E pee anaˈe i te hiˈoraa i vaiihohia na tatou na roto i te amoraa i te maramarama
1 Ua parau o Iesu no nia ia ˈna iho e: “O vau te maramarama o teie nei ao.” Ma te pee i to ˈna hiˈoraa, ua riro atoa ta ˈna mau pǐpǐ ei “maramarama o teie nei ao.” (Mat. 5:14.) I to ˈna riroraa ei “maramarama o teie nei ao,” ua nehenehe o Iesu e parau e e noaa atoa i te feia atoa e pee ia ˈna i te “maramarama ora.” (Ioane 8:12.) Te faariro ra te reira ia tatou ei mau taata amo i te maramarama i te pae varua, e eiaha tatou e vaiiho noa ˈˈe i te hoê mea ia huna aore ra ia tapoˈi i taua maramarama ra.
2 Te faaineine ra te faanahonahoraa a Iehova ia tatou ia riro ei feia aravihi no te amo i te maramarama. Mai te peu e e apee maite tatou i te mau aˈoraa e te aratairaa ta tatou e fanaˈo nei, e nehenehe tatou e haamaramarama i te mau huru taata atoa no nia i te parau mau o te Basileia (Tim. 1, 4:6). Te riroraa ei feia amo i te maramarama e ere noa ïa te auraa e paraparau no nia i te parau mau i te mau taime atoa, ia ara atoa râ ia faaite i te hoê haerea kerisetiano. Eita to ˈna hiˈoraa e faahapahia i roto i taua tuhaa ra. O tatou ta ˈna mau pǐpǐ, te hinaaro nei tatou e haapapu na roto i to tatou oraraa i te mau mahana atoa e ua riro te kerisetianoraa mau ei huru oraraa no tatou (Eph. 5:9; Tito 2:7, 8, 10). E tia ia tatou ia rave i te mau ohipa nehenehe i te mahana rahi, o te turai ïa ia vetahi ê ia faahanahana i te Atua.—Mat. 5:16.
3 Ua anihia i te hoê Ite o tei poro na te mau fare i te hoê ohipa matau-ore-hia. Ua maˈihia te fatu fare e ta ˈna vahine, e tia râ ia raua ia afai e vaiiho i te moni i te fare moni. Ua ani raua i te Ite e nehenehe anei ta ˈna e haere. Ua farii oia e ua ite oia e ua hau atu i te 200 000 moni farane. I to ˈna hoˈiraa mai, ua ani oia i taua nau taata faaipoipo ra e: “Nafea to orua tiaturiraa mai ia ˈu e aita roa ˈtu hoi orua i matau ia ˈu?” Ei pahonoraa, ua parau raua e: “Ua ite mâua, e te taatoaraa atoa, e o te mau Ite no Iehova anaˈe ta matou e nehenehe e tiaturi.” Auê tatou i te teoteo i te iteraa e na roto to tatou ati-maite-raa i te mau faaueraa tumu morare a te Bibilia i noaa ˈi ia tatou i teie huru roo no te hanahana o te Atua!
4 Ua faataa te hoê orometua vahine haapii i ta ˈna piha haapiiraa e no te aha aita te hoê tamahine Ite no Iehova e ono matahiti i papai i te mau hohoˈa halloween. Ua parau o ˈna e ua oaoa roa o ˈna i ta ˈna tamarii haapii, no te mea aita o ˈna i mǎtaˈu i te faaite e mea taa ê o ˈna no ta ˈna mau tiaturiraa. Ua parau atoa o ˈna e, ia tiaturi papu anaˈe tatou i te hoê mea, e tia ia noaa ia tatou te itoito no te paruru i to tatou manaˈo. I taua po ra, ua hiˈopoa te orometua vahine haapii i ta ˈna mau tiaturiraa e ua ite o ˈna e aita to ˈna taua itoito ra. I te mahana i muri aˈe, ua parau o ˈna e, i teie nei, eita o ˈna e ani faahou i ta ˈna piha haapiiraa ia apiti i roto i te mau huru oroa atoa; i te hohonuraa o to ˈna mafatu, ua haapae atoa o ˈna i te tahi!
5 I te mau vahi atoa, te faaitoitohia nei te mau tavini o Iehova ia faaanaana i to ratou maramarama. Te haaputapû rahi nei te haerea maitai roa o te mau taurearea i te fare haapiiraa i to ratou mau hoa haapiiraa e ta ratou mau orometua haapii. Te turai nei te mau Ite paari e huru faahiahia roa to ratou i te mau taata tapiri ia faahiti maitai i te poroi o te Basileia. Te huti maira te pororaa faanaho-ore-hia e te amuiraa o te nehenehe e horoahia i roto e rave rahi tupuraa, i te mau taata aau rotahi o te hinaaro ra e haapii hau atu â no nia i te Atua. E faaiteraa ê atu atoa te tae-tamau-raa e te haavare ore i roto i te ohipa. E mea papu, i te mau vahi atoa to reira tatou e te mau mea atoa ta tatou e rave nei, e nehenehe tatou e faaara i te anaanatae o to tatou taata-tupu no te parau mau.
6 Ma te tiatonu to tatou mata i nia i to ˈna hiˈoraa tia, e tamau â tatou i te haamaitai ia tatou, o tatou hoi ta ˈna mau pǐpǐ. Mai te peu e e pee tatou i to ˈna hiˈoraa, e turama mau â to tatou maramarama i to tatou taata-tupu.—Mat. 5:15; Petero 1, 2:21.