Teie te taime

¹ I to te aposetolo Paulo papairaa i te pitiraa o ta ˈna rata i to Korinetia, ua faahaamanaˈo o ˈna ia ratou e ua opua ratou i te rave i te hoê ohipa tauturu maitai no to ratou mau hoa faaroo i Ierusalema. Teie râ, hoê matahiti i mairi, aitâ ïa ratou i faahope atura i te ohipa ta ratou i haamata. No reira, faaitoito atura Paulo ia ratou ma te parau e: “A tamau (...) e a faahope i taua ohipa ra. Ia rahi aˈe to outou hinaaro maitai i te faahope i ta outou i tuu no te faaoti.”—Kor. 2, 8:11, Français courant.

² Tatou paatoa i te hoê mahana, ua haamau aˈena tatou i te mau tapao. Ua faaoti na paha tatou e faarahi i ta tatou apitiraa i roto i te pororaa, e haamatau maitai atu â i to tatou mau taeae, e faatupu i te mau huru maitatai titauhia no te fanaˈo i te hoê haamaitairaa taa ê o te taviniraa, aore ra e aro i te hoê huru paruparu. Teie râ, e mau opuaraa maitatai paha ta tatou i te haamataraa, aita râ paha tatou i tamau noa e tae atu i te hopea. Ua mahemo oioi noa te mau hebedoma, te mau avaˈe, te mau matahiti, e aita roa ˈtu tatou i haere i mua. E tia anei ia tatou ia rave mai no tatou i teie aˈoraa e ‘tamau e e faahope’ i te mea ta tatou i haamata?

³ Titau anaˈe i ta tatou mau tapao: Rave i te hoê faaotiraa no tatou iho o te hoê ïa ohipa, te haapaoraa i te reira o te tahi atu ïa mea. Eita tatou e haere i mua mai te peu e e vaiiho noa tatou i te mau mea atoa no ananahi. E tia ia rave i te hoê faaotiraa e ia opua e faatupu i te reira ma te ore e haamarirau. No reira, e mea faufaa roa ia faanaho maitai. E mea faufaa ia faaherehere i te taime titauhia no te rave i taua ohipa ra e ia ara i te faaohipa i te reira no taua tumu ra. Teie te tahi manaˈo maitai: e haamau tatou i te hoê taio mahana aore ra te hoê hora, e i muri iho, ma te aˈo ia tatou iho, e faatura tatou i te reira.

⁴ Ia fifihia tatou no te titau i ta tatou tapao, e nehenehe tatou e parau e: ‘I te tahi taime au e rave ai i reira.’ Aita râ tatou i ite e eaha te ohipa e tupu ananahi. Te parau ra te Maseli 27:1 e: “Eiaha oe e faaahaaha i to ananahi ra parau; aore hoi oe i ite i te parau e tupu i te mahana hoê nei â.” Ua faaara te pǐpǐ ra o Iakobo e mea atâta ia tiaturi rahi roa i te oraraa no a muri aˈe, no te mea ‘aita tatou i ite eaha to tatou oraraa ananahi. (...) E teie nei, o te taata ite i te rave i te mea maitai, e aore i rave, ua riro ïa ei hara na ˈna’.—Iak. 4:13-17.

⁵ E rave rahi mau ohipa o te nehenehe e faafariu ê i to tatou feruriraa, e e rave rahi taata o te onoono mai e e nehenehe ta tatou mau tapao e haafifi-ohie-hia. E tia ïa ia tutava no te ore e haamoe i ta tatou mau tapao. E mea faufaa ia faahiti pinepine noa i te reira i roto i ta tatou mau pure. E tauturu-atoa-hia paha tatou ia ani i to tatou mau fetii ia faahaamanaˈo noa i te reira e ia faaitoito ia tatou. Tapao anaˈe i nia i te hoê kalena; o te hoê ïa faahaamanaˈoraa ia ite tatou e te haere ra tatou i mua. Ia faaoti tatou i te ‘rave mai ta tatou i opua i roto i to tatou aau’.—Kor. 2, 9:7.

⁶ E taime faahiahia roa te avaˈe atopa no tatou no te haamau i to tatou feruriraa i nia i ta tatou mau tapao. E pûpû tatou i Te Pare Tiairaa e te A ara mai na! E pûpû tatou i te tamatahitiraa i taua nau vea e piti ra i te mau taata, e te reira i te farereiraa matamua. E nehenehe anei tatou e haamau i te mau tapao au noa? No te aha e ore ai e vaiiho rahi atu â i te mau vea i roto i te tuhaa fenua? E mea tia no te rahiraa ia faaoti i te faatupu hau atu â i te mau hoˈi-faahou-raa e farerei e te faatere i te hoê haapiiraa bibilia.

⁷ E ere i te mea paari ia vaiiho no muri aˈe i te ohipa faufaa, i te mea hoi te “mou nei hoi teie nei ao”. (Ioane 1, 2:17.) Te pûpûhia mai ra ia tatou nei te mau haamaitairaa taa ê e te mau haamaitairaa otahi no te taviniraa a Iehova i teie nei. Na tatou ïa e haafaufaa i te reira!