Imi anaˈe na mua i te Basileia o te Atua—Ma te pûpû tuutuu ore i te mau tusia arueraa
1 Te ineine noa ra te feia o te imi ra na mua i te Basileia i te paraparau no nia ia Iehova e to ˈna Basileia (Sal. 145:11-13). E taime ta tatou i te mau mahana atoa no te haamaitai i to ˈna iˈoa e no te faaite i te parau apî maitai (Sal. 96:2). Ua riro te arueraa ia Iehova ei oaoaraa no te papai salamo tei parau e: “Tei te Atua to matou nei faaahaaharaa e po noa ˈtu te mahana.” (Sal. 44:8). Mai te peu e te reira atoa to tatou mau manaˈo hohonu, e hinaaro atoa tatou e apiti tamau i roto i te taviniraa o te Basileia.
2 Aita o Iehova i haamau i te rahiraa hora o te tia ia tatou ia faanaho no te taviniraa; te faaitoito nei râ oia ia tatou ia arue ia ˈna “eiaha e tuutuu”. (Heb. 13:15.) Mai te peu e e nehenehe tatou, e tia ia tatou ia tutava i te horoa i te taime i te mau hebedoma atoa no te arue ia Iehova. Mai te peu e ua na reira aˈena tatou, e faanaho paha ïa tatou ia tatou no te riro mai ei pionie tauturu i te tahi mau taime aore ra ma te tamau atoa. No te feia i riro aˈena ei pionie tauturu, e nehenehe ratou e opua e riro mai ei pionie tamau.
3 Noa ˈtu eaha to tatou huru oraraa, e nehenehe anei tatou e pûpû i te hoê tusia arueraa rahi? No roto mai te itoito i te aau mehara. E atuatuhia te aau mehara na roto i te haapiiraa tataitahi o te Parau a te Atua, e e turai te mau putuputuraa a te amuiraa ia tatou ia faaite tatou i to tatou aau mehara na roto i te ravea ohie. E ‘faaaraara’ te amuimuiraa hohonu i te feia e arue ra ia Iehova ma te itoito ‘ia tatou i te aroha e te mau ohipa maitatai’. (Heb. 10:24.) Ma te haafaufaa taatoa i te mau faanahoraa atoa ravehia e te amuiraa, e nehenehe tatou e pûpû i te hoê tusia arueraa rahi atu â.
4 Ua horoa mai te peropheta vahine ra o Ana i te hoê hiˈoraa faahiahia mau i roto i te taviniraa a Iehova. Noa ˈtu e e 84 matahiti to ˈna, “aore roa oia i faarue i te hiero, e tia râ i te haamoriraa i te Atua (...) i te rui e te ao”. (Luka 2:37.) Ua apiti oia ma to ˈna nephe atoa i roto i te mau ohipa a te amuiraa, o tei haafanaˈo ia ˈna i te mau oaoaraa rahi. Ua riro te aamu bibilia no nia i ta ˈna taviniraa taiva ore ei tumu faaitoitoraa no tatou.
5 Ua aˈo o Paulo i te feia ‘itoito ia faaoromai i te paruparu o te itoito ore’. (Roma 15:1.) Te vai ra paha i roto i ta tatou amuiraa te mau kerisetiano o te haafaufaa i ta tatou tauturu maitai e ta tatou mau faaitoitoraa. E hinaaro noa paha te hoê taata poro i te hoê titau-manihini-raa e poro na muri iho ia tatou, aore ra i te hoê faurao. E paruparu te tahi atu e e tano maitai paha tatou no te horoa ˈtu i te tauturu titauhia no te faaitoito faahou ia ratou no te taviniraa o te Basileia (Tes. 1, 5:14). E faaite to tatou ohipa-ru-raa e ‘tufa e te feia moˈa ia au i to ratou mau hinaaro’ i to tatou hinaaro rotahi e arue hau atu â i te iˈoa o Iehova.—Roma 12:13.
6 Eita e nehenehe e faahiti pauroa i te mea ta Iehova i rave aˈena e e rave â no tatou. Eita atoa ta tatou e nehenehe e aufau ia ˈna no ta ˈna mau haamaitairaa atoa. E rave rahi atu â mau tumu rahi ia ‘haamaitai tei huti i te aho ra ia Iehova’!—Sal. 150:6.