Te parau apî o te Basileia taa ê no te taatoaraa

¹ Mai te 24 no eperera, te opere nei tatou i Te parau apî o te Basileia taa ê; na te ao atoa nei, te faaara nei ratou i te anaanatae o te mau taata e tapitapi ra. E ere ta ratou poroi no teie nei tau noa, e mea faufaa roa ˈtu â no a muri aˈe. Te turu nei te mau taata poro no te mau amuiraa atoa i taua ohipa ra ma to ratou mafatu taatoa, ma te hinaaro e horoa i teie poroi na te mau tausani taata. Te apiti taatoa ra anei outou?

² Ua afaihia te hoê faito tano noa o Te parau apî o te Basileia i te mau amuiraa atoa. Ehia ta outou i opere? Mai te peu e aita outou i rave hau atu â i ta outou i manaˈo, ua feruri anei outou e nafea ia opere rahi atu â mai teie nei e tae atu i te hopea o te opereraa, te 14 no me? No te aha e ore ai e rave i te taviniraa pionie tauturu? E nehenehe anei outou e apiti atu i roto i te mau putuputuraa no te pororaa faanahohia i te roaraa o te hebedoma, ma te apiti atu i tei faanahohia i te ahiahi, ei hiˈoraa?

³ E ara maite te mau matahiapo ia porohia te tuhaa fenua. Mai te peu e eita te amuiraa e nehenehe e haere atu i te tahi mau vahi o te tuhaa fenua, e ani ïa ratou i te tauturu a te mau amuiraa tapiri. E mea papu e ravehia te taatoaraa o te mau mea na roto i ta tatou mau tutavaraa ma te aau rotahi e te hoê rave-amui-raa maitai i rotopu i te mau amuiraa.

⁴ E ite hau atu â paha outou i te oaoa i roto i te pororaa i te mea te apiti nei e rave rahi taata, te feia poro apî e te mau melo apî o te amuiraa atoa. Te tiaturi nei matou e e vai maoro noa taua oaoa ra e e turai te reira i te taata tataitahi ia hoˈi faahou e farerei i te mau taata o tei farii maitai mai. Te faaitoitohia nei tatou paatoa ia rave i te mau tapaopaoraa papu e ia nota mai i te mau mea atoa no nia i te feia tei anaanatae. E mea tano ia faanaho i te hopea o te avaˈe me no te rave i te mau hoˈi-faahou-raa e farerei e te tapao e haamata i te mau haapiiraa bibilia.

⁵ Eaha ta outou e nehenehe e parau ia hoˈi atu outou? E manaˈo outou e mea faufaa ia parau e: “Te haamanaˈo ra oe i te api parau ta ˈu i vaiiho mai aita i maoro aˈenei; te manaˈo nei au e ua taio oe e ua feruri rii oe. E mea papu ua paraparau-rahi-hia no nia i ta ˈna poroi i to oe vahi faaearaa, no te mea te faahiti ra oia i te mau uiraa faufaa roa no te mau taata atoa.” A paraparau no nia i te tahi o te mau parau o te haaferuri i te api piti e a ani e: “I to oe manaˈoraa, eaha te tia ia tatou ia rave no te faaineine ia tatou no te mau mea no a muri aˈe?” A vaiiho i te taata ia pahono. Mai te peu e e anaanatae mai te taata, a hiˈopoa i te tahi atu â mau manaˈo i te mau api 2-4 o Te parau apî o te Basileia, e a pûpû atu i te hoê haapiiraa bibilia aore ra, mai te peu e eita e nehenehe, te mau vea hopea.

⁶ Mai te peu e te poro ra outou i roto i te hoê tuhaa fenua a te tahi atu amuiraa, a faaite atu i te iˈoa o te mau taata atoa tei anaanatae mai ia nehenehe te feia poro o taua amuiraa ra e hoˈi faahou e farerei ia ratou. Mai te peu atoa e e horoahia mai na outou i te mau hoˈi-faahou-raa e farerei, eiaha ïa e haamarirau.

⁷ Ua tupu te tahi mahutahutaraa i te opereraahia Te parau apî o te Basileia e ua faaitoito ia tatou tataitahi ia rave i te mau tutavaraa rahi no te poro i te Basileia. E nehenehe tatou e papu e riro taua ohipa ra ei manuïaraa e na te ao taatoa nei e ite maitai ïa te mau taata i te iˈoa e te opuaraa rahi a Iehova (Isa. 12:4, 5). Rahi â tatou i te horoa i te taime i roto i te pororaa, e rahi â tatou i te oaoa.—Sal. 126:3.