Te haapiiraa tataitahi: te hoê tuhaa te tia ia tatou ia ara maite

¹ Eaha te hoê tuhaa faufaa no tatou te tia ia tatou ia ara maite? E tia ïa ia tatou ia tapitapi taa ê i te haamau e i te atuatu i te mau taairaa piri roa e o Iehova. E tiaraa faufaa to te haapiiraa tataitahi i roto i te tupuraa o teie huru taairaa piri roa. I teie mahana, mea iti i rotopu ia tatou nei o te horoa nei i te taime roa no te feruri hohonu e no te haapii tataitahi. Noa ˈtu râ, ia ore tatou e taio tamau i te Parau a te Atua, e nehenehe tatou e haaparuparu e aita e puai faahou no te patoi i te huru feruriraa o teie nei ao e te mau hinaaro pae tino ta ˈna e haafaufaa nei.

² Ia hiaai maite tatou i te Parau: I to tatou iteraa i te mau opuaraa a te Atua no te taime matamua, papu maitai e ua hinaaro ru tatou e titau hau atu â i te ite. Teie nei râ, ua iti mai paha to tatou poiâ i te pae varua i te hoê area taime. Peneiaˈe te titau nei tatou ia “hiaai maite” i te maa i te pae varua (Petero 1, 2:2). Nafea tatou e nehenehe ai e faatupu i taua hinaaro ra?

³ E nehenehe te hauˈa o ta tatou maa au-roa-hia e faatupu i roto ia tatou te hinaaro e tamaa no te mea te faahaamanaˈo ra te reira ia tatou i te mau mea oaoa. Te reira atoa te faahopearaa i te pae varua o te mau taime poto o te haapiiraa tataitahi. Ma te faaamu ia tatou i te tahi mau maa au maitai i te pae varua, e hiaai tatou i te amu i te mau parau mau hohonu atu â. E faaitoito te oaoa no roto mai i te ite ta tatou e haapue nei ia heru rahi atu â i roto i te Parau a Iehova.

⁴ E haamau tatou i te hoê porotarama tano roa ˈˈe: Te faaherehere nei vetahi i te hoê po taatoa no ta ratou haapiiraa tataitahi, area te tahi pae mea au aˈe na ratou te mau taime poto aˈe, ma te pinepine râ. Mai te peu e te manaˈo ra tatou e mea ohie aˈe no tatou ia feruri i te poipoi roa, e faaoti paha tatou e haapii na mua ˈˈe te inuraa taofe. Mai te peu e mea araara aˈe to tatou feruriraa i te po, e nehenehe tatou e maiti i te na reira hou a haere ai e taoto. Noa ˈtu eaha te tupuraa, o te rave-tamau-raa i taua haapiiraa ra te mea faufaa e te faaturaraa tatou i te porotarama tei tano maitai no to tatou mau hinaaro.

⁵ Ia faaitoitohia tatou ia haapii hau atu â, e oioi paha tatou i te parau e ua î aˈena ta tatou porotarama. Teie nei râ, e tia ia tatou tataitahi ia faaite i te haavare ore ia tatou iho ia hiˈopoa tatou i ta tatou huru faaohiparaa i to tatou taime. Te parahi ra anei tatou i mua i te afata teata e rave rahi hora te maoro i te mahana tataitahi? Ua ineine anei tatou i te haapae i te tahi o to tatou iho mau hinaaro? Na roto i te hoê hiˈopoaraa mau i ta tatou huru faaohiparaa i to tatou taime, e ite paha tatou e te vai ra i te mau mahana atoa te mau taime ta tatou e nehenehe e faaohipa ma te faufaa aˈe no te haapiiraa tataitahi.—Eph. 5:15, 16.

⁶ Te titau nei te haapiiraa i te Parau a te Atua i to tatou ara-maite-raa taatoa. Eita tatou e huti rahi mai i te mau haamaitairaa ia tamata tatou i te rave i te tahi atu â ohipa i te hoê â taime. Mai te peu e e haapii tatou a tamaa noa ˈi, a faaroo noa ˈi i te afata radio aore ra a mataitai noa ˈi i te afata teata, eita tatou e nehenehe e haamau i to tatou feruriraa i nia i te mea ta tatou e haapii ra (Tim. 1, 4:15). No reira, e vaiiho tatou i te hiti i te mau mea e nehenehe e haafariu ê i to tatou feruriraa.—Hiˈo i te Buka no te haapiiraa, api 32-3.

⁷ E mea faufaa ia haapii e ia faaohipa i te mau mahana atoa i te mau aˈoraa ta te Bibilia e horoa ra, no te mea mea na roto i taua ravea ra e aratai ai Iehova ia tatou. Ia haamau tatou i te tapao e faaô i roto i to tatou mafatu te parau mau i roto i te mau buka. Ia faaohipa tatou i te mau taime no te taio, tuatapapa aore ra feruri hohonu i nia i te mau manaˈo i te pae varua, noa ˈtu e mea iti roa te taime no te reira.—Deut. 6:6-8; Kol. 1:9, 10.