12 Fa

EAHA TE AURAA?

Te hoê fa, e ere noa i te hoê moemoeâ aore ra te tahi ohipa ta outou e hinaaro ra ia tupu. No te haamau i te hoê fa, e tia ia opua, ia faatitiaifaro e ia tutava i te faatupu i te reira.

E nehenehe e raea te fa i roto tau mahana aore ra hebedoma, i roto tau avaˈe e i roto hoê matahiti e hau atu â. E nehenehe te fa o te titau i te taime roa e tatuhaahia.

NO TE AHA MEA FAUFAA?

Ia raea ia outou te fa, e rahi atu â to outou tiaturiraa ia outou iho, e puai atu â to outou mau auhoaraa e e oaoa ˈtu â outou.

Tiaturi ia outou iho: Ia haamau outou i te fa o te raea i roto tau mahana aore ra hebedoma, e rahi atu â to outou tiaturiraa ia outou iho no te haamau i te tahi mau fa o te titauhia i te taime roa aˈe e no te faaruru i te fifi i tera e tera mahana, mai te faaheporaa a te mau hoa.

Auhoaraa: Mea au na te taata te feia o te haamau i te fa au noa, oia hoi te feia tei ite eaha ta ratou e hinaaro ra e o te tapi i te reira. Hau atu â, te ravea maitai aˈe no te haapuai i te hoê auhoaraa, o te tapi-amui-raa ïa i te hoê â fa e te tahi atu taata.

Oaoa: Ia haamau e ia raea ia outou te fa, e oaoa roa outou.

“Mea au na ˈu ia haamau i te fa. E feruri noa vau i ta ˈu mau fa a tapi atu i te reira. Ua raea anaˈe ia oe taua fa ra, e oaoa oe no te ohipa ta oe i rave a na ô atu ai: ‘Iae, ua haere ia ˈu! Ua rave au i ta ˈu i opua.’ ”—Christopher.

ARATAIRAA BIBILIA: “Eita te taata o te mataitai i te mataˈi e ueue i te huero maa, e eita te taata o te hiˈo i te ata e ooti.”​—Koheleta 11:4.

EAHA TE NEHENEHE E RAVE?

A pee i teie mau aratairaa ia naea ia outou ta outou mau fa.

A faataa. A tapura i te fa ta outou e hinaaro i te tapi atu, e a faataa eaha te mau fa faufaa aˈe, a maiti ai i te mau fa ta outou e hinaaro i te tapi na mua, e to muri mai.

A faanaho. No te mau fa tataitahi:

• A faataa i te hoê taime au noa e raea ˈi ia outou teie fa.

• A faataa eaha te mau tuhaa e rave e raea ˈi ia outou teie fa.

• A feruri eaha te fifi e nehenehe e hiti mai, e e nafea ia faatitiaifaro i te reira.

A rave. Eiaha e tiai i te taime hoê maitai aˈe no te haamata. A ui ia outou iho: ‘Eaha te tuhaa matamua ta ˈu e rave ia raea ia ˈu ta ˈu fa?,’ a rave roa ˈtu ai. A tapao i te mau tuhaa atoa ta oe i rave.

ARATAIRAA BIBILIA: “E manuïa iho â te mau opuaraa a te taata itoito, e vevehia râ te taata atoa e ru noa.”​—Maseli 21:5.