Mea au anei na oe te haapiiraa tataitahi?

E OAOA roa te mau tavini aau tae atoa a te Atua i te horoa i te hoê rahiraa taime no te hoê haapiiraa tataitahi o te Bibilia. (Salamo 1:1, 2) E au ra e te ani-rahi-hia ra i to ratou taime e to ratou puai, no reira e mea fifi mau no e rave rahi ia horoa i te taime e te puai no ta ratou iho haapiiraa mai tei hinaarohia ra e ratou.

Teie nei râ, no te riro noa ei tavini itoito a te Atua, e tia i te taatoaraa ia faaapî noa to ratou oaoa e to ratou puai i tera e tera mahana ma te imiraa i te mau manaˈo apî e hohonu â no nia i te parau mau o te Parau a te Atua. Te mau parau mau o te Bibilia o tei turai rahi ia oe i te mau matahiti i mairi aˈenei, aita paha te reira e turai rahi faahou râ ia oe i teie nei. E mea maitai iho â, e e ohipa ora atoa, ia tutava maite noa tatou ia noaa ia tatou i te hiˈoraa apî no nia i te parau mau ia itoito-noa-hia tatou i te pae varua.

Mea nafea te feia faaroo i tahito ra i vai puai noa i te pae varua na roto i te hoê haapiiraa tataitahi o te Parau a te Atua? Mea nafea te tahi mau tavini a Iehova no teie nei tau i te faariroraa i ta ratou haapiiraa ei mea au roa na ratou e te hotu rahi? Mea nafea ratou i te haamaitaihia no ta ratou mau tutavaraa?

Ua faaapîhia to ratou iho puai na roto i te hoê haapiiraa tataitahi

Ua rave te arii ra o Iosia no Iuda i ta ˈna ohipa patoiraa i te haamoriraa idolo ma te hoê itoito rahi atu â i muri aˈe i te taioraahia ia ˈna ‘te buka ture a Iehova i papaihia e Mose.’ Ma te papu e ere i te taime matamua a taiohia ˈi teie tuhaa o te Parau a te Atua; i to ˈna râ faarooraa i te poroi no roto roa mai i te otaro tumu, ua faaitoito te reira ia ˈna i roto i ta ˈna aroraa no te haamoriraa viivii ore.—Paraleipomeno 2, 34:14-19.

Ua ite te peropheta ra o Daniela i ‘te numera o te matahiti e hope ai i te anoraa o Ierusalema’ e ma te papu e ere noa no roto mai i te buka a Ieremia i roto atoa râ i “te mau buka.” O te mau buka paha ïa o te Levitiko (26:34, 35), o Isaia (44:26-28), o Hosea (14:4-7), e o Amosa (9:13-15). Ua arataihia teie taata paieti e te mea ta ˈna i papu na roto i ta ˈna haapiiraa ma te haapao maitai i te mau buka a te Bibilia ia imi i te Atua ma te pure hua. Ua pahonohia ta ˈna aniraa haavare ore ma te faaiteraa hau atu â e te tamahanahanaraa no nia i te oire no Ierusalema e no nia atoa i ta ˈna nunaa.—Daniela, pene 9.

Aita o Iosia, tei “rave . . . i te parau-tia i te aro o Iehova,” e o Daniela, tei “here-rahi-hia” i mua i te aro o te Atua, i taa ê ia tatou i teie nei mahana. (Te mau Arii 2, 22:2; Daniela 9:23) Ua arataihia ta ratou mau tutavaraa pûpûhia i te pae o te haapiiraa ma te itoito i te mau Papai e vai ra i tera ra tau ia ratou ia vai paari noa i te pae varua e ua tauturu ia ratou ia fanaˈo i te mau taairaa piri aˈe e te Atua. E nehenehe e faahiti i te hoê â parau no te tahi atu â mau tavini a Iehova i tahito ra, mai ia Iepheta, te hoê taata papai salamo no te utuafare o Asapha, Nehemia, e Setephano. Ua faaite papu ratou paatoa e ua faatupu ratou i te hoê haapiiraa tataitahi ma te haapao maitai i te tuhaa o te Bibilia e vai ra ia ratou i tera ra tau.—Te mau Tavana 11:14-27; Salamo 79, 80; Nehemia 1:8-10; 8:9-12; 13:29-31; Ohipa 6:15–7:53.

