Te hoê parau apî maitai oaoa no te feia haehaa
1 Te ora nei tatou i te hoê tau e faatupu ai Iehova i ta ˈna mau haavaraa (Ezek. 9:5, 6). E mea faufaa roa i teie mahana ia faaarahia te feia haehaa i te mau vahi atoa i te ohipa e tupu, ia nehenehe ratou e faaineine ia ratou. Ua horoa Iehova i to ˈna nunaa te hopoia e “faaite i te parau oaoa i te aau mǎrû ra,” o te hoê haapapuraa ïa no to ˈna hamani maitai (Isa. 61:1, 2). Te tauturu nei te mau vea ia tatou ia faaite i teie parau apî maitai i nia i te hoê faito rahi.
2 Te fanaˈo nei tatou i te hoê maa etaeta i te pae varua na roto i Te Pare Tiairaa e te A ara mai na! o te haapaari ia tatou e o te turai ia tatou ia rave i te ohipa. Te tamahanahana nei Te Pare Tiairaa i te feia haehaa na roto i te faaiteraa ˈtu ia ratou i te parau apî maitai oia hoi ua fatata te Basileia o te Atua i te faariro i te fenua ei paradaiso. Te horoa mai nei te A ara mai na! ia tatou nei i te mau tumu papu e nehenehe tatou e tiaturi i te parau tǎpǔ a te Poiete e haamau oia i te hoê ao apî o te hau e te ino ore. Te opere-rahi-raa i taua mau vea ra o te hoê ïa o te mau ravea oioi roa ˈˈe no te afai i te parau apî maitai i te feia haehaa. Eaha te mau manaˈo tano no te haamata i te aparauraa ta tatou e nehenehe e haafaufaa i roto i te mau vea hopea nei?
3 E nehenehe tatou e pûpû i “Te Pare Tiairaa” no te 1 no eperera: “Te haapaoraa: te hoê tumu parau opanihia?” e e ani e:
◼ “I to oe manaˈoraa, mea faufaa anei no te mau taata ia paraparau no nia i te haapaoraa? [E vaiiho tatou i te taata ia pahono.] I te mea hoi e e haapaoraa iho â ta ratou, te manaˈo nei vetahi e mea faufaa ore ia tauaparau atu. No te tahi atu e uiraa manaˈo noa te reira, e tumu parau opani-atoa-hia. No te tauturu i te mau taata ia noaa mai te hoê manaˈo no nia i te uiraa, te oaoa nei matou i te pûpû atu ia oe teie vea: ‘Te haapaoraa: te hoê tumu parau opanihia?’” E faahiti tatou i te tahi mau tuhaa o taua vea ra e e faaite tatou e ua riro Te Pare Tiairaa ei pu no te mau aˈoraa o te nehenehe e tiaturi.
4 Te tuu nei “Te Pare Tiairaa” no te 15 no eperera i te hoê uiraa faufaa: “E noaa anei te parau mau i te pae faaroo?” Peneiaˈe e nehenehe tatou e faaara i te anaanatae o te taata na roto i te faaohiparaa i teie omuaraa parau e:
◼ “I to tatou nei mau mahana, ua rahi roa te haapaoraa e te uiui nei te tahi mau taata, e noaa noa anei te parau mau. I to oe manaˈoraa, e itehia anei te parau mau i teie mahana?” [E vaiiho tatou i te taata ia pahono.] E riro Te Pare Tiairaa no te 15 no eperera ei vea faufaa no te tauturu i te mau taata ia ite i te parau mau a fanaˈo noa ˈi ratou i te mau pahonoraa maitatai no ta ratou mau uiraa.
5 E nehenehe tatou e pûpû i te “A ara mai na!” no te 8 no eperera ma te ani atu e:
◼ “I to oe manaˈoraa, e itehia anei ia tae i te hoê mahana, te hoê ao aita e maˈi?” E vaiiho tatou i te taata ia pahono. E faaite tatou ia ˈna te tumu parau ra “Te oraora maitai roa ˈˈe o te tino no te taatoaraa” i te api 12. I muri iho, e haamatara tatou i te mau parau tǎpǔ a te Atua no nia i te haamauraa o te hoê ao apî, i reira te taatoaraa e fanaˈo ai i te hoê oraora-maitai-raa tia roa. E turai tatou i te taata ia farii i te vea.