E imi anaˈe i te feia e vaiiho ra ia haapiihia ratou
1 “E ore roa te taata e tae mai ia ˈu nei, maori râ ia faatae mai te Metua o tei tono mai ia ˈu nei ia ˈna.” (Ioane 6:44). E haamauruuru o Iehova, o te hiˈopoa ra i te mafatu, i te feia e vaiiho ra ia haapiihia ratou e o te ohipa ra ia au i ta ratou e haapii ra (Ier. 17:10; Ioane 6:45). Mai te peu e e imi tatou i te feia haehaa o te hinaaro ra e ora i roto i te hoê ao apî, e haamaitairaa hanahana ïa ta tatou no te riro ei mau hoa rave ohipa no ˈna.—Sal. 37:11; Kor. 1, 3:9.
2 Ua parau o Iesu e e mau “ravaai taata” ta ˈna mau pǐpǐ. (Mat. 4:19.) Parau mau, e mea fifi teie huru ohipa i te tahi mau taime, e oaoa rahi râ te noaa mai na roto i te mau faahopearaa maitatai ta ˈna e faatupu. Maoti râ i te horoa ia tatou no to tatou iho maitai, te faaora nei tatou i te mau “iˈa” i te hoê haamouraa papu. E tia i te hoê taata ravaai maitai ia haapii e nafea ia huti mai i te iˈa. Oia atoa, e tia ia tatou ia faaite i te poroi o te Basileia na roto i te hutiraa mai i te ara-maite-raa, o te faaara i te anaanatae o te mau taata e faaroo ra. E parau mau iho â râ ia rave anaˈe tatou i te mau hoˈi-faahou-raa e farerei. Eaha ta tatou e nehenehe e parau?
3 Mai te peu e ua anaanatae te taata i te mau tumu parau o “Te Pare Tiairaa” o te tuatapapa ra i nia i te haapaoraa, e nehenehe tatou e parau e:
◼ “I te taime i mairi aˈenei, ua paraparau tâua e e rave rahi taata aita e au ra e tauaparau no nia i te haapaoraa. Aita anei oe e maere ra, i te mea hoi te faahua parau nei te rahiraa o te mau taata e haaati ra ia tatou e e mau kerisetiano ratou? Peneiaˈe te uiui nei oe no te aha te haapaoraa e riro ai ei tumu no te amahamaharaa e te aimârôraa?” E vaiiho tatou i te taata ia pahono. E hohora tatou i te buka Comment raisonner i te api 310, e e paraparau tatou no nia i te tahi mau manaˈo faahitihia i raro aˈe i te tumu parau iti “No te aha e mea rahi te mau haapaoraa?”
4 E hinaaropaha tatou e tamata i te haamata i te hoê aparauraa no nia i te haapaoraa mai teie rii te huru e:
◼ “Te vai ra anei te hoê ravea papu no te ite e tei roto anei tatou i te haapaoraa mau? [E vaiiho tatou i te taata ia pahono.] Ua rahi roa te haapaoraa e aita te mau taata e papu ra e tei roto ratou i te arepurepuraa.” E hiˈo tatou i te mau api 316-18 o te buka ra Comment raisonner, i reira te faahitiraahia te uiraa e “Nafea ia faataa te haapaoraa mau?” E tuatapapa poto noa tatou i te uiraa 5, “Te here mau ra anei to ˈna mau melo i te tahi e te tahi?” E parau tatou i te taata e e nehenehe o ˈna e haapii hau atu â ia haapii oia iho i te Bibilia.
5 Mai te peu e te haapeapea nei paha te taata no te mau huru tupuraa na te ao nei, e hinaaro paha tatou e parau e:
◼ “E au ra e, te tapitapi nei oe no nia i te mau huru tupuraa iino o ta tatou e ora nei e te haapaoraa i ta tatou mau tamarii. Te faaite ra te Bibilia i te hoê parau tǎpǔ faahiahia roa ta te Atua e fatata roa i te faatupu a muri aˈe.” E taio tatou i te Maseli 2:21, 22, e e faataa tatou e ua tǎpǔ o Iehova i te hoê ao i reira te hau e vai e a muri noa ˈtu.
6 Ia hoˈi faahou tatou e farerei i te mau taata i muri noa ˈˈe i te haamataraa o te ohipa taa ê e Te parau apî o te Basileia, ia ara tatou i te horoa na te feia atoa aita ta ratou i noaa ˈtura. E faaitehia i roto i Te taviniraa o te Basileia no te avaˈe me i te mea ta tatou e nehenehe e parau i roto i te mau hoˈi-faahou-raa e farerei i muri aˈe i te vaiihoraa ˈtu i Te parau apî o te Basileia.
7 I te mea hoi e mana to te Parau a te Atua, e tia ia tatou ia tamata i te faaohipa i te reira i roto i ta tatou mau omuaraa parau (Heb. 4:12). E ara iho â tatou ia faaitoito i te taata ia taio i te Bibilia (hiˈo Ohipa 17:11). Mai te peu e e rave tatou i ta tatou tuhaa ma te itoito, e haamaitai o Iehova i ta tatou mau tutavaraa.