Ia riro te taviniraa ei faaitoitoraa

E tabula no te haapiiraa tataitahi o te Bibilia ta te rahiraa o te mau tavini a Iehova no teie tau o te tavini ra ia ˈna e rave rahi matahiti i teie nei. Ua itehia ia ratou e mea faufaa roa te reira ia vai ara noa ratou i te pae varua e no te faaî maitai i ta ratou mau hopoia kerisetiano. Noa ˈtu â ïa, te farii ra e rave rahi i rotopu ia ratou e ere i te mea ohie ia faaaifaito i to ratou taime e to ratou puai no te haapiiraa e no te tahi atu mau ohipa o te ore roa e tia ia vaiihohia i te hiti.

E mea faufaa roa râ ia vai ara noa i te pae varua na roto i te hoê haapiiraa tataitahi haapao maitai no te faaau i te mau titauraa a te taviniraa kerisetiano i roto i teie tau hopea o te ohipa pororaa i te Basileia na te ao nei. E nehenehe te feia o te oaoa roa i te hutiraa mai i te mau hiˈoraa apî e te hohonu o te Parau a te Atua e amo i te ohipa anaanatae mau ia no te haaputapû i te mafatu o te taata e hiaai ra i te maitai. E parau mau te reira no tei tonohia i te vahi e noaa-rahi-hia te mau iˈa i te pae varua e aore ra tei faaoromai ra i roto i te mau tuhaa fenua e poro-pinepine-hia ra e i reira te rahiraa e tâuˈa ore mai.

Faaamu-tamau-hia i te Parau a te Atua

E nehenehe te huru raveraa a vera e horoa mai i te mau manaˈo e e nafea ia oaoa hau atu â i ta oe haapiiraa matauhia aore ra nafea to oe utuafare e o oe iho e faufaahia ˈi hau atu â i te taime haapiiraa. I rotopu i te mau mea o ta te tavini a te Atua e ore roa e hinaaro ia erehia o ˈna o te taio-tamau-raa ïa i te Parau iho a te Atua. Ua faaoti e rave rahi i te taio te iti aˈe e toru e tae atu i te maha pene o te Bibilia i te mau hebedoma atoa. Te hinaaro ra anei oe e taio i te Bibilia taatoa i roto i te hoê noa matahiti? E oaoa oe i te horoaraa i te taime hau no te taioraa, peneiaˈe afa hora i te mahana hoê.

Ua hau atu i te hoê noa taime to oe taioraa i te Bibilia? No te aha oe e ore ai e haamau i te hoê tapao apî i te tahi atu taime? Ei tauiraa, ua taio te hoê vahine faaipoipo kerisetiano i te mau buka o te Bibilia ia au i to ratou tau i te papairaahia. Ua noaa ia ˈna e rave rahi mau manaˈo rii no nia i te tuatapaparaa i te tau o tei erehia e a ˈna na mua ˈˈe. Ua taio te tahi atu â vahine faaipoipo kerisetiano i te Bibilia taatoa e pae taime i na pae matahiti i mairi iho nei, na nia i te hoê hiˈoraa taa ê pauroa te taime. I te taime matamua, ua taio oia mai te Genese e tae atu ai i te Apokalupo. I te piti o te taioraa, ua haapoto oia i te manaˈo o te mau pene taitahi na roto hoê aore ra e piti noa reni i roto i te hoê buka papai. I te toru o te matahiti e i mua ˈtu, ua rave mai o ˈna i te hoê buka faahororaa rahi, na mua ˈˈe ma te maiti maite i te mau faahororaa irava i te hiti api e ma te haapao maitai i te faataaraa i raro i te api e i te mau haamaramaramaraa hau. I te pae o te taime, ua faaohipa oia i te mau tabula fenua o te Bibilia ia rahi to ˈna ite no nia i te huru o te fenua. Te parau ra oia e: “No ˈu iho nei, ua riro te taioraa i te Bibilia ei ohipa au mau mai te amuraa i te maa te huru.”

