E faatura anaˈe i te fare o te Atua
1 I te mau tau bibilia, ua faaue Iehova i to ˈna nunaa ia putuputu tamau i roto i to ˈna ra fare (Lev. 23:2). Ua tauturu taua mau putuputuraa ra i te mau tamarii Iseraela ia ore ia haamoe i te Parau a te Atua, ia nehenehe ratou e feruri hohonu, ia amuimui e ia tuatapapa i te Ture a Iehova. E faaî ïa ratou i to ratou feruriraa i te mau manaˈo o te Atua, o te haamaitai ia ratou i te pae varua. Ua riro taua mau putuputuraa ra ei mau taime oaoa. Ua faatupu te reira i te tahoê e te haamoriraa mau. Mea faufaa atoa i teie mahana ia putuputu i roto i te fare o te Atua.
2 Nafea ia faaite e te ite ra tatou i te faufaaraa o te mau putuputuraa? I roto i te tahi mau amuiraa aita i rahi te feia e putuputu mai. Parau mau, e haafifihia paha tatou no te haere, e vaiiho râ anei tatou i te mau fifi haihai roa ia haapeapea ia tatou ia haere tamau i te mau putuputuraa? I te tahi mau taime, e opua vetahi e faaea i te fare no te mea te mauiui rii ra paha to ratou upoo aore ra ua rohirohi ratou no ta ratou mahana raveraa ohipa. Te manaˈo nei vetahi e e tia ia ratou ia farii popou i te mau fetii aita i roto i te parau mau o te haere pinepine mai nei e farerei ia ratou. Aita atoa vetahi e haere i te tahi mau putuputuraa no te mataitai i ta ratou hohoˈa au-roa-hia i roto i te afata teata aore ra hoê ohipa taaroraa. Aita roa ˈtu tatou e tuea ra e te mau tamarii a Kora tei faaite i to ratou hinaaro rotahi e: “Te hinaaro nei tau aau, te nounou nei, i te mau hezere o Iehova.”—Sal. 84:2.
3 Parau mau, te fanaˈo rahi nei tatou i te maa i te pae varua i te mau putuputuraa; e mea fifi râ no vetahi ia faaroo. Te vai nei te moemoeâ ra, tei haapeapeahia e te mau hepohepo o te mahana, e o te taoto atoa. Te ite nei e rave rahi i te faufaaraa e tapaopao i te mau manaˈo ia vai araara noa ratou. Hau atu, e mau mai ïa i roto i to ratou feruriraa i te mea i parauhia. Mai te peu râ e faaineine maitai tatou ia tatou, e haafaufaa rahi ïa tatou i te mau putuputuraa e e nehenehe atoa tatou e “faarahi hua ˈtu i te haapao” i te mea e haapiihia ra.—Heb. 2:1.
4 Mai te feia paari, te hinaaro nei te mau tamarii e taa i te haapiiraa horoahia i te mau putuputuraa. Mai te peu e e horoa te mau metua na ratou i te mau taoˈa hauti aore ra te mau buka papaipairaa ia ore ratou ia hahaere e ia hauti, eita ïa te mau tamarii e haapii rahi mai i te mau putuputuraa. Te erehia ra i te aˈoraa ia vaiiho noa ia ratou ia hauti, paraparau, tutuô aore ra ia rave i te tahi atu â ohipa o te haapeapea i te feia i putuputu mai. E iti mai te mau tamarii i te haere i te vahi haumitiraa aore ra e inu i te pape mai te peu e e ite ratou e e apee iho â to ratou metua tane aore ra metua vahine ia ratou.
5 Te faufaaraa o te taeraa mai i te hora tia: I te tahi taime, e nehenehe te tahi mau tupuraa manaˈo-ore-hia e haafifi ia tatou ia tae i te hora tano i te putuputuraa. Te faaite nei râ te haamatauraa e tae mai i muri aˈe i te himene e te pure i te faatura ore no te huru moˈa o te mau putuputuraa e no vetahi ê. E haamanaˈo tatou e ua riro te himene e te mau pure faaotihia e to tatou mau taeae ei tuhaa no ta tatou haamoriraa. E pinepine aita i tano i ta tatou faanahoraa no reira tatou e taere tamau ai. Te faaite ra te taata e tae mai i te hora tia e te faatura nei o ˈna i te mau putuputuraa e te ite ra oia i to ratou faufaaraa.
6 A fatata noa mai ai te mahana o Iehova, mea faufaa roa ˈtu â no tatou ia putuputu (Heb. 10:24, 25). E faatura anaˈe i te mau putuputuraa ma te haere tamau, ma te faaineine ia tatou, e ma te tae i te hora tia e ma te faaroo, e ma te faaohipa i te mea ta tatou e haapii ra.