Ia rahi noa ta tatou ohipa
1 Te rave rahi nei te mau tavini a Iehova i te ohipa. E rave rahi hopoia ta ratou e amo nei i roto i to ratou utuafare, i ta ratou raveraa ohipa e i te fare haapiiraa. Hau atu i te reira, mea rahi “â te rave i te ohipa a te Fatu.” (Kor. 1, 15:58.) E tia ia tatou ia faaineine i te mau putuputuraa o te hebedoma a te amuiraa e ia haere atu. Te faaitoitohia nei tatou ia ore e vaiiho i te hoê hebedoma ia mairi ma te ore e apiti i roto i te pororaa. E tia ia tatou ia faaherehere maitai i te taime no te tamau i te haapii i te Bibilia, tatou tataitahi e e te utuafare. E rave rahi mau hopoia ta te mau matahiapo e te mau tavini tauturu i roto i te amuiraa. I te tahi taime, e anihia ia tatou ia tauturu i te feia e hiaai ra.
2 I te tahi taime, e nehenehe vetahi i rotopu ia tatou e teimaha roa no te mau mea atoa te tia ia ratou ia rave. Tera râ, e nehenehe te feia ohipa roa ˈˈe e riro mai ei feia oaoa roa ˈˈe, ia vai aifaito noa râ ratou e ia tapea noa i te hoê manaˈo maitai.—Koh. 3:12, 13.
3 Ua riro te aposetolo Paulo ei taata ohipa roa. Noa ˈtu e ua haamâha oia i to ˈna mau hinaaro na roto i te hamaniraa i te mau fare ie, ua horoa rahi aˈe râ oia ia ˈna iho i te tahi atu mau aposetolo. Ua riro oia ei taata poro evanelia rohirohi ore, ma te poro i mua i te taata e i tera e tera fare, ma te ore iho â râ e haapao ore i ta ˈna mau hopoia ei tiai mamoe i roto i te nǎnǎ (Ohipa 20:20, 21, 31, 34, 35). Noa ˈtu ta ˈna tabula ohipa î maitai, ua ineine noa o Paulo i te rave hau atu â i roto i ta ˈna taviniraa no Iehova.—Hiˈo Roma 1:13-15.
4 Ua vai aifaito noa o Paulo e ua tapea i te hoê mafatu oaoa ma te tuu i to ˈna tiaturiraa i nia i te puai ta Iehova i horoa. Ia au i to ˈna hiˈoraa, ua hoona mau iho â ia faatupuhia ta ˈna taviniraa e ua ite oia i te oaoa (Phil. 4:13). Ua ite o ˈna eita te Atua e haamoe i ta ˈna ohipa (Heb. 6:10). Na te oaoa e tauturu i to ˈna taata-tupu ia ite ia Iehova i turai ia ˈna (Tes. 1, 2:19, 20). Na to ˈna ite-papu-raa e e tupu iho â to ˈna tiaturiraa niuhia i nia i te Bibilia i atuatu i to ˈna itoito.—Heb. 6:11.
5 Ia hiˈopoa atoa na ïa tatou i te mau haamaitairaa e noaa mai na roto i ta tatou ohipa. Te haapuai nei to tatou taeraa e to tatou apitiraa i te mau putuputuraa o te hebedoma ia tatou e te faaitoito ra ia vetahi ê (Heb. 10:24, 25). Na te mau tutavaraa rotahi ta tatou e rave nei no te faaite i te parau apî maitai i te taatoaraa e faarahi i te amuiraa, no te mea te atuatu nei tatou i te anaanatae o te mau taata e te tauturu nei tatou i te feia apî ia haere atoa mai na muri ia tatou (Ioane 15:8). Ma te turu i te feia tei roto i te hiaai, te haapaari nei tatou i to tatou mau taairaa e te faatupu ra tatou i te hoê huru feruriraa fetii i roto i te amuiraa (Iak. 1:27). Hau atu â, mai ia Paulo, eiaha tatou e haamoe ia rahi tatou i te rave i te mau ohipa maitatai te faaoaoa nei tatou i te Atua ra o Iehova. E faariro ïa tatou i te taviniraa ia ˈna mai te hoê haamaitairaa rahi taa ê. No tatou, aita ˈtu e huru oraraa maitai aˈe.
6 Na roto i te rave-rahi-raa i te ohipa, e noaa atoa mai ia tatou i te tahi atu haamaitairaa. E au ra e te tere oioi nei te taime i to tatou peeraa i te hoê porotarama maitai i te pae varua. Ma te taa e te piri noa ˈtura tatou i te ao apî a mairi noa ˈi te mahana tataitahi, e farii tatou ma te oaoa i to tatou oraraa î maitai i teie mahana. E ite atoa tatou e huru paari ia vai ohipa noa, i te mea hoi e iti ïa to tatou taime no te tapapa i te mau tapao faufaa ore o teie nei ao.—Eph. 5:15, 16.
7 E mea rahi mau â te ohipa a te Fatu. E nehenehe râ tatou e oaoa mai te peu e e tamau noa tatou i te turui i nia i te Atua ra o Iehova e i nia ia Iesu Mesia, o te tamahanahana nei e te haamauruuru ra ia tatou.—Mat. 11:28-30; Ioane 1, 5:3.