Ua itehia i te tahi feia taio i te Bibilia ma te anaanatae rahi e mea faufaa ia rave i te hoê Bibilia no te haapiiraa tataitahi anaˈe iho, ma te tapaopao poto noa i te tahi mau manaˈo anaanatae i nia i te hiti o te api, te mau faahohoˈaraa haaputapû, aore ra te numera o te mau api o te tahi atu â mau buka e mau vea o ta ratou e nehenehe e rave faahou mai i muri iho. Te tiaturi ra te hoê taata poro taime taatoa e oaoa o ˈna i te hopea o te mau avaˈe atoa ia papai i nia i ta ˈna iho Bibilia no te haapiiraa tataitahi te mau mea o ta ˈna i haapii i te roaraa o te avaˈe. “Ma te tiai i teie mau hora faufaa rahi na ˈu,” ua na ô oia e, “e tauturu te reira ia ˈu ia naeahia te tahi atu mau tapao no te avaˈe i mua.”

Te tahi mau manaˈo aravihi

Te manaˈo ra anei oe e ua î roa ta oe taime i te mau faaheporaa o te mahana e o te hebedoma e te hinaaro nei oe i te tahi mau tauturu no te haafaufaa maitai i ta oe taime taotiahia? A rave na muri iho ia oe te mea o ta oe e opua ra e taio, e a faaohipa i ta oe taime vata. I te fare e aore ra i te vahi i reira oe e haapii ai, ia maraa ia oe a faanaho i ta oe mau buka e te tahi atu mau mauhaa haapiiraa naea ohie noa ia oe. Ia au maite ta oe vahi haapiiraa eiaha râ ia maitai roa a varea ˈi oe i te taoto. E oreroraa parau anei ta oe? A taio oioi atu i te parau, e a vaiiho i te mau manaˈo ia ô mai, ia faafaaea anaˈe oe e ia rave anaˈe oe i te tahi maa ohipa.

E nehenehe vetahi i te haa amui o oe no te faaohipa maitai aˈe i te taime ia faufaahia toopiti atoa ra. Ei hiˈoraa, e nehenehe te tahi taata e taio haapuai i te mau mea ohie a rave ai oe i te mau ohipa matauhia aore ra a pûpû ai oe i tî na te taata taio. E nehenehe pauroa anei e farii i te hoê taime maniania ore i te fare no te haapiiraa tataitahi? “Eaha ta oe i taio iho nei ma te oaoa?” I te tahi mau taime e nehenehe paha oe e huti mai i te mau mea o ta oe mau hoa i haapii ma te haamata i te hoê aparauraa mai te reira te huru.

Te anaanatae ra anei oe i te faaô i te tahi mau manaˈo apî i roto i ta oe porotarama haapiiraa? E nehenehe oe e haamau i te hoê taime no te haapiiraa mai ta te rahiraa i haamau i te hoê taime no te tauaparau atu i te Bibilia e o vetahi ê. E haamau te hoê taata poro taime taatoa (pionie) i te rahiraa hora haihai i te avaˈe hoê no ta ˈna iho haapiiraa e e oaoa roa o ˈna ia ite anaˈe e ua fatata i te naeahia ia ˈna te fa. Te tahi pae e taotia ratou i te rahiraa hora mataitairaa i te afata teata e i te na reiraraa e faaherehere ïa i te taime haapiiraa. E rave rahi te maiti i te hoê tumu parau no te haapiiraa, o ta ratou e tamau noa maa taime, mai te mau hotu o te varua, te mau tupuraa i te tau a papaihia ˈi te buka o te Bibilia, aore ra te aravihi o te haapiiraa. E oaoa te tahi pae i te hamani i te mau tabula tuatapaparaa tau, ma te faaite i te taairaa e vai ra i rotopu i te mau arii no Iseraela e te mau perophetaa aore ra te Ohipa a te mau aposetolo e te mau episetole a Paulo.

E te feia apî, e hinaaro ra anei outou i te hoê faaroo paari aˈe? No te aha e ore ai e rave mai i te hoê buka aore ra te hoê vea ia tuatapapahia te reira i te tau faafaaearaa haapiiraa e vai ra i mua? Ua maiti te hoê tamahine bapetizohia o te haere ra i te haapiiraa tuarua i te hoê buka i neneihia e te Taiete Watch Tower oia hoi Te huitaata i nia i te eˈa o te maimiraa i te Atua (farani). Te tahi pene i muri aˈe i te tahi, ua papai haapoto noa oia i te mau mea o ta ˈna i haapii i roto i te hoê buka papai. E ohipa anaanatae mau e e rave rahi aˈe taime tei titauhia i ta ˈna i manaˈo. I te otiraa ia ˈna te buka taatoa, ua putapû roa o ˈna i te parau mau o te poroi a te Bibilia.

