau hoa faaipoipo Ite i te aahiata roa. I muri iho, ua hoˈi faahou raua toopiti atoa ra e farerei i te mau taata aita i te fare i to raua tereraa matamua. Ua titau te hoê tane ia raua ia tomo mai e ua faaroo maitai oia ia raua. Ua rave o ˈna i te buka E ora e a muri noa ˈtu e ua ani oia ia raua e e hoˈi faahou mai anei raua. Aita o ˈna i tauaparau aˈenei i te mau Ite no Iehova na mua ˈˈe e e mea rahi ta ˈna mau uiraa; ua haamatahia te hoê haapiiraa bibilia. Ua oaoa roa teie nau hoa faaipoipo i te farereiraa i te hoê taata mai te mamoe ra te huru. Te hinaaro ra anei tatou e ite i te hoê â huru tupuraa? E nehenehe mai te peu e e tapaopao maitai tatou i te mau taata aita i te fare e e hoˈi oioi faahou tatou.

² Ua aˈohia na tatou e rave rahi taime ia rave i te mau tapaopaoraa papu e ia hoˈi faahou ma te haamarirau ore. Mai ta te aamu faahitihia i nia nei e faaite ra, e nehenehe e noaa ia tatou i te mau faahopearaa maitatai roa na roto i te hoˈi-faahou-raa i te fare o te mau taata i muri aˈe i taua mahana noa ra. Ua faaoti tatou e poro i te tuhaa fenua i faataahia, peneiaˈe aita tatou e tapaopao ra i te mau taata aita i te fare ma te itoito atoa e titauhia. Te parau ra paha vetahi ê: ‘Te poro nei matou i ta matou tuhaa fenua i te mau piti aore ra e toru hebedoma atoa; aitâ e faufaa ia rave i te mau tapaopaoraa i te mea hoi e e hoˈi faahou mai matou.’ Tera râ, teie te tahi atu â tumu ia tapaopao tatou. Oia mau, i roto i te mau tuhaa fenua poro-pinepine-hia, na roto i te tutavaraa e farerei i te mau taata aita i te fare i te tereraa matamua e imi maitai ai tatou i te feia tei au i te poroi. Nafea ïa?

³ I roto e rave rahi vahi o te mau tuhaa fenua, 50 % aˈe taata aita i te fare i te roaraa o te mahana. No reira, na roto i te haamauraa hau atu â i to tatou feruriraa i nia i te mau taata aita i te fare, te faarahi nei tatou i ta tatou tuhaa fenua. I roto atoa i te mau tuhaa fenua aita e poro-pinepine-hia nei, e noaa ia tatou i te mau faahopearaa maitatai na roto i te tutavaraa e farerei i te taatoaraa na mua ˈˈe e faahoˈi ai i te tuhaa fenua.

⁴ E nehenehe iho â tatou e faanaho ia tatou no te hoˈi faahou i te tahi atu mahana, i roto i te hebedoma, e hiˈo i te mau taata aita i te fare. E rave rahi tei manaˈo e mea maitai aˈe ia hoˈi faahou i te hoê mahana taa ê i te tereraa matamua e i te tahi atu hora. E maiti paha outou i te faaherehere i te taime no outou i te mahana maa e te sabati no te hoˈi faahou e hiˈo i te mau taata aita i te fare i roto i te hebedoma. I te tahi aˈe pae, e rave rahi amuiraa tei ite e mau faahopearaa maitatai to te pororaa i te ahiahi. I roto i taua area hora ra, te farerei nei te feia poro hau atu i te afaraa o te mau taata o te tuhaa fenua.

⁵ E tia ia outou ia tapaopao i te mau hoˈi-faahou-raa e farerei i nia i te tahi atu api parau. Mai te peu e eita outou e nehenehe e hoˈi faahou e hiˈo i te mau taata aita i te fare, e horoa ïa outou i ta outou mau tapaopaoraa i te taata haapao i te pǔpǔ, ia nehenehe te mau taeae e te mau tuahine o te poro i te taime i mua nei i roto i te tuhaa fenua ia faaohipa ˈtu.

⁶ Na roto i te ara-maite-raa i taua tuhaa ra o ta tatou taviniraa, e riro mai tatou ei feia hotu atu â e te oaoa atu â. E ite tatou i te oaoa, i te iteraa e te imi maine nei tatou i te mau taata mai te mau mamoe ra te huru e te aupuru nei tatou ia ratou.—Ezek. 34:11-14.