A hinaaro uˈana i te haapii

E rave rahi mau tavini haapao maitai a Iehova i to tatou nei tau tei “rahi â te rave i te ohipa a te Fatu.” (Korinetia 1, 15:58) Noa ˈtu e tabula o tei faaapîhia e te mau tutavaraa aau tae mau, te ohipa matarohia i te hoê hebedoma eita ïa e taui rahi. Tera râ, te hinaaro-hua-raa ma te ore e hiˈa ia noaa ia outou te auraa hohonu atu â o te parau mau e ia vai ara maitai outou ma te au maite i te haamaramaramaraa o te mau opuaraa a Iehova na te reira e tauturu ia manuïa outou i te haamaitai i ta outou mau peu no te haapiiraa.

E mea faaitoito mau ia faaroo i te mau haamaitairaa o te feia tei haamaitai i ta ratou huru raveraa no te haapii. Ua faanaho te hoê kerisetiano, i to ˈna iteraa e te erehia ra ia ˈna te huru feruriraa maitai no nia i te maimiraa i te auraa hohonu â o te parau mau, i to ˈna oraraa ia nehenehe oia e pûpû hau atu â i to ˈna mau hora vata no te haapiiraa tataitahi. “Ua faaoaoa te reira ia ˈu mai tei ore â i itea-aˈenei-hia e au,” o ta ˈna i parau. “Ma te tiaturi hau atu â i te Atua tei fatu i te Bibilia, ua ite au e e nehenehe vau e paraparau atu ia vetahi ê no nia i to ˈu faaroo ma te anaanatae mau. E au ra e ua paia vau, ua paari au i te pae varua, e ua mauruuru au i te mau hopea mahana atoa.”

Te faataa ra te hoê tiaau ratere a te mau Ite no Iehova, o te farerei ra e rave rahi mau amuiraa, i te tahi atu â mau haamaitairaa i te na ô raa e: “Te feia e tutava ra i te haapiiraa tataitahi e mea oraora e e huru hohoˈa mata oaoa to ratou. Mea maitai ratou i nia i te tahi atu, e eita ratou e paruparu ohie noa i te mau parau tano ore a vera. I roto i te pororaa, e faaau ohie ratou ma te ara i te mau hinaaro a te feia ta ratou e farerei.”

Ua horoa oia i te tahi atu manaˈo o ta te tahi pae e tapea paha no te hiˈopoa i ta ratou iho tabula haapiiraa. “I te mau putuputuraa no nia i te tauaparauraa e te mau Papai, e rave rahi te taio noa i ta ratou pahonoraa mai tei papaihia. E faufaa-rahi-hia ˈˈe ratou ahiri ratou e feruri e mea nafea te mau parau i te tuea i ta ratou i haapii aˈena e aore ra i to ratou iho oraraa.” Te manaˈo ra anei outou e e nehenehe outou e haamaitai i te reira?

Aita te peropheta ra o Daniela, o tei ora hau atu i te 90 matahiti, i manaˈo e ua ravai to ˈna ite no nia i te mau eˈa o Iehova. I to ˈna mau matahiti hopea, ua ani oia no nia i te hoê tumu parau o ta ˈna i ore i taa maitai roa: “E tau Fatu, eaha na te hopea i teie nei mau parau?” (Daniela 12:8) Ma te feaa ore, ua riro teie hinaaro uˈana o tei ore hoi i taui no te haapii hau atu â no nia i te parau mau a te Atua ei taviri no to ˈna haapao maitai faahiahia mau i te roaraa o to ˈna oraraa î maitai.—Daniela 7:8, 16, 19, 20.

Hoê â huru hopoia ïa ta te mau tavini taitahi a Iehova no te tia mai ma te aueue ore mai te hoê o Ta ˈna Ite. A hinaaro uˈana i te haapii ia vai paari noa oe i te pae varua. A tamata i te amui atu hoê aore ra e piti atu â tuhaa apî i ta oe tabula haapiiraa tataitahi o te hebedoma, te avaˈe e te matahiti anei. E ite oe e mea nafea o Iehova ia haamaitai i ta oe tutavaraa noa ˈtu te haihai. Oia mau, a oaoa i ta oe iho haapiiraa tataitahi o te Bibilia e te mau faahopearaa ta te reira e hopoi mai.—Salamo 107:43.

[Nota i raro i